वेस्ट इन्डिजले पहिले ब्याटिङ गर्दै ६ विकेट गुमाएर १ सय ३७ रन बनाएको थियो । त्यसमा स्यामुएल्स एक्लैले ५६ बलमा ७८ रन बनाएका थिए । जवाफमा श्रीलंका १ सय १ रनमै अलआउट भएको थियो, १८.४ ओभर टिकेर । सेमिफाइनलमा श्रीलंकाले पाकिस्तानलाई १६ रनले हराएको थियो भने वेस्ट इन्डिजले अस्ट्रेलियालाई ७४ रनले पन्छाएको थियो । सुपर एट चरणबाट इंग्ल्यान्ड र न्युजिल्यान्ड तथा भारत र दक्षिण अफ्रिका बाहिरिएका थिए । सेप्टेम्बर १८ देखि अक्टोबर ७ सम्म आयोजना भएको यस विश्वकपमा सहभागी टिमको संख्या १२ थियो ।

टिमलाई चार समूहमा विभाजन गरिएको थियो । त्यसमध्ये पहिलो चरणबाटै बाहिरिने टिम रहेका थिए- अफगानिस्तान, आयरल्यान्ड, जिम्बावे र बंगलादेश । अस्ट्रेलिया सेमिफाइनलमै रोकिएको भए तापनि उसका ब्याटर सेन वाट्सन खुबै चम्के, उनले २ सय ४९ बनाए । उनी नै प्रतियोगिताका उत्कृष्ट खेलाडी पनि घोषित भए । यस्तै श्रीलंकाली बलर अजन्था मेन्डिसले १५ विकेट लिए । वान डे विश्वकपका सुरुआती दुई संस्करण जितेको वेस्ट इन्डिजले यसपल्ट ट्वान्टी-२० विश्वकप जितेर अन्तर्राष्ट्रिय क्रिकेटमा उत्कृष्ट पुनरागमन रचेको थियो ।