काठमाडौँ — सरकारले नागमती नदीमा बाँध निर्माण गर्ने घोषणा गरेको छ । अर्थमन्त्री वर्षमान पुनले मंगलबार संघीय संसद्को संयुक्त सदनमा पेस गरेको बजेटमा वाग्मती नदीको सहायक नदीमा बाँध निर्माण गर्ने जनाएका हुन् । 

'वाग्मतीको सहायक नदी नागमतीमा बाँध निर्माण गरी वर्षाको पानी सञ्चय गर्न जलस्रोत संरक्षण आयोजना अगाडि बढाइनेछ। जलस्रोतको संरक्षण र दिगो तथा बहुआयामिक उपयोग गर्न तालतलैया, पोखरी संरक्षण, जलाशययुक्त आयोजना निर्माण तथा पुनर्स्थापना कार्यक्रम सञ्चालन गरिनेछ,' अर्थमन्त्रीद्वारा प्रस्तुत बजेटमा उल्लेख छ । 

प्रस्तावित नागमती बाँधको लाभ न्यूनतम रहेको र काठमाडौं उपत्यकाका जनतालाई गम्भीर जोखिममा पार्ने भन्दै सरोकारवालाहरूले विरोध जनाउँदै आएका छन् ।  प्रतिसेकेन्ड ४ सय लिटर पानीको बहाव बढाउन निर्माण गर्ने भनिएको नागमती ड्याम शिवपुरी–नागार्जुन निकुञ्जको मध्यभागमा निर्माण हुने बताइएको छ । प्रस्तावित बाँध ९५ मिटर अग्लो हुने बताइएको छ ।