काठमाडौँ — भारतबाट १६ घण्टा आयात हुँदै आएको बिजुली अब १५ घण्टामात्रै, विश्व मजदुर दिवस : महँगीको मारमा श्रमिक समुदाय, बबी सिंह यादवले पड्काएको पेस्तोल सर्लाहीबाट बरामददेखि पाकिस्तानी विमानका लागि भारतीय हवाई क्षेत्र बन्दसम्मका खबर आज चर्चामा रहे । 

000

भारतबाट बिजुली आयातको समय एक घण्टा घटेको छ। यसअघि १६ घण्टा आयात हुँदै आएकोमा शुक्रबारदेखि १५ घण्टा मात्रै आयात हुने नेपाल विद्युत् प्राधिकरणले जनाएको छ । शुक्रबारदेखि बिहान ६ बजेदेखि साँझ ५ बजेसम्म (सोलार आवर) र राति २ बजेदेखि बिहान ६ बजेसम्म बिजुली आयात गर्न पाइने प्राधिकरणले जनाएको छ । भारतले ४ सय केभी ढल्केबर–मुजफ्फरपुर लाइनबाट ६ सय मेगावाट बिजुली दैनिक १५ घण्टा आयात गर्ने अनुमति दिएको हो । 

000

काठमाडौंका विभिन्न ठाउँमा बिहानको झिसमिसेदेखि बेलुका अबेरसम्म तीनपांग्रे टेम्पो कुदिरहन्छन् । बिहान ५ बजेदेखि बेलुका ९ बजेसम्म टेम्पो चलाएर आफू र आफ्नो परिवार धान्न प्रयत्नशील श्रमिकको कथा बेग्लै छ । तुलनात्मक रूपमा कम आम्दानी र सहरको महँगीमा च्यापिएर आफ्नो जीवन चलाउन बाध्य टेम्पो चालकको अधिकांश समय सडकमा नै बित्छ । उनीहरूको बिहान उज्यालो नहुँदैदेखि राति अबेरसम्मको समय मानिसलाई ओहोरदोहोर गराएर नै बित्छ ।

श्रमिक दिवस मनाइँदै [तस्बिरहरू] 

000

नेपालमा सञ्चालित सामाजिक सञ्जाल प्लाटफर्म दर्ता र सूचीकृत हुन सरकारले समयसीमा तोकिरहेको बेलामा डिजिटल अधिकार, अभिव्यक्ति स्वतन्त्रता र सूचना प्रवाहका पक्षमा क्रियाशील ३१ वटा नागरिक समाज संस्थाहरूले सरकार र सामाजिक सञ्जाल प्लाटफर्म दुवैलाई सन्तुलित जिम्मेवारी वहन गर्न आह्वान गरेका छन् ।