नारायणीको बाढीले नगरवनको झोलुङ्गे पुल बगायो
चितवन — नारायणी नदीमा आएको बाढीले गएराति नारायणगढ नगरवनको झोलुङ्गे पुल बगाएको छ । त्यसैगरी बाढी पस्ने खतरा भएका नदी किनारका बस्तीबाट ११२ जनालाई सुरक्षित स्थानमा सारेको चितवन जिल्ला प्रशासन कार्यालयले जनाएको छ । शनिबार साँझसम्म बढ्दो क्रममा रहेर खतराको तहभन्दा पनि एक दशमलव ४६ मिटरमाथि पुगेको नारायणीको जल सतह अहिले भने घट्दै गएको छ ।
भरतपुर महानगरपालिका-३ नगरवनको नारायणीको भंगालोमा बनेको झन्डै सय मिटर लामो झोलुङ्गे पुल शनिबार राति साढे ११ बजेतिर ढलेको हो । घरहरू नै भत्के जसरी ठूलो आवाज सुनेर हेर्न आउँदा पुल ढलेको देखेको नगरवननजिक घर भएका रघु तिमिल्सिनाले बताए । बाढी बढ्न थालेसँगै भरतपुर- ३ नगरवनमा नै रहेको हाम्रो घर नामक संस्थामा रहेका १९ पुरूष, पाँच महिला र दुईजना महिला कामदार गरी २६ जनालाई नजिकै रहेको सुरक्षित घरमा सारिएको चितवन जिल्ला प्रशासन कार्यालयले जनाएको छ ।
त्यसैगरी भरतपुर महानगरपालिका-१ ७ गोब्रेनीका १७ घरधुरीका ५४ जनालाई आफन्तका घरमा सारिएको छ । उक्त स्थानमा डुङ्गाबाट उद्धार कार्य भएको थियो । भरतपुर- ३ नगरवन क्षेत्रबाटै थप चार जनालाई पनि प्रशासनले आफन्तको घरमा सारेको छ । भरतपुर-१ देवघाट नारायणी नदी किनारमा रहेको कुटी र घरहरूबाट २८ जनालाई पनि सुरक्षित ठाउँमा सारिएको चितवन जिल्ला प्रशासन कार्यालयले जानकारी दिएको छ ।
नारायणी नदीको नारायणगढनजिक बाढी मापन केन्द्ररमा शनिबार साँझ सवा सात बजेतिर जल सतह १० दशमलव ४६ मिटर पुगेको थियो । जल सतह ९ मिटरभन्दा माथि गए खतराको तह पार हुन्छ । आइतबार बिहान जल सतह घटेको छ । जल तथा मौसम विज्ञान विभागका अनुसार आइतबार बिहान सवा सात बजे जल सतह ८ दशमलव ७ मिटर रहेको छ ।
