अर्थमन्त्रीमाथि छानबिन गर्न ११ सदस्यीय संसदीय समिति गठन हुने

समितिमा ११ सांसद रहने समझदारी बनेको संसद् सचिवालय स्रोतले जानकारी दियो । जसमा ४ सांसद एमालेका, २- २ सांसद कांग्रेस र माओवादी केन्द्रका तथा एकीकृत समाजवादी, जसपा र लोसपाबाट १-१ सांसद सदस्य रहने छन् ।

सभामुख अग्निप्रसाद सापकोटाले एमाले, कांग्रेस, माओवादी, एकीकृत समाजवादीलगायत राजनीतिक दलका सचेतकहरूसँग छलफल गरेपछि संसदीय छानबिन समिति गठन गर्न लागिएको हो । संसदीय छानबिन समितिमा बस्ने सांसदहरूको नाम राजनीतिक दलका सचेतकहरूले सभामुखलाई बुझाउन लागेका छन् ।

प्रतिनिधिसभा बैठक बुधबार ११ बजे बोलाइएको थियो । तर, दलहरूबीच सहमति हुन नसक्दा पौने ४ बजेसम्म पनि बैठक बस्न सकेको छैन ।दलहरूले समितिमा रहने सदस्यहरूको नाम बुझाएपछि प्रतिनिधिसभा बैठक बसेर सभामुख सापकोटाले ती नाम पढेर सुनाउनेछन् ।

बजेटमा करका दर हेरफेर गर्नेक्रममा जेठ १४ गते अर्थमन्त्री शर्माले अनधिकृत तथा व्यापारीका प्रतिनिधि राखेको आरोप लागेको छ । सोही विषयलाई लिएर संसद् र सडकमा प्रमुख प्रतिपक्षी एमालेले आवाज उठाएको थियो । उक्त दिनको सीसीटीभी फुटेज डिलिट गरिएको भन्ने सूचना आएपछि कांग्रेसका सांसदहरूले पनि अर्थमन्त्रीले राजीनामा दिनुपर्ने र छानबिन हुनुपर्ने माग गरेका थिए ।