काठमाडौँ — नेकपा एमालेले चर्चामा रहेका सबै भ्रष्टाचार प्रकरणको अनुसन्धान सुरु गर्न आग्रह गरेको छ। बिहीबार सम्पन्न ११औँ राष्ट्रिय महाधिवेशनले चर्चामा रहेका सबै भ्रष्टाचार प्रकरणको अनुसन्धान सुरु गर्न आह्वान गर्ने प्रस्ताव पारित गरेको हो।

प्रस्तावबारे जानकारी गराउँदै केन्द्रीय सदस्य प्रदीप ज्ञवालीले महाधिवेशनले विगतमा राज्यका उच्च राजनीतिक तथा प्रशासनिक ओहोदामा रहेका व्यक्तिहरूको सम्पत्ति छानबिन गर्न माग गरेको बताए। उनले दोषी देखिएकाहरूलाई कानुन बमोजिम कारबाही गर्न आग्रह गर्दै राज्यका अख्तियारप्राप्त निकायले यस विषयमा आवश्यक निर्णय गर्न पनि आग्रह गरे।

उनले एमाले सधैँ सुशासन, पारदर्शिता र स्वच्छताका पक्षमा उभिँदै आएको भन्दै प्रश्न उठ्नासाथ सार्वजनिक ओहोदाबाट राजीनामा दिएर राज्यका अख्तियारप्राप्त निकायलाई सहयोग गर्ने र अभियोजन हुनासाथ कानुनबाट सफाइ नपाउँदासम्म पार्टी जिम्मेवारीबाट मुक्त गर्ने पार्टी परम्परा रहेको पनि बताए ।उनले भने, ‘राज्यका अख्तियारप्राप्त निकायले यस विषयमा आवश्यक निर्णय गरून्।’