काठमाडौँ — गत सिजन लिग सुरु हुनुअघि चितवन राइनोजलाई सबैभन्दा कमजोर टोलीको रुपमा हेरिएको थियो । अक्सनमा चितवनले सोचेअनुरुप खेलाडी पाउन नसक्दा टोली कमजोर देखियो । अझ रवि वोपारा र सोहेल तनवीर जस्ता भेट्रान खेलाडी भित्र्याउँदा चितवनले सामाजिक सञ्जालको आफ्नै पेजमा चर्को आलोचना सहनुपरेको थियो ।

तर चितवन नसोचेको प्रदर्शन गर्दै प्लेअफमा पुग्यो । त्यसमा दुई प्रमुख खेलाडी यिनै वोपारा र तनवीर थिए । फाइनल अघिसम्म वोपारा सर्वाधिक रनकर्ता थिए । काठमान्डु गोर्खाजसँगको पहिलो खेलमै ५ विकेट लिएर तनवीरले विकेटको वर्षा गराउन सुरु गरेका थिए । उनका देव्रेहाते ओपनिङ जोडी रिजन ढकाल र कप्तान कुशल मल्लको अलराउन्ड प्रदर्शनले चितवनलाई उकासेको थियो ।

एक वर्षपछि चितवनको स्थिति फेरिएको छ । जुन हिसाबले चितवनको टिम बनाइएको छ, त्यस हिसाबमा टोलीलाई दाबेदारमा हेर्न सकिन्छ । यसको एउटा कारण टोलीले घरेलु खेलाडीमा नेपाली राष्ट्रिय टोलीको प्रतिनिधित्व गरिसकेका देव खनाल र अर्जुन साउदलाई थपेर ब्याटिङ मजबुत बनाउने प्रयास गरेको छ ।

गत सिजन देवले कर्णालीबाट उल्लेखनीय प्रदर्शन देखाउन सकेका थिएनन् । अर्जुन पनि लुम्बिनीमा त्यस्तै नै थिए । अर्जुनमा जुन क्षमता छ, त्यो उनले ट्वान्टी–२० मा देखाउन सकिरहेका छैनन् । चितवनबाट उनले आफ्नो खेल कसरी अगाडि बढाउँछन्, त्यो हेर्नेलायक पक्कै हुनेछ ।

इंग्लिस ब्याटर डेविड मलानलाई थपिएपछि कम्तीमा कागजमै भए पनि चितवन बलियो देखिएको हो । पहिलो सिजनमा सुदूरपश्चिमबाट खेल्दै प्लेयर अफ द सिरिज बनेका सैफ जैबको आगमनले चितवनलाई दाबेदारको रुपमा उभ्याएको हो । वोपारा, तनवीर, मलान र जैबको उपस्थितिमा युगान्डाका अल्पेस रामजानी ‘ब्याकअप’ को भूमिकामा हुने निश्चित छ । 

चितवनले नेपालका तीव्र गतिका पूर्व बलर कलाम अलीलाई प्रमुख प्रशिक्षकको जिम्मा दिएको छ । गत वर्ष उमेश पटवाल चितवनको प्रशिक्षक रहँदा कलाम उनका सहायक थिए ।