काठमाडौँ — चितवन राइनोजका सोहेल तान्भिरको ५ विकेटपछि काठमान्डु गुर्खाजले नेपाल प्रिमियर लिग (एनपीएल) क्रिकेटमा १ सय ११ रनको मात्र लक्ष्य दिएको छ । टस हारेर ब्याटिङमा आएको गुर्खाजले त्रिवि क्रिकेट मैदान कीर्तिपुरमा सोमबार ९ विकेट गुमाई १ सय ११ रनमात्र बनाउन सक्यो ।

पाकिस्तानी देब्रेहाते तीब्र बलर सोहेल तान्भिरले आफ्नो पहिलो ३ ओभरको स्पेलमा स्टेफन इस्किनाजी, माइकल लेभिट र भिम सार्कीलाई आउट गरी गुर्खाजलाई दबाबमा राखेका थिए । उनले आफ्नो चौथो ओभरमा गुर्खाजका कप्तान करण केसी र शाहव आलमलाई समान १ रनमा आउट गरेका थिए । तान्भिरले ४ ओभरमा २१ रनमात्र खर्चेर ५ विकेट लिएका हुन् ।

गुर्खाजको सुरुआत राम्रो थिएन । इंग्लिस ओपनर इस्किनाजी २ रनमै आउट भए । अर्का ओपनर लेभिटले ४ चौका र १ छक्कासहित २५ रन बनाए । राइनोजका कप्तान कुशल मल्लले जेहरार्ड इरसमसलाई ४ रनमा बोल्ड गरे । भिम सार्की १ रनमात्र बनाई तान्भिरको बलमा एलबीडब्लु आउट भए ।