'सम्मानजनक हिस्सेदारी' पाए संघ सरकारमा सहभागी हुने
काठमाडौँ — जनमत पार्टीले नयाँ सत्ता गठबन्धनभित्र मधेश प्रदेश सरकारका विषयमा ठोस निर्णय हुनुपर्ने बताएको छ । सोमबार बसेको सचिवालय बैठकमा जनमतले मधेशमा जनता समाजवादी पार्टीकै नेतृत्वमा फेरि सरकारमा सहभागी नहुने निर्णय गरेको पार्टीका सचिव बीपी साहले बताए ।
मधेशमा जनमत र जसपाबीच भुईंतहसम्म मनमुटाव रहेको देखिन्छ । कृषि विश्वविद्यालयको शिलान्यास कार्यक्रममा झडपै भएपछि सरकारमा सहभागी जनमत पार्टीले आफ्ना दुई मन्त्रीलाई फिर्ता बोलाएर समर्थनसमेत फिर्ता लिएको थियो ।
त्यस्तै यसअघि पनि आलोपालो मधेश सरकारको नेतृत्व गर्ने सहमति भए पनि लागू नभएको जनमतको ठहर छ । सचिव साह भन्छन्, 'मधेश प्रदेश सरकारको विषयमा ठोस निर्णय हुनुपर्छ। जसपाकै नेतृत्वमा सहभागी हुँदैनौँ । यसअघि पनि आलोपालोको सहमति भएको थियो, लागू भएन। अहिले मुख्यमन्त्रीबारे प्रस्ट हुनुपर्छ ।'
त्यस्तै संघ सरकारमा सम्मानजनक हिस्सेदारी भएको अवस्थामा सरकारमा जानेबारे निर्णय गरिने पनि सचिव साह बताउँछन् । 'आजको बैठकले गठबन्धनको हामीप्रतिको धारणा आएपछि मात्रै कुनै निर्णयमा पुग्छौँ,' साहले भने । अहिले प्रधानमन्त्री निवास बालुवाटारमा नयाँ गठबन्धनको बैठक बसिरहेको छ ।
