महेन्द्रनगर — हातमा लौरो, पिठ्युँमा झोला । लामो पैदल यात्रा र भोकले थकित अनुहार । मंगलबार दिउँसो पूर्व–पश्चिम राजमार्ग अन्तर्गत कञ्चनपुरको बेदकोट नगरपालिकाको सुडा क्षेत्रमा यस्तै दृश्य देखियो ।

झण्डै दुई महिनाअघि पुख्र्याैली थलो डडेलधुरा गएका उनीहरु लकडाउनका कारण त्यहीँ रोकिएका थिए । लकडाउन लम्बिँदै गएपछि उनीहरुले पैदलै भए पनि घर फर्किने निधो गरेर हिँडेका हुन् । 

‘तीन दिनसम्म लगातार हिँड्दा निकै थाकेका छौं,’ डडेलधुराको भागेश्वर गाउँपालिकाबाट भीमदत्त नगरपालिका–५ सुकाशालस्थित घरमा फर्किन लागेका प्रकाश सेरालाले भने, ‘पहाडबाट बोकेको चामल एक/दुई छाक मात्रै पुग्यो, चाउचाउ खाएर बाटो काट्यौं ।’ उनीहरु डडेलधुराको जोगबुडा क्षेत्रमा पर्ने मलास भएर तराई झरेका हुन् । बाटोमा पसलहरु सबै बन्द भएकाले चाउचाउ मेत नपाएको उनले बताए । 

भीमदत्त नगरपालिकाको सुकाशाल र कञ्चनपुरकै शुक्लाफाँटा नगरपालिकाको वनसमितिका गरी ११ जना भागेश्वरबाट हिँडेरै तराइ झरेका हुन् । होली र चैते दसैंका लागि पहाड गएका उनीहरु लकडाउनका कारण लामो समयसम्म रोकिएका थिए । 

‘हिँडद–ाहिँडदा खुट्टा पनि दुखिरहेको छ, अब त हिँड्नै नसकिने अवस्थामा छौ,ं’ भागेश्वरबाटै फर्किएका रामप्रकाश सेरालाले भने, ‘भोकले समेत निकै सताएको छ ।’ भागेश्वरबाट निस्कदा सबैले एक/एक किलो चामल बोकेका थिए । पिठ्युँमा धेरै बोक्न सकिने पनि थिएन ।  चामल दुई छाकमै सकिएपछि भोकभोकै यात्रा गर्नुपरेको हो । भागेश्वरबाट हिँडेको तेस्रो दिन सांँझ मात्रै उनीहरु महेन्द्रनगर पुगेका हुन् ।