काठमाडौँ — राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौं महानगरपालिकाका मेयर बालेन्द्र (बालेन) शाहबीच आगामी निर्वाचनमा मिलेर जानेबारे छलफल भएको छ ।

रास्वपाका पूर्वसांसद असिम शाहको कमलपोखरीस्थित निवासमा सोमबार साँझ ७ बजेदेखि सुरु भएको छलफल मंगलबार बिहान साढे १ बजेसम्म चलेको थियो । 

छलफलका क्रममा आगामी फागुन २१ मा तोकिएको प्रतिनिधिसभा निर्वाचनमा एक भएर कसरी जाने भन्ने विषय प्रमुख थियो । छलफलमा रवि, बालेन, रास्वपा उपसभापति डीपी अर्याल, असिम शाह, आसिफ शाह, कुमार बेन, निश्चल बस्नेतलगायतको सहभागिता थियो । 

रास्वपा नेता शाहका अनुसार दुवैबीच सौहार्दपूर्ण वातावरणमा छलफल भएको थियो । मुलुकको वर्तमान अवस्थालाई परिवर्तन गर्नका निम्ति र राजनीतिक समस्याको निकास दिने सम्बन्धमा केन्द्रित कुराकानी भएको थियो । 'हामी दाजुभाइ भयौं, छौं । एकअर्कासँग मिलेर राजनीतिक यात्रा तय गर्छौं, मिलेर जान्छौं । देशको अवस्था बुझेका छौं । वैकल्पिक शक्तिलाई नेपाली राजनीतिको मूलधार बनाउनुपर्छ भन्ने एजेन्डा अगाडि बढेको छ,' रास्वपा नेता शाहले भने । 

भेटमा विभिन्न राजनीतिक विषयमा रवि र बालेनबीच एक्ला-एक्लै र सामूहिक छलफल भएको थियो । 'अब एक ठाउँमा आएर देशको लागि निकास खोज्नुपर्छ भन्नेबारे छलफल भयो । त्यो बैठक आइसब्रेक हो । दुईजना मिलेर जाने भन्ने कुरामा सैद्धान्तिक सहमति भयो । बाँकी कुरा गौण हो भन्ने कुरा भयो,' भेटबारे शाहले भने । 

रवि र बालेनबीच यसअघि यसरी लामो समय राजनीतिक संवाद गर्नेगरी भेट नभएको शाहले बताए । यसअघि लामिछाने गृहमन्त्री भएको बेला भने शाह गृह मन्त्रालय पुगेका थिए । आगामी दिनमा राजनीतिक संवाद अगाडि बढाउने समझदारी भएको शाहको भनाइ छ ।