कांग्रेसका उपसभापति विश्वप्रकाश शर्माले निर्वाचन परिणाम कांग्रेसका लागि प्रतिकूल रहेपनि अप्रत्याशित नभएको बताउँदै पार्टीको केन्द्रीय कार्यसमितिको बैठक बोलाएर त्यसको गहन समीक्षा गरिने बताएका हुन् ।
काठमाडौँ — कांग्रेसका उपसभापति विश्वप्रकाश शर्माले निर्वाचन परिणाम कांग्रेसका लागि प्रतिकूल रहेपनि अप्रत्याशित नभएको बताएका छन् । उनले केहीबेर अघि एक भिडियो सन्देशमार्फत निर्वाचन परिणामको केन्द्रीय कार्यसमितिको बैठक बोलाएर गहन समीक्षा गरिने बताएका हुन् ।
पार्टीका कार्यकर्ता र शुभचिन्तकहरूलाई सम्बोधन गर्दै शर्माले विगतका कमजोरीहरूको पहिचान गरी एकताबद्ध भएर पार्टी नयाँ ऊर्जाका साथ अघि बढ्ने बताएका छन् ।
‘निर्वाचन परिणाम प्रतिकूल आयो । तर, अप्रत्याशित होइन । गहिराइमा गएर चाँडै नै समीक्षा गर्न चाँडै नै केन्द्रीय कार्यसमितिको बैठक बोलाइने छ,’ उनले भने, ‘२०७९ को स्थानीय तह निर्वाचनमा धरान, काठमाडौं र धनगढीबाट मतदाताले ‘तिम्रो दललाई बदल’ भन्ने सन्देश दिए । तर, पार्टीले अपेक्षित गतिमा सम्बोधन गर्न सकेन ।
बरु मतदाताको रुष्टतालाई मतमा बदल्न त्यही मौका छोपेर नयाँ दल रास्वपा स्थापना भयो । रास्वपाले छोटो समयमा जुन सिट ल्यायो । त्यो अर्को सन्देश थियो ।’
निर्वाचनपछि पार्टीले सरकारको नेतृत्व गर्नुपर्ने वा पूरै समय प्रतिपक्षमा बस्नुपर्ने विकल्पमध्ये एक रोज्नुपर्नेमा त्यसो नगरी सत्तामा गएको र सरकार सञ्चालनमा कमीकमजोरी भएको उनले बताए ।
‘सरकारको कामकारबाहीमा र गतिमा प्रगति गर्न कमजोरी रह्यो । समग्रतामा अनेकौं निराशा र प्रश्नहरू आए । त्यसलाई विद्रोहमा लग्यो,’ उनले भने । शर्माले जेन-जी विद्रोहपछि पनि अपेक्षित गतिमा परिवर्तन गर्न नसकेको र विशेष महाधिवेशनबाट नीति तथा नेतृत्वमा परिवर्तन गरे पनि त्यसलाई नागरिकसम्म पुर्याउन नसकेको स्वीकारे ।
‘विशेष महाधिवेशनले नीति र नेतृत्वमा परिवर्तन गर्यो । तर, विशेष महाधिवेशन सम्पन्न भएर नयाँ नेतृत्व आएको पचास दिनमा निर्वाचन भयो । त्यसमार्फत जे परिवर्तनको सुरुवात गरेका थियौं, समाजका विषयवस्तुहरू, प्रश्न, गुनासोहरूलाई डकुमेन्टमा लेख्यौं, तर नागरिक पंक्तिमा राम्रोसँग लैजान सकेनौं, लोकप्रियतावादलाई पनि चिर्न सकेनौं,’ उनले भने ।
जेन-जी विद्रोहपछि सबै क्षेत्रमा परिवर्तन हुनुपर्ने अपेक्षालाई एउटा पार्टीले निर्णयबाट मात्र पूरा गर्न नसकिने उल्लेख गर्दै शर्माले भने, ‘जेन-जी विद्रोहपछि सबै क्षेत्रमा परिवर्तन हुनुपर्छ भन्ने अपेक्षा जो थियो, त्यो परिवर्तन एउटा निर्णयले हुन सक्दैनथ्यो । त्यो सबैले गर्नुपर्दथ्यो । तर, कांग्रेसले गर्यो । तर, नागरिक पंक्तिमा लैजान सकिएन । त्यसले निर्वाचन परिणाम हाम्रो पक्षमा आएन ।’
उनले निर्वाचन परिणामलाई बाह्य र आन्तरिक कारणहरूको गहन पहिचान गरी कमजोरीहरू केलाउने र नयाँ जीवनका साथ अघि बढ्ने बताए । ‘कांग्रेसले हार र जित कैयौं पटक देखेको छ । यो पराजयको क्षणलाई छोटो बनाउनेछौं । गहिराएर समीक्षा गरेर सम्पूर्ण पार्टी पंक्ति एक भएर नयाँ सम्भावनाको खोजी गर्नेछौँ,’ शर्माको भनाइ थियो,‘त्यसका लागि वर्तमान र निवर्तमान नेतृत्वलाई एक ठाउँमा उभिएर सोच्नुपर्ने छ ।’ उनले लोकतान्त्रिक अभ्यासबाट आएको परिणामलाई आत्मसात् गर्दै संयमता, एकता र ऊर्जा राख्न पार्टीका सबैलाई आह्वान गरेका छन् ।
‘अहिले जे परिणाम आएको छ, त्यो लोकतान्त्रिक अभ्यासको बाटोबाट आएको छ । यसलाई आत्मसात् गरेर संयमता, एकता र ऊर्जा राख्न सबैसँग आग्रह गर्छु । निर्वाचनमा विजयी सबै राजनीतिक दल, विशेषगरी पहिलो दल बन्दै गरेको रास्वपा र उम्मेदवारहरूलाई बधाई दिन्छु,’ शर्माले सन्देशमा भनेका छन् ।
