काठमाडौँ — जल तथा मौसम विज्ञान विभाग, मौसम पूर्वानुमान महाशाखाका अनुसार आज दिउँसो कोशी प्रदेशका केही ठाउँमा भारी वर्षाको सम्भावना रहेको छ । महाखाशाका अनुसार आज दिउँसो अन्य प्रदेशका केही ठाउँमा आंशिक बदली भए पनि धेरै ठाउँमा मौसम सफा रहनेछ ।

कोशी, वाग्मती प्रदेश र गण्डकी प्रदेशका थोरै स्थानहरूमा तथा बाँकी प्रदेशका एक-दुई स्थानमा मेघगर्जन/चट्याङसहित हल्कादेखि मध्यम वर्षाको सम्भावना रहेको महाशाखाको बिहान ६ बजेको बुलेटिनमा उल्लेख छ । 

अहिले भने कोशी र वाग्मती प्रदेशमा आंशिकदेखि साधारणतया बदली रही बाँकी भू-भागमा आंशिक बदलीदेखि मौसम मुख्यतया सफा रहेको  महाशाखाले जनाएको छ । कोशी प्रदेश र  वाग्मती प्रदेशका थोरै स्थानहरूमा मेघ गर्जन/चट्याङसहित हल्कादेखि मध्यम वर्षा भइरहेको छ । कोशी प्रदेशका केही ठाउँमा भारी वर्षाको सम्भावना रहेकाले  गेग्रान बहाव, बाढी, पहिरो, भू-क्षय जस्ता प्रकोपको जोखिम वा क्षतिबाट बच्न आवश्यक सतर्कता अपनाउन महाशाखाले आग्रह गरेको छ ।

यस्तो छ ३ दिनको मौसम पूर्वानुमान 

२०८१ असोज १८ गते (शुक्रबार)

दिउँसो ː कोशी, मधेश, वाग्मती र गण्डकी प्रदेशलगायत देशका पहाडी भू-भागमा आंशिक देखि साधारणतया बदली  रही बाँकी स्थानमा आंशिक बदलीदेखि मौसम मुख्यतया सफा रहने छ । कोशी, वाग्मती  र गण्डकी प्रदेशका थोरै स्थानहरूमा तथा बाँकी प्रदेशका एक-दुई स्थानमा मेघगर्जन/चट्याङसहित हल्कादेखि मध्यम वर्षाको सम्भावना रहेको छ । कोशी प्रदेशका एक- दुई स्थानमा भारी वर्षाको पनि सम्भावना  रहेको छ।