रुपन्देहीमा तिनाउ नदीकाे कटान सुरु- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

रुपन्देहीमा तिनाउ नदीकाे कटान सुरु

अमृता अनमोल

बुटवल — रुपन्देहीको तिनाउ नदीमा पानीको बहाव बढेपछि आसपासका क्षेत्रमा कटान सुरु गरेको छ । तिनाउमा आएको बाढीले बुटवल–११ बुद्धनगर, माझगाउँ, मझुवा एवं वडा नम्बर १७ का केही भागमा कटान थालेको हो ।

क्षतिको पूर्व आकलन गर्न भन्दै बुटवल उपमहानगरपालिका प्रमुख शिवराज सुवेदीसहितको टोलीले तिनाउ किनारको स्थलगत अनुगमन गरेको छ । अहिलेसम्म बुद्धनगर, मझुवा र मैनाबगर जोड्ने सडकको केही भाग र नदी कटान रोक्न मझुवामा बनाइएको तारजाली र ड्याम बगाएको स्थलगत अनुगमनमा गएका बुटवल–११ का वडाध्यक्ष रामचन्द्र खनालले बताए । ‘कटान सुरु भएँसगै नदी आसपासका बस्तीमा जोखिम बढेको छ,’ उनले भने, ‘पानी नरोकिए साँझसम्म आसपासका केही बस्ती खाली गर्नुपर्ने छ ।’

नदीले बिहान ५ बजेदेखि सतर्कताको तह पार गरेको छ । ५.२ सतर्कताको तह रहेको तिनाउ नदीमा बिहानदेखि ५.७१ पुगेको बाढी पूर्वानुमान महाशाखाले जनाएको छ । सतर्कताको तह नाघेर खतराको तहमा पुगेपछि पाल्पाको तिनाउ गाउँपालिका दोभानमा रहेको बाढी पूर्व सूचना प्रणालीले निरन्तर साइरन बजाएको छ । साइरन बजेलगत्तै बुटवल उपमहानगरले नदी छेउका बासिन्दालाई सुरक्षित हुन सूचना प्रवाह गरेको छ ।

चुरेबाट भेल लिएर बग्ने भएकाले बाढीका लागि यस क्षेत्रको सबैभन्दा जोखिम तिनाउ नदी हो । पाल्पाका करिब २० वटा खहरे खोलाहरू तिनाउमा मिसिने गरेका छन् । पछिल्लो समय जनताको तटबन्धअन्तर्गत नदी किनारमा तारजाली गर्ने र पर्खाल लगाउने गरेपछि पछिल्लो वर्षमा नदीको उपद्रो केही घटेको छ । यद्यपि नदीको बहाव क्षेत्र मिचिएकाले ठूलो पानी पर्‍यो कि कटान हुने क्रम रोकिएको छैन ।

प्रकाशित : आश्विन ८, २०७७ १३:४८
प्रतिक्रिया
पठाउनुहोस्

आइसोलेसनबाटै भागे कोरोना संक्रमित कैदी

कान्तिपुर संवाददाता

स्याङ्जा — भीरकोट नगरपालिकाअन्तर्गत कालिका सामुदायिक अस्पतालको आइसोलेसन सेन्टरमा उपचारत २८ वर्षीय युवक बिहीबार बिहान भागेका छन् ।

२ लाख रुपैयाँ धरौटी रकम बुझाउन नसक्दा १६ दिनदेखि जिल्ला कारागारमा बसेका अर्जुनचौपारी गाउँपालिका–४, रापाकोटका दीपक नेपालीलाई भदौ २८ गते कोरोना पुष्टि भएको स्वास्थ्य कार्यालय स्याङ्जाका प्रमुख यामप्रसाद शर्माले बताए ।

कोरोना पुष्टि भएपछि २८ गते नै कालिका अस्पतालको आइसोलेसन सेन्टरमा लगिएको जिल्ला प्रहरी प्रमुख एसपी होविन्द्र बोगटीले बताए । ‘कारागारमा ठाउँ नभएपछि आइसोलेसन सेन्टरमा नै लैजाने सल्लाह भयो,’ एसपी बोगटीले भने, ‘अत्यधिक पानी परेको थियो । आज बिहान२ बजे बत्ती गएको मौका छोपी आइसोलेसन सेन्टरको पछाडिपट्टि रहेको झ्यालबाट भागेका रहेछन् । खोजीकार्य भएको छ ।’

बिहानैदेखि जिल्ला प्रहरी कार्यालयबाटै खोजतलासका लागि प्रहरी टोली खटाइएको उनले बताए ।

प्रकाशित : आश्विन ८, २०७७ १३:४७
पूरा पढ्नुहोस्
प्रतिक्रिया
पठाउनुहोस्
×