ईपीएल : अन्तिम बलमा शरदको छक्का, खेल ‘टाई’
काठमाडौँ — ललितपुर प्याट्रियट्स र भैरहवा ग्लाडियटर्सबीच बजाज पल्सर एभरेष्ट प्रिमियर लिग (ईपीएल) मा बिहीबार भएको खेल ‘टाई’ मा टुंगिएको छ । १ सय ७८ रनको लक्ष्य लिएर आएको भैरहवाले निर्धारित २० ओभरमा ५ विकेट गुमाई १ सय ७७ रन बनाएपछि स्कोर बराबरी भएर खेल सुपर ओभरमा लम्बिएको थियो । तर खराब प्रकाशका कारण थप खेल हुन असम्भव भएपछि दुवै टोलीलाई १–१ अंक प्रदान गरिएको थियो ।
भैरहवाका कप्तान शरद भेषावकरले खेलको अन्तिम बलमा छक्का प्रहार गर्दै स्कोर बराबरी गरेका थिए । शरदले पहिलो बल सामना गर्दै राशिद खानको बलमा छक्का प्रहार गरेका थिए ।
भैरहवालाई यो स्कोरमा पुर्याउने प्रमुख भुमिका उपुल थाराङ्गा र कुशल मल्लले गरे । थाराङ्गाले ४४ बलमा अविजित ६७ रन बनाए । उनले ६ चौका र ३ छक्का प्रहार गरे । कुशल मल्लले १९ बलमा ३ चौका र २ छक्का प्रहार गरी ३५ रन बनाए ।
भैरहवाका लागि अन्य खेलाडीमा तामिम इक्बालले १४ र आरिफ शेखले २८ रन बनाएका थिए । ललितपुरका राशिदले ३ र रिजन ढकालले २ विकेट लिए । यस नतिजापछि भैरहवा ३ खेलमा ४ अंक जोड्दै शीर्ष स्थानमा पुगेको छ । चितवन टाइगर्सको पनि ४ अंक नै छ तर टोली रन रेटमा भैरहवाभन्दा पछाडि छ । ललितपुरले तेस्रो खेलमा आएर पहिलो अंक बटुलेको हो ।
यसअघि टस हारेपछि ब्याटिङमा आएको लतिलपुरले निर्धारित २० ओभर खेलेर ७ विकेट गुमाई १ सय ७७ रन बनाएको थियो । ओपनर सन्दीन विराकोडीले सर्वाधिक ५८ रन बनाए । उनले ४१ बल खेली २ चौका र ५ छक्का प्रहार गरे ।
कप्तान एवं ओपनर कुशल भुर्तेललाई २ रनमै रनआउटमा गुमाए पनि विराकोडीले अर्का श्रीलंकाली खेलाडी ओसाडा फर्नान्डोसँग दोस्रो विकेटमा ८ ओभरमा ६६ रनको साझेदारी गरे । फर्नान्डोले १९ बल खेली १ चौका र २ छक्कासहित २० रन बनाए ।
सन्दीप जोराले ३८ र अफगानिस्तानका अजमतुल्लाह ओमारजाईले ४२ रन बनाएपछि ललितपुर चुनौती स्कोर बनाउन सफल भयो । सन्दीपले २५ बल खेली २ चौका र २ छक्कासहित ३८ तथा ओमारजाईले २२ बल खेली २ चौका र ४ छक्का प्रहार गरे ।
पवन सर्राफ १ र योगेन्द्रसिंह कार्की ७ रनमा आउट भए । अविनाश बोहराले २ विकेट लिए । तर त्यसका लागि उनले ४ ओभरमा ४७ रन खर्चे । धम्मिका प्रसाद, कृष्ण कार्की र आरिफ शेखले १–१ विकेट लिए ।
प्रकाशित : आश्विन १४, २०७८ १८:०२
