काठमाडौँ — जारी एमाले महाधिवेशनमा उपमहासचिव पदका उम्मेदवार योगेश भट्टराइले नेताको निवास र काठमाडौँबाट पार्टीलाई जनतातिर फर्काउने काम महाधिवेशनले गर्ने बताएका छन्। महाधिवेशनस्थलमा सञ्चारकर्मीहरूसँग कुरा गर्दै उनले भने, 'पार्टी र जनताबीच खाडल बढ्दै गयो भने भदौ २३ र २४ का जस्ता घटना हुन्छन्।'

उनले महाधिवेशनले एमालेले पार्टीभित्रको तिक्तता हटाउने विश्वास पनि व्यक्त गरे। उनले जेन-जी विद्रोहपछि पार्टीले नयाँ विचार प्रवाह गर्न खोजेको भन्दै यो भदौ २३ र २४ गतेपछिको परिस्थितिका कारण भएको बताए। उनले भने, 'फरक परिस्थितिका कारण यो महाधिवेशन भएको हो । यसले हाम्रा राम्रा र नराम्रा कुराहरू केलाउनेछ।'

भट्टराइले जनतामा दलप्रतिको गुम्दै गएको विश्वास फेरी पुनःजागृत गर्नुपर्ने बेला आएको बताउँदै तीनै ठूला दलमा नयाँ नेतृत्व आवश्यक रहेको संदेश महाधिवेशनले दिनुपर्ने बताए। उनले महाधिवेशनले नेकपा एमालेको आन्तरिक लोकतन्त्रलाई बलियो बनाउने र नेतृत्व हस्तान्तरणको सहज व्यवस्था गर्ने पनि बताए।