काठमाडौँ — पाँच दलीय गठबन्धनले राष्ट्रिय सभा चुनावमा संयुक्त रुपमा अघि सारिएका उम्मेदवारहरुलाई विजयी गराउन अपिल गरेको छ ।
प्रधानमन्त्री एवं कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, एकीकृत समाजवादीका अध्यक्ष माधवकुमार नेपाल, जनता समाजवादीका अध्यक्ष उपेन्द्र यादव र राष्ट्रिय जनमोर्चाकी नेतृ दुर्गा पौडेलले आइतबार विज्ञप्ति जारी गर्दै माघ १२ गते हुने निर्वाचनमा साझा उम्मेदवारहरुलाई विजयी गराएर गठबन्धनलाई अझ मजबुत बनाउन आग्रह गरेका हुन् ।
'यही माघ १२ गते हुन लागेको राष्ट्रिय सभाको निर्वाचनमा पाँच दलीय गठबन्धनबाट संयुक्त रुपमा अघि सारिएका उम्मेदवारहरुलाई विजयी गराएर गठबन्धनलाई अझ मजबुत तुल्याउन र लोकतन्त्र तथा संविधानको सुरक्षा एवं राजनीतिक स्थायित्व सुनिश्चित गर्न हामी हार्दिक अपिल गर्दछौं,' जारी गरिएको विज्ञप्तिमा भनिएको छ ।
बुधबार १९ पदका लागि चुनाव हुँदैछ । राष्ट्रिय सभा सदस्यको निर्वाचनमा गाउँपालिका र नगरपालिकाका प्रमुख–उपप्रमुख तथा प्रदेशसभा सदस्यले मतदान गर्न पाउँछन् ।
