बारा — बाराका प्रमुख जिल्ला अधिकारी धर्मेन्द्रकुमार  मिश्रले सिमरामा प्रदर्शनमा उत्रिएका जेन–जी युवाहरूलाई  वार्तामा बोलाएका छन् । जिल्ला सुरक्षा समितिको बैठक बसेर उनीहरूलाई वार्ताका लागि जिल्ला प्रशासन कार्यालय कलैयामा बोलाइएको सहायक प्रमुख जिल्ला अधिकारी छविरमण भट्टराईले बताए ।

'उहाँहरू आउने तयारीमा हुनुहुन्छ,' उनले भने,  'जिल्लाका सबै सुरक्षा प्रशासनका तर्फबाट उहाँहरूसित सम्पर्क भइरहेको छ । कहीँ कतै कुनै रूपमा कुनै प्रकारले क्षति नहोस् भनेर हामी सावधानीपूर्वक संवेदनशील भएर समन्वय गर्दैछौं ।' 

जेन-जी समूहका जिल्ला संयोजक सम्राट उपाध्याय आफूहरूमाथि कुटपिट गर्नेहरूलाई पक्राउ गरेपछि मात्र वार्ता हुने बताउँछन् । 'हाम्रो विरोध प्रदर्शन र वार्ता सँगसँगै हुन्छ,' उपाध्यायले भने, 'किटानी जाहेरीअनुसार ६ जनालाई पक्राउ गरी कारबाही नगरेसम्म विरोध र प्रदर्शन जारी रहन्छ ।'

जिल्ला प्रहरी कार्यालयले भने घटनामा संलग्न २ जनालाई पक्राउ गरिसकेको जनाएको छ । जिप्रकाले विज्ञप्ति सार्वजिनक गरेर पक्राउ परेका दुवैमाथि अनुसन्धान सुरु भइसकेको जनाएको छ ।

संयोजक उपाध्यायले किटानी जाहेरी दिएअनुसार एमालेबाट निर्वाचित वडा नम्बर २ का अध्यक्ष धनबहादुर श्रेष्ठ र वडा नम्बर ६ का कैमुद्दीन अन्सारीलाई प्रहरीले पक्राउ गरेको छ । घटनामा संलग्न सबैलाई पक्राउ गर्न माग गर्दै जेन-जी समूहले बिहीबार पनि बिहान १० बजेपछि प्रदर्शन गर्न थालेपछि प्रशासनले फेरि पौने १ बजेदेखि राति ८ बजेसम्मका लागि कर्फ्यु आदेश जारी गरेको छ ।