काठमाडौँ — सशस्त्र प्रहरी महानिरीक्षक राजु अर्यालले आगामी फागुन २१ गते हुन गइरहेको प्रतिनिधिसभा सदस्य निर्वाचनको सुरक्षामा कुनै पनि कमी–कमजोरी नगरी खटिन सशस्त्र प्रहरी कर्मचारीहरूलाई निर्देशन दिएका छन् ।

सशस्त्र प्रहरी बल नेपाल प्रधान कार्यालयमा माघ ११ गतेदेखि सशस्त्र प्रहरी बल नेपालका विभिन्न कार्यालयहरूमा प्रमुखको जिम्मेवारीमा खटिन लागेका अधिकृतहरूलाई निर्देशन दिँदै अर्यालले तोकिएको जिम्मेवारी प्रभावकारी ढंगबाट सम्पादन गर्न भनेका हुन् ।

अर्यालले उच्च व्यवसायिक प्रदर्शन गर्न र चुनाव लक्षित सुरक्षा कारवाहीलाई तीव्र रूपमा कार्यान्वयन गर्दै भयमुक्त वातावरणमा निर्वाचन सम्पन्न गर्ने तर्फ ध्यान दिन पनि निर्देशन दिए । कमजोर कमाण्ड र गल्ती गर्ने कमाण्डरमाथि तत्काल कारवाही गर्ने बताउँदै उनले उच्च मनोबलका साथ काम गर्न निर्देशन दिए ।

आसन्न निर्वाचनमा सशस्त्र प्रहरीले ३५ हजार जनशक्ति र मातहत रहने गरी ४० दिनको कार्यअवधि तोकेर १५ हजार ११० निर्वाचन प्रहरी खटाउँदै छ । कमाण्डको जिम्मेवारीमा खटिन लागेका सशस्त्र प्रहरी अधिकृतहरूलाई पदिय जिम्मेवारीमा रही कार्यक्षेत्रमा खटिँदा बदमासी र नराम्रो काम गरेमा तत्कालै कारवाही गर्ने चेतावनी पनि उनले दिए । निर्वाचन सफल बनाउन मातहत कर्मचारीहरूलाई निर्वाचन आचारसंहिताको पूर्ण रूपमा पालना गरी परिचालित हुन पनि उनको निर्देशन छ ।