काठमाडौँ — कप्तान रोहित पौडेलले फेरि एउटा सानदार इनिङ्स खेलेपछि पहिलो जितको खोजीमा रहेको लुम्बिनी लायन्सले नेपाल प्रिमियर लिग (एनपीएल) क्रिकेटमा चितवन राइनोजलाई १ सय ६८ रनको लक्ष्य दिएको छ । चितवनले मंगलबार त्रिवि क्रिकेट मैदान कीर्तिपुरमा टस जितेपछि ब्याटिङका लागि बोलाइएको लुम्बिनीले निर्धारित २० ओभरमा ६ विकेट गुमाई १ सय ६७ रन बनायो ।

प्रतियोगिताको सर्वाधिक रनकर्ता रोहितले ५७ बलमा ८० रन बनाएपछि कमजोर सुरुआत गरेको लुम्बिनीले चुनौतीपूर्ण स्कोर दिन सफल भएको हो । उनले ६ चौका र ५ छक्का प्रहार गर्दै क्यानडाका पूर्व कप्तान साद बिन जाफरसँग पाँचौं विकेटका लागि ७० बलमा १ सय १४ रनको साझेदारी गरेका थिए ।

रोहित अन्तिम २० औं ओभरको तेस्रो बलमा आउट भएका थिए । त्यसपछि आएका सन्दीप जोराले पहिलो बलमा चौका प्रहार गरे पनि अर्को दुई बलमा बिट भएका थिए । इनिङ्सको अन्तिम ओभरमा रनआउट भएका जाफरले ३५ बल खेली ४ चौका र १ छक्कासहित ५२ रन बनाए ।

रिजन ढकालले चितवनलाई सनसनीपूर्ण सुरुआत दिलाएका थिए । खेलको दोस्रो ओभर एवंम आफ्नो पहिलो ओभरमा देव्रेहाते तीब्र बलर उनले आशुतोष घिरोहियालाई १ र उनमुक्त चन्दलाई शुन्यमा बोल्ड गरेका थिए । अर्जुन साउद १२ बलमा १५ र टम मुर्स ५ बलमा १० रन बनाई आउट भएका थिए ।