काठमाडौँ — सरकारले सञ्चार र निगरानी क्षमता बढाउन आफ्नै भूउपग्रह सञ्चालनको आधार तयार गर्ने तयारी सार्वजनिक गरेको छ। संघीय संसद्मा शुक्रबार आगामी आर्थिक वर्ष २०८२/८३ का लागि नीति तथा कार्यक्रम प्रस्तुत गर्दै राष्ट्रपति रामचन्द्र पौडेलले भूउपग्रहसम्बन्धी योजना सुनाएका हुन्।

राष्ट्रपति पौडेलले वाचन गरेको नीति तथा कार्यक्रममा भनिएको छ, ‘सञ्चार र निगरानी क्षमतामा वृद्धि गर्न नेपालको आफ्नै भूउपग्रह सञ्चालनको आधार तयार गरिनेछ।’

सूचना प्रविधि र सञ्चारका विविध पक्ष समेटिएको नीति तथा कार्यक्रममा साइबर सुरक्षालाई पनि प्राथमिकता दिइएको छ। राष्ट्रपति पौडेलले संवेदनशील सूचना प्रविधि पूर्वाधारको सुरक्षा तथा निरन्तरता सुनिश्चित गर्दै सुरक्षित साइबर स्पेस निर्माण गरिने योजना गरिएको बताए।

त्यस्तै, दूरसञ्चार क्षेत्रमा नवीनतम प्रविधिको प्रयोग र पूर्वाधार व्यवस्थापनमार्फत देशव्यापी गुणस्तरीय सेवा विस्तार गर्ने नीति पनि अघि सारिएको छ।