काठमाडौँ — स्थानीय तह निर्वाचनका लागि लिएका निर्णयमा सरोकारवाला कसैलाई पनि चित्त नबुझेको भए कुरा राख्न पाउने निर्वाचन आयोगले जनाएको छ । निर्वाचन आयोगका प्रवक्ता शालिग्राम शर्मा पौडेलले आयोगका निर्णयमा कसैलाई चित्त नबुझेको भनेर कुरा आए आयोगले त्यसको जवाफ दिने बताए । 

निर्वाचन आयोगको नियमित पत्रकार सम्मेलनमा सोमबार आयोगका प्रवक्ता पौडेलले राजनीतिक दलहरूसँग नियमित छलफल गरेरै निर्णय भइरहेको र त्यसमा पनि चित्त नबुझेमा जवाफ दिन आयोग तयार रहेको बताए । आयोगले गरेका निर्णयहरूमा प्रमुख प्रतिपक्षसहित अन्य साना दलहरूले पनि बेला बेलामा विरोध गरिरहेको अवस्थामा संवादका कार्यक्रम आयोजना गरिएका छन् ? भन्ने कान्तिपुरको प्रश्नमा आयोगका प्रवक्ता पौडेलले जवाफ दिए, 'आयोगलाई धेरै विरोध भएको जस्तो लागेको छैन । एक दुईवटा इस्यू आएका होलान्; त्यसमा आयोगले समय समयमा राजनीतिक दलहरूसँग छलफल गरिराखेकै छ । यहाँहरूले पनि त्यसलाई प्रशारण गरिरहनुभएको छ । केही कुराहरू द्विविधा उत्पन्न भएको छ अथवा चित्त बुझेको छैन भने आयोगसँग सम्बन्धित सरोकारवालाहरूले पनि त्यसको बारेमा जिज्ञासा राख्न सक्नुहुन्छ । त्यसको जवाफ दिन आयोग तयार छ ।'

निर्वाचनसँग सम्बन्धित निर्णय गर्दा सरोकारवालाहरूसँग परामर्श भइरहेको प्रवक्ता पौडेलको भनाइ थियो । उनले राजनीतिक दलहरूसँग नियमित रूपमा आगामी दिनमा पनि संवाद गर्ने जानकारी दिए ।