बर्दिया — भारतको उत्तराखण्डको पौडीगढवालस्थित सिन्धुखोला नजिक बाकुडामा पहिरोमा परी बेपत्ता भएकामध्ये शनिबार भेटिएको हात बर्दियाको मधुवन नगरपालिका-६ का ३९ वर्षीय नरेन्द्र खड्काको रहेको पहिचान भएको छ। तर यसबारे प्रहरीले भने पुष्टि गरेको छैन।

बाढी पहिरोमा परी ५ जना बेपत्ता रहेकामध्ये शनिबार पहिरो पन्छाएर खोजी गर्ने क्रममा भेटिएको हात खड्काको भएको पहिचान भएको हो। हातमा लेखिएको नाम र 'टाटु'का आधारमा परिवारले उनको पहिचान गरेका हुन्।

पौडी गढवालस्थित बाकुडामा रहेका बर्दियाको मधुवनका चित्रबहादुर पौडेलले बेपत्ता भएकामध्ये मधुवन नगरपालिका–६ गाउँ नम्बर ४ का ३९ वर्षीय नरेन्द्र खड्काको हात फेला परेको बताए। छोरा, बुहारी र नातिको खोजीमा आएका नरेन्द्रका बुबा चुडामणिले हातमा लेखिएको टाटुका आधारमा नरेन्द्रको पहिचान गरेका हुन्।

दिल्लीस्थित नेपाली दूतावासका एसएसपी प्रकाश मल्लले भारतीय प्रहरीले पुष्टाइँ नगरेसम्म खड्काको हात भएको भन्न नमिल्ने बताए । चुडामणिका भाई उद्दव खड्काले दाई आज रातिसम्म घर आई पुग्ने बताए । भतिजाको हातमा टाटु र नाम लेखिएकोले पहिचान भएको जानकारी आएको उनले बताए।

बाढी र पहिरोमा परी बेपत्ताहरूको खोजीकालागि पाँच दिनदेखि खोजी कार्यमा करिब ४५ जना नेपाली खटिएका छन्। पहिरोमा परी बर्दियाका ५ जना बेपत्ता भएका थिए । त्यसमध्ये मधुवन नगरपालिका–६ का ३९ वर्षीय नरेन्द्र खड्का,  उनकी श्रीमती ३० वर्षीया सरस्वतीसंगै २ वर्षीया छोरा रोमनलाई समेत साथै लिएर मजदुरी गर्न भारत गएका थिए।

सरस्वती र रोमनको अवस्था भने अझै अज्ञात छ । त्यस्तै, सोही पालिका–५ गाउॅ नम्बर ८ का ४५ वर्षीय रामु परियारका श्रीमती अमृता पनि बेपत्ता रहेकी छन्। उनकी छोरी २१ वर्षीय लक्ष्मी गम्भीर घाइते छिन्।