काठमाडौं — नेकपाका संयोजक पुष्पकमल दाहालको परिवारबाट हालै सम्पन्न प्रतिनिधिसभा निर्वाचनमा ३ जना चुनावी मैदानमा थिए । रुकुम पूर्वबाट दाहाल, चितवन-३ बाट छोरी रेनु र कञ्चनपुर-१ बाट बुहारी बिना मगर उम्मेदवार भएका थिए । ३ जनामध्ये रुकुम पूर्वबाट दाहाल मात्रै विजयी भए । बाँकी २ जनाले राजनीतिक विरासत जोगाउन सकेनन् । 

छोरी रेनु भरतपुर महानगरपालिकाको मेयरबाट राजीनामा दिएर चितवन-३ बाट उम्मेदवार बनेकी थिइन् । उनलाई रास्वपाकी सोविता गौतमले पराजित गरिन् । चुनाव प्रचारका बेला उनले सशस्त्र युद्ध, संविधानसभा र भरतपुरको मेयरको रुपमा गरेको कामलाई देखाउँदै मत मागेकी थिइन् । ‘म प्रचण्डको छोरी हुँ । तर, लामो राजनीतिक यात्रा र योगदानका आधारमा उम्मेदवार भएकी हुँ,’ उनले उम्मेदवार भएपछि भनेकी थिइन् ।

संविधानसभा सदस्य, भरतपुरको मेयर हुँदै प्रतिनिधिसभा उम्मेदवार बनाएर दाहालले आफ्नो विरासतको राजनीतिमा अघि बढाउन चाहेका छन् । ०७४ मा यो क्षेत्रबाट उनका बुबा पुष्पकमल दाहालले जितेका थिए ।

कञ्चनपुर-१ बाट दाहालकी बुहारी बिना पनि यो निर्वाचनमा पराजित भएकी छन् । ०७४ मा उनले त्यही क्षेत्रबाट चुनाव जितेकी थिइन् । त्यसपछि उनी खानेपानी तथा सरसफाइमन्त्री समेत भएकी थिइन् । यसपटक रास्वपाका जनक धामीसँग उनी पराजित भइन् । 

संविधानसभाका अध्यक्ष स्वर्गीय सभामुख सुवास नेम्वाङका छोरा सुहाङ इलाम-१ बाट विजयी भएका छन् । उनले कांग्रेसका भेषराज आचार्यलाई पराजित गरेका हुन् । सुवासको निधन (२६ असार २०८०)पछि भएको उपनिर्वाचनमा पनि सुहाङले जितेका थिए ।

एमाले उपमहासचिव रघुवीर महासेठ धनुषा-४  र उनकी श्रीमती जुली महतो धनुषा-३ मा उम्मेदवार थिए । यसपटक दम्पतीले नै चुनाव हारेका छन् । धनुषा-३ बाट रास्वपाका मनिष झाले चुनाव जिते भने दोस्रोमा कांग्रेसका विमलेन्द्र निधि र तेस्रो स्थानमा महतो रहेकी छन् ।

धनुषा-४ मा पनि रास्वपाकै राजकिशोर महतोले जिते । कांग्रेस नेता महेन्द्र यादव दोस्रो र उपमहासचिव महासेठले तेस्रो स्थानमा सीमित भए ।

कर्णालीको डोल्पामा सहोदर दुई भाइ प्रतिस्पर्धी थिए । नेकपाबाट धनबहादुर बुढा र कांग्रेस सहमहामन्त्री एवं उनका भाइ कर्णबहादुर बुढा । ०७९ को निरन्तरता दिँदै धनबहादुरले यसपटक पनि चुनाव जिते । उपविजेता एमालेका लंकबहादुर रोकाया भए भने कर्णबहादुर बुढा तेस्रो । डोल्पाको राजनीतिमा बुढा परिवार निर्णायक हुँदै आएका छन् । 

रौतहट-३ बाट कांग्रेस नेता मोहम्मद आफताभ आलमका छोरा मोहम्मद फिरदोश आलमले जितेका छन् । कांग्रेस नेता शेख इद्रिशको राजनीतिक विरासतबाट राजनीतिमा आएको आलम परिवारबाट फिरदोशले चुनाव जितेका हुन् ।

मुस्ताङबाट कांग्रेस नेता रोमी गौचन थकालीका छोरा योगेशले चुनाव जितेका छन् । ०७९ मा पनि उनले चुनाव जितेका थिए ।

कांग्रेस नेता अर्जुननरसिहं केसी समानुपातिक उम्मेदवार छन् । सूचीमा उनी खसआर्य क्लस्टरमा १ नम्बर छन् । उनका भाइ जगदीशनरसिंह केसी नुवाकोट-२ बाट उम्मेदवार थिए । उनलाई रास्वपाका अच्युतम लामिछानेले पराजित गरे । 

कांग्रेस नेता एवं पूर्वअर्थमन्त्री रामशरण महतका भाइ प्रकाशशरण महतले नुवाकोट-१ बाट यो निर्वाचनमा प्रतिस्पर्धा गरेका थिए । उनलाई रास्वपाका विक्रम तिमिल्सिनाले पराजित गरे । 

माओवादी नेता देवेन्द्र पौडेलका लागि नवलपरासी पश्चिम-२ नयाँ क्षेत्र थियो । ०७९ मा बागलुङ-२ बाट चुनाव जितेका उनले यसपटक नवलपरासी पश्चिम-२ बाट उम्मेदवारी दिएका थिए । निर्वाचन परिणामले उनलाई सातौं स्थानमा धकेलेको छ । उनकी श्रीमती बलावती शर्मा नेकपाको समानुपातिक उम्मेदवारको सूचीमा छन् । उनी खसआर्य क्लस्टरबाट १ नम्बरमा छिन् । श्रीमान् देवेन्द्र पराजित भए पनि उनी समानुपातिक सांसद हुने निश्चितजस्तै छ ।

एमाले नेता शेरबहादुर तामाङ सिन्धुपाल्चोक-२ बाट उम्मेदवार भई पराजित भए । नेकपाका युवराज दुलाल विजेता बने भने कांग्रेका वंशलाल तामाङ निकटतम् प्रतिस्पर्धी भए । तामाङकी श्रीमती उषाकला राई एमाले समानुपातिक आदिवासी जनजाति महिला क्लस्टरको समानुपातिक सूचीमा छन् । उनी चौथो नम्बरमा भएकाले निर्वाचित हुने सम्भावना छ । 

राप्रपाका पूर्वनेता दीपक बोहराका दुई छोरा प्रज्वल बोहरा (रुपन्देही–१) र गौरव बोहरा (रुपन्देही–३) बाट उम्मेदवार बनेका थिए । दाजुभाइ नै पराजित भए । रुपन्देही-१ मा रास्वपाका सुनिल लम्सालले चुनाव जितेका छन् । कांग्रेसका हिराबहादुर खत्री र प्रज्वल तेस्रो नम्बरमा रहे ।

रुपन्देही-३ मा रास्वपाकै डा. लेखजंग थापा विजयी भए भने गौरव तेस्रो स्थानमा पुगे । ०७९ को निर्वाचनमा रुपन्देही-३ बाट राप्रपाका दीपक बोहरा निर्वाचित भएका थिए ।

पत्रकार ऋषि धमला र एलिजा गौतम आम जनता पार्टीबाट उम्मेदवार भएका थिए । धमला रौतहट-४ उम्मेदवार भएका थिए । चुनावी प्रचार शैलीका कारण चर्चित बने पनि विजेता बन्न सकेनन् । उनकी एलिजा आजपाबाट समानुपातिकतर्फ उम्मेदवार बनेकी छन् । 

माओवादी सशस्त्र द्वन्द्वमा होमिएका वर्षमान पुन र ओनसरी घर्तीको राजनीतिक यात्रा संघर्षमय छ । यो निर्वाचनमा पुनले रोल्पाबाट चुनाव जितेका छन् । ०७९ को निर्वाचनमा पनि उनले रोल्पाबाटै जितेका थिए । पुन पूर्वअर्थ र उर्जामन्त्री भइसकेका छन् । पूर्वसभामुख भइसकेकी ओनसरी भने यसपटक उम्मेदवार भइनन् ।

एमाले महासचिव शंकर पोखरेल दाङ-२ बाट पराजित भएका छन् । रास्वपाका बिपिनकुमार आचार्यले उनलाई पराजित गरेका हुन् । एमाले केन्द्रीय सदस्य उनकी श्रीमती सुजिता शाक्य यसपटक उम्मेदवार भइनन् । ०७९ मा उनी समानुपातिकबाट सांसद थिइन् ।