वालेन्द्रलाई बधाई दिँदै सिंहले भनिन् : महानगरवासीको भावना बमोजिम काम गर्न साथ रहनेछ- समाचार - कान्तिपुर समाचार

वालेन्द्रलाई बधाई दिँदै सिंहले भनिन् : महानगरवासीको भावना बमोजिम काम गर्न साथ रहनेछ

'मत जित्न सकिनँ तर नगरवासीको मन जित्न सकेँ'
कान्तिपुर संवाददाता

काठमाडौँ — काठमाडौं महानगरपालिकाको मेयरमा सत्तारुढ गठबन्धनबाट कांग्रेसकी उम्मेदवार बनेकी सिर्जना सिंहले मेयरमा विजयी वालेन्द्र साह र जनप्रतिनिधिहरूलाई बधाई दिएकी छन् । उनले कार्यकालभरी मेयर साहसहित जनप्रतिनिधिलाई आफ्नो रचनात्मक सहयोग र साथ रहने प्रतिवद्धता व्यक्त गरेकी छन् । 

सिंहले भनेकी छन्, 'काठमाडौं महानगर प्रमुखमा निर्वाचित वालेन्द्र साहलाई हार्दिक बधाई ज्ञापन गर्दै सफल कार्यकालका लागि शुभकामना व्यक्त गर्दछु l साथै उपप्रमुख, वडाध्यक्ष र सदस्यमा निर्वाचित सबै आदरणीय व्यक्तित्वमा बधाई ज्ञापन गर्दै महानगरवासीको भावना बमोजिम कार्य गर्न पूर्ण कार्यकालभरी मेरो रचनात्मक सहयोग र साथ रहने प्रतिबद्धता समेत व्यक्त गर्दछु l'

सिंहले महानगरवासीको मन जित्न सकेको तर मत जित्न नसकेको भन्दै हार स्वीकार गरेकी छन् । 'वैशाख ३० गते सम्पन्न स्थानीय तहको निर्वाचनमा काठमाडौं महानगरपालिकाको प्रमुख पदमा नेपाली कांग्रेसको उम्मेदवारका रूपमा मलाई नगरवासीले दिनुभएको अपार माया, हौसला र समर्थनप्रति म हृदयदेखि आभार प्रकट गर्दछु,' उनले भनेकी छन्, 'विजयी हुने गरी निश्चय नै मत जित्न सकिनँ तर नगरवासी आमाबुबा, दिदीबहिनी, दाजुभाइको मन जित्न सकेँ l अतः लोकतान्त्रिक अभ्यासको यो परिणामलाई म हार्दिकतापूर्वक स्वीकार र आत्मसात गर्दछु l'

उनले आफू राजनीतिमा निरन्तर लागिरहने पनि बताएकी छन् ।

काठमाडौं महानगरको मेयरमा उनी पराजित भएकी थिइन् । मेयरमा स्वतन्त्र उम्मेदवार साह ६१ हजार ७ सय ६७ मत ल्याई विजयी भएका थिए । कांग्रेसकी सिंहले ३८ हजार ३ सय ४१ मत ल्याएकी थिइन् । एमालेका केशव स्थापित तेस्रो भएका थिए । उपमेयरमा एमालेकी सुनिता डंगोल ६८ हजार ६ सय १२ मतसहित विजयी भएकी थिइन् ।

प्रकाशित : जेष्ठ १३, २०७९ १२:४१
प्रतिक्रिया
पठाउनुहोस्

ब्याजदर बढ्ने संकेत 

कान्तिपुर संवाददाता

काठमाडौँ — बैंक तथा वित्तीय संस्थाको ब्याजदर पुन: बढ्ने भएको छ । राष्ट्र बैंकले शुक्रबार सार्वजनिक गरेको मौद्रिक नीतिको तेस्रो त्रैमासिक समीक्षामार्फत राष्ट्र बैंकले यस्तो संकेत गरेको हो । तीन महिना अघि दोस्रो त्रैमासिक समीक्षामार्फत नीतिगत ब्याजदर (बैंक तथा वित्तीय संस्थाले राष्ट्र बैंकबाट ऋण लिँदा तिर्नु पर्ने ब्याजदर) २ प्रतिशत बिन्दुले बढाएको थियो । राष्ट्र बैंकले पुन: क्षेत्रगत रुपमा ब्याजदर वृद्धिको संकेत गरेको छ। 

तेस्रो त्रैमासिक समीक्षामा थोक रुपमा सबै क्षेत्रको ब्याजदर वृद्धि नगरेर क्षेत्रगत आधारमा (अनुत्पादक र कम उत्पादनशील) क्षेत्रमा ब्याजदर वृद्धि गर्ने संकेत गरेको हो । ‘आन्तरिक तथा बाह्य क्षेत्रमा विद्यमान दबाब कम गरी समष्टिगत आर्थिक स्थायित्व कायम गर्न ब्याजदरका साथै अन्य छनौटपूर्ण उपकरणहरु प्रयोग गरिनेछ,’ मौद्रिक नीतिको समीक्षामा भनिएको छ ।

मौद्रिक नीतिको तेस्रो समीक्षामार्फत विद्यमान अनिवार्य नगद अनुपात, वैधानिक तरलता अनुपात, बैंक दर र पुनर्कर्जा दरहरुलाई यथावत राखिएको राष्ट्र बैंकले जनाएको छ । यस्तै मूल्य तथा बाह्य क्षेत्र स्थायित्वलाई मध्यनजर गरी उत्पादनशील क्षेत्र, लघु, साना तथा मझौला व्यवसाय, आन्तरिक उत्पादन अभिवृद्धि तथा निर्यात प्रवर्द्धन लगायतका क्षेत्रमा वित्तीय साधनको प्रवाह बढाउन जोड दिइने पनि राष्ट्र बैंकले जनाएको छ ।

‘मूल्य र बाह्य क्षेत्र स्थायित्वमा देखापरेको दबाब यथावत रहेकाले मौद्रिक नीतिको अर्धवार्षिक समीक्षामा लिइएको कार्यदिशालाई निरन्तरता दिइएको छ,’ मौद्रिक नीतिमा भनिएको छ, ‘तर, मुद्रास्फिति तथा विदेशी विनिमय सञ्चितिको आयात धान्ने क्षमतामा दबाब पर्दै गएमा मौद्रिक नीतिको कार्यदिशालाई थप कसिलो बनाउँदै लगिनेछ ।’ यस्तै कोभिड संक्रमणका कारण प्रभावित उद्योग व्यवसायको पुनरुत्थानका लागि प्रदान गरिँदै आएको पुनर्कर्जा सुविधा पुनरुत्थान हुन बाँकी रहेका अति प्रभावित क्षेत्रमा सीमित गर्दै लैजाने विद्यमान नीतिलाई निरन्तरता दिइएको छ ।

प्रकाशित : जेष्ठ १३, २०७९ १२:४०
पूरा पढ्नुहोस्
प्रतिक्रिया
पठाउनुहोस्
×