काठमाडौँ — लुम्बिनी लायन्स यस्तो टोली हो, जसलाई आफ्नो विगत सम्झेर लिनुपर्ने केही छैन । नेपाली राष्ट्रिय टोलीका कप्तान रोहित पौडेलको कप्तानीमा रहेको लुम्बिनी गत सिजनमा ७ मध्ये ६ खेल हारेर पुछारमा रह्यो ।

पहिलो तीन खेलमा हार बेहोरेको लुम्बिनीले चौथो खेलमा गएर चितवन राइनोजलाई ३३ रनले पराजित गरेको थियो । टोलीले गत सिजन जितेको यो एकमात्र खेल थियो । लुम्बिनीले यी सबै धमिला सम्झना ब्युँताउन चाहँदैन ।

विदेशी खेलाडीबाट धोका पाएपछि लुम्बिनीले एकपछि अर्को हार बेहोर्न बाध्य भएको हो । विशेष गरी बलिङमा टोली निकै कमजोर देखिएको थियो । त्यसैले होला टोलीले महँगो रकम हालेर ल्याइएका सूर्य तामाङ, आशुतोष घिरोहिया, अजुन साउदलाई रिलिज गरेर मिनी अक्सनमा ठूलो बजेटका साथ उत्रिएको थियो । मिनी अक्सनबाट विकेटकिपर/ब्याटर दिलीप नाथ, शेर मल्ललाई लिएको छ ।

राष्ट्रिय टोलीबाट देखाएको नेतृत्व क्षमता फ्रेन्चाइज प्रतियोगितामा पनि उतार्नुपर्ने चुनौती रोहितसामु छ । उनको ब्याट चले पनि लुम्बिनीले पहिलो सिजनमा नतिजा हात पार्न सकेको थिएन । उपकप्तान सन्दीप जोरा दुई महिनाअघि वेस्ट इन्डिजविरुद्ध ट्वान्टी–२० अन्तर्राष्ट्रियमा ६३ रन बनाएयता उच्च मनोबलमा छन् । नेपालको कप्तानी गरेका उनी हङकङ अन्तर्राष्ट्रिय सिक्सेसमा सर्वाधिक रन बनाउने खेलाडी थिए ।