काठमाडौँ — लोकेश बम र मार्टिन गप्टिलको अर्धशतकपछि विराटनगर किंग्सले नेपाल प्रिमियर लिग (एनपीएल) क्रिकेटकै उच्च स्कोर बनाएको छ । पोखरा एभेन्जर्सले टस जितेपछि ब्याटिङको निम्तो पाएको विराटनगरले निर्धारित २० ओभरमा ६ विकेट गुमाई २ सय २० रन बनायो । 

एनपीएल इतिहासकै यो उच्च स्कोर हो । विराटनगरले आफैंले बनाएको उच्च स्कोरको कीर्तिमानलाई उछिनेको हो । गत वर्ष विराटनगरले लुम्बिनी लायन्सविरुद्ध ८ विकेट गुमाई १ सय ९३ रन बनाएर खेल जितेको थियो ।

बम र गप्टिलले दोस्रो विकेटमा १ सय ३२ रनको साझेदारी गरेका थिए । एनपीएल इतिहासको यो दोस्रो उच्च साझेदारी स्कोर हो । गत वर्ष पोखराका एन्ड्रिज हाउस र दिनेश खरेलले पहिलो विकेटमा विना क्षति १ सय ७६ रन जोडेका थिए ।