‘सेल्फ’ प्रशिक्षणमा रम्दै राष्ट्रिय फुटबलर

सुवास बिडारी

मकवानपुर — फुटबल खेलाडी उत्पादनको हिसाबले मकवानपुर जिल्ला पनि अग्रस्थानमा आउँँछ । नेपालको पुरुष फुटबलको राष्ट्रिय टोलीमा मकवानपुरका चारजना खेलाडीले नियमित रूपमा स्थान बनाइरहेका छन् । अन्य खेलाडीहरूको पनि राष्ट्रिय टोलीमा स्थान बनाउने र बाहिरिने क्रम चलिरहेको छ । विश्वव्यापी फैलिएको कोरोना भाइरस (कोभिड–१९) को असर देशका चर्चित फुटबलरमा पनि परिरहेको छ ।

मकवानपुरबाट राष्ट्रिय टोलीमा रहेका खेलाडी अन्जन विष्ट, रन्जन विष्ट, सुनील बल र एलन न्यौपाने हुन् । रन्जन र अन्जन दाजुभाइ हुन् । कोरोनाका कारण अहिले विष्ट दाजुभाइ र सुनील हाल गृहनगर हेटौंडामै छन् भने एलन एक महिनाअगाडि मात्र अस्ट्रेलियातर्फ लागेका थिए । विभिन्न उमेर समूहमा नेपालको राष्ट्रिय टोलीको जर्सी लगाएर मैदानमा उत्रेका विंगर तथा च्यासलका कप्तान अमिर श्रेष्ठ र मनाङ मस्र्याङ्दी क्लबका गोलरक्षक अशोक बराल पनि हेटौंडामै छन् ।


मनाङको अग्रपंक्ति सम्हालिरहेका विष्ट दाजुभाइ आफूलाई फिट राख्नका लागि हेटौंडा–१० स्थित घर नजिकै रहेको वनविज्ञान अध्ययन संस्थान (फरेस्ट्री) मैदानमा बेलुकी समयमा प्रशिक्षण गरिरहेका छन् । ‘क्लबमा हुँदा समूहमा रहेर प्रशिक्षकको निर्देशन अनुसार प्रशिक्षण गरिन्थ्यो । अहिले एक्लै आफूलाई फिट राख्नका लागि प्रशिक्षण गरिरहेको छु,’ अन्जनले बेलुकी समय प्रशिक्षणमा बिताए पनि बिहान र दिउँसो घरमै बसिरहेको बताए । गायनमा सौखिन उनी गिटार बजाएर दिन काटिरहेको बताउँछन् ।


रन्जन भने बिहान र दिउँसो घरमै बसिरहेको र बेलुकाको समयमा ‘सेल्फ’ प्रशिक्षण गरिरहेको बताउँछन् । ए डिभिजन लिग र मोफसलमा भएका विभिन्न नकआउट फुटबल प्रतियोगितापछि घरमा आएर परिवारसँग बस्दा आफूलाई फिट महसुस गरेको उनले सुनाए । भने, ‘लिगलगत्तै विभिन्न जिल्लामा भएको नकआउट फुटबलको व्यस्तताबाट राहत मिलेको छ ।’ उनले फुटबलप्रेमी एवं सबैलाई कोरोनाबाट बच्नका लागि सुरक्षित घरमै बस्न आफ्नो फेसबुक पेजमार्फत् आग्रह गरिरहेको बताए ।


नेपालले आफ्नै भूमिमा १३ औं सागमा फुटबलको स्वर्ण पदक जित्दा महत्त्वपूर्ण भूमिका खेलेका सुनील अहिले हेटौंडा–१४ स्थित आफ्नै घरमा छन् । ‘घर नजिकैको चौरमा बिहान र बेलुका पसिना बगाइरहेको छु । यो समयमा कहाँ जानु । घरमै बसेर दिन बितिरहेको छ,’ उनले लिगमा च्यासलबाट खेल्दा सोचेजस्तो नतिजा नआए पनि अझै आफ्नो खेललाई कसरी तिखार्न सकिन्छ भनेर भरपूर सोच्ने मौका लकडाउनले दिएको बताए । ‘अन्य क्लबमा जानेबारे अहिल्यै सोचेको छैन,’ थ्रीस्टार छाडेर लिगअघि च्यासलमा आबद्ध उनले भने ।


‘ए’ डिभिजन लिगमा विपक्षी खेलाडीविरुद्ध अभद्र व्यवहार गरेपछि कारबाही भोगेका अशोक बराल पनि अहिले फरेस्ट्रीमै अभ्यास गरिरहेकै भेटिन्छन् । मनाङले धरानमा भएको बुढासुब्बा गोल्डकप र पोखराको आहा–रारा गोल्डकप जित्दा उत्कृष्ट गोलरक्षक घोषित अशोक आफूलाई फिट राख्न बिहान र बेलुका नै प्रशिक्षण गरिरहेको बताउँछन् । यस्तै अमिर श्रेष्ठ पनि हेटौंडा–९ स्थित पशुपतिनगरमा रहेको औद्योगिक क्षेत्रको मैदानमा नियमित प्रशिक्षण गरिरहेका छन् । ‘घर नजिकैको जुनियर भाइ र म दैनिक प्रशिक्षण गरिरहेका छौं,’ अमिरले लकडाउनको दिनदेखि नै घरबाट मैदानबाहेक अन्यत्र नगएको सुनाए ।


संकटा क्लबसँग आबद्ध मकवानपुरे गोलरक्षक रोहित कार्की र बिग्रेड ब्वाइजका डिफेन्डर एन्जल महर्जनलगायतका खेलाडी पनि अहिले घरमै छन् । जिल्ला फुटबल संघ मकवानपुरका प्रशिक्षक विजयलाल श्रेष्ठ आफूसँग नियमित रूपमा प्रशिक्षण गर्ने करिब ४० भन्दा बढी खेलाडीलाई लकडाउनको घोषणा भएसँगै घरमै बसेर सामान्य अभ्यास गर्न आग्रह गरिएको बताउँछन् । प्रकाशित : चैत्र २५, २०७६ ०९:३८

प्रतिक्रिया
पठाउनुहोस्
ADVERTISEMENT

बिरामी अलपत्र छाडेर ‘स्टाफ’ ओसार्छन् एम्बुलेन्स 

सुवास विडारी

मकवानपुर — लकडाउनका बेला एम्बुलेन्सजति ‘मेडिकल स्टाफ’ बोक्न खटिएपछि बिरामी मर्कामा परेका छन् । एम्बुलेन्स चालकहरू जानाजान बिरामी बोक्न आनाकानी गर्दै ‘स्टाफ’ ओसारिरहेका हुन्छन् ।

पहिले हेटौंडा अस्पतालबाहिर बिरामी बोक्न एम्बुलेन्स लामबद्ध हुने गरेकोमा अहिले फोन गर्दासमेत नआउने गरेको स्थानीयको गुनासो छ । लकडाउनमा मेडिकल स्टाफका सवारी सञ्चालनमा रोक लगाइएको छैन । तर बजार अनुगमनमा कतिपय मेडिकल स्टाफ एम्बुलेन्समा आउने र एम्बुलेन्सचालकहरू तिनैलाई पर्खर बस्ने गरेको देखिएको जिल्ला प्रहरी कार्यालयले जनाएको छ ।

सोमबार हेटौंडा–१७ का ६ वर्षीय सन्तोष कार्कीको आँखामा चोट लागेपछि अस्पतालले काठमाडौं रिफर गरेको थियो । तर परिवारले धेरै कोसिस गर्दा पनि एम्बुलेन्स पाउन सकेन । हेटौंडा अस्पताल र अन्य अस्पताललाई आग्रह गर्दा पनि नभएपछि उनीहरूले प्रहरी गुहारे । प्रहरीले काठमाडौं जाँदै गरेको अन्य सवारीमा पठाउने व्यवस्था मिलाइदियो ।

‘हामीले एम्बुलेन्स खोज्दा पाएनौं तर बिरामीलाई समन्वय गरेर पठाइयो’, प्रहरी निरीक्षक सुजन पाठकले भने, ‘धेरै गुनासो आएपछि एम्बुलेन्स पार्किङ गर्ने स्थानमा सोधखोज गर्दासमेत भेटिएन ।’

हेटौंडा अस्पतालमा भेटिएका बिरामीका आफन्तहरूले केही एम्बुलेन्स चालकले फोनै नउठाउने, उठाए पनि नभ्याउने जवाफ दिने गरेको बताए ।
प्रमुख जिल्ला अधिकारी दीपकराज नेपाल एम्बुलेन्सले बिरामी बोक्न आनाकानी गर्न नमिल्ने जनाउँदै सम्बन्धित निकायसँग जानकारी लिने सुनाउँछन् ।
हेटौंडा अस्पतालका अध्यक्ष प्रकाश पौडेलले एम्बुलेन्सले बिरामी नबोकेको गुनासो आफूसम्म पनि आएको बताए । ‘चिकित्सकलाई ल्याउन र पुर्‍याउन छुट्टै सवारीको व्यवस्था गरिएको छ,’ उनले भने, ‘अस्पतालका एम्बुलेन्सले गल्ती गरेका भए कारबाही गरिनेछ ।’

स्वाब परीक्षण बढाउन पालिकाहरूको जोड
पालिकाहरूले कोरोना संक्रमण फैलन नदिन शंकास्पद बिरामीको स्वाब परीक्षणको दर बढाउनुपर्नेमा जोड दिएका छन् । जिल्ला समन्वय समितिमा बसेको स्थानीय तह समन्वय बैठकले लकडाउन प्रभावकारी बनाउँदै स्वाब परीक्षण व्यापक बनाउने व्यवस्था मिलाउन प्रदेश तथा संघीय सरकारसँग आग्रह गरेको हो ।
हेटौंडामा दैनिक ६० जनासम्मको स्वाब जाँच्न सकिने ल्याब स्थापना गरिए पनि परीक्षण थोरै भइरहेको भन्दै सहभागीले जिल्लाबाहिरबाट आएका तथा लक्षण देखिएकाहरूलाई ध्यान दिनुपर्ने बताए ।
बैठकले निगरानी बढाउने तथा स्वाब संकलनमा स्थानीय तहहरूले समन्वय गर्ने निर्णय गरेको जिसस प्रमुख रघुनाथ खुलालले जानकारी दिए ।

बैठकले राहत वितरण एकद्वार प्रणालीमार्फत गर्नुपर्ने तथा आवश्यक व्यक्तिले मात्र राहत पाऊन् भन्ने विषयमा पालिकाले विशेष ध्यान दिनुपर्ने निर्णय गरेको छ ।
बैठकमा सहभागी पालिकाका प्रमुख/उपप्रमुखहरूले महामारी फैलिहाले अहिले निर्माण भएका क्वारेन्टाइन र आइसोलेसन व्यवस्थित र पर्याप्त नभएकाले हेटौंडा अस्पताललाई नै आइसोलेसन अस्पताल बनाउनुपर्नेमा जोड दिए ।

प्रकाशित : चैत्र २५, २०७६ ०९:३६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×