'विचारको नेतृत्व गर्ने पत्रकारिताका संस्था कन्टेन्ट क्रिएसनमा मात्र लागेर असफल हुँदै गएका छन् ।'
What you should know
काठमाडौँ — बाह्रखरी अनलाइनका प्रधानसम्पादक प्रतीक प्रधानले भिजिटरको भिडको पछाडि लागेर पत्रकारिता फेल हुँदै गएको बताएका छन् ।
कान्तिपुर कन्क्लेभ २०२६ को दोस्रो दिन 'संवादको चौतारी : अल्गोरिदमको उल्झन' विषयक प्यानलमा बोल्दै उनले पत्रकारिताले भिडको पछाडि कुद्नेभन्दा पनि जनताको आवाज मुखरित गर्न सक्नुपर्ने बताए । ‘अल्गोरिदमले मिडियामा पनि परिवर्तन भएर आएको छ । प्रिन्ट, रेडियो, टेलिभिजन, अनलाइन हुँदै पत्रकारिता अघि बढेको छ,’ उनले भने, ‘पत्रकारिता जनताको आवाज मुखरित गर्ने थियो । अभिव्यक्ति स्वतन्त्रताको माध्यम पत्रकारिता हो ।’
तर पछिल्लो समय विचारको नेतृत्व गर्ने पत्रकारिताका संस्था कन्टेन्ट क्रिएसनमा मात्र लागेर असफल हुँदै गएको प्रधानसम्पादक प्रधानले औंल्याए । ‘संसारभरिको पत्रकारिता कन्टेन्ट क्रिएसन जस्तो मात्र भएको छ । यो पेसामा जिम्मेवारी धेरै छ,’ उनले थपे, ‘समाजले खोजेका विषय दिनुपर्छ । समाजलाई कस्ता सामग्री दिने र कस्ता सामग्री नदिने प्रष्ट हुनुपर्छ । विचारको नेतृत्वको गर्ने संस्था पत्रकारिता हुनुपर्छ ।’
भिडको पछाडि लागेर पत्रकारिता फेल भएको उनले जनाए । ‘हिजो जनतामा समाचार पस्कियो । त्यसको प्रतिक्रिया बुझेर अघि बढ्दै आएको थियो । आज अल्गोरिदममा फसेको छ । जेजे देख्यो त्यसैलाई समाचार बनाइदिने हो ?' उनले प्रश्न गरे ।
यसरी नै अघि बढे पत्रकारिता पेसा र व्यवसाय समाप्त हुने उनले जनाए । ‘मिडिया फस्दै गएको छ । कस्ता विषयवस्तु नागरिकलाई दिने बोर्डर लाइन बनाउनुपर्छ । मिडिया भनेको के हो प्रष्ट हुनुपर्छ । प्रेस स्वतन्त्रता हुनुपर्छ । पत्रकारिताले गर्ने समाज परिवर्तन हो,’ उनले भने । जथाभावी विषयवस्तु पस्कँदा पत्रकारिता कमजोर हुँदै गएको उनले बताए ।
