काठमाडौँ — गत सिजन चितवन राइनोजसँगको खेलमा सातौं ओभरमा १७ रन बनाउँदा पोखरा एभेन्जर्सले ७ विकेट गुमाएको थियो । जुन खेलमा पोखराले जसोतसो ७४ रन बनाउन सक्यो । त्यो स्कोर एनपीएलकै दोस्रो न्युन बन्यो । १७–७ को स्थितिलाई लिएर ८४ रनको हारपछि पोखराका प्रशिक्षक राजीव कुमार भन्दै थिए, त्योभन्दा तल जाने ठाउँ नै थिएन ।

पोखरा त्यही टोली हो, जसले त्यसको दुई खेलपछि लुम्बिनी लायन्सलाई १० विकेटले हराउन सफल भयो । त्यो पनि १ सय ७६ रन विनाविकेट गुमाएर । एन्द्रे गाउसले यस खेलमा अविजित १ सय ४ रन जोड्दै एनपीएलको पहिलो शतकको इतिहास कोरेका थिए । 

पोखराको टोली अहिले हेर्ने हो भने पनि टोलीको प्रदर्शनमा अनुमान गर्न कठिन हुन्छ । पोखरालाई यो स्थितिबाट पार लगाउन कप्तान कुशल भुर्तेलको ब्याटबाट संयमता देखाउन आवश्यक छ । गत वर्ष उनका लागि ब्याटबाट एनपीएल बिर्सनलायक प्रतियोगिता बनेको थियो । दिनेश खरेल, तृतराज दास, अर्जुन कुमाल र अभिषेक तिवारीले ब्याटिङमा लय मिलाउन जरुरी छ ।