काठमाडौँ — माओवादी केन्द्रले वर्ग वा समुदायको जनसंख्यालाई मुख्य आधार मानेर केन्द्रीय समितिलाई समावेशी बनाउने भएको छ । केन्द्रीय समितिमा १५ प्रतिशत सदस्य दलित समुदायबाट, ५ प्रतिशत मुस्लिम समुदायबाट र सबै पार्टी समितिमा ४० वर्ष मुनिका युवा कम्तीमा २० प्रतिशत समावेश गर्ने तयारी छ ।

केन्द्रीय समितिमा ३५ प्रतिशत महिला चुन्न लागिएको छ । यसैविषयमा केन्द्रीत भएर माओवादी केन्द्रीय सदस्य उर्मिला अर्यालसँग गरिएको कुराकानीः

विधान संशोधनमा तपाईंहरूको माग के छ ? 

 केन्द्रीय समितिमा ३५ प्रतिशत महिला भनेको छ । महिला संघको इन्चार्ज र अध्यक्षका तर्फबाट केन्द्रीय समितिमात्रै होइन कि पदाधिकारी, स्थायी समिति र पोलिटब्युरोमा पनि ३५ प्रतिशत महिला हुनुपर्छ भनेर लिखित रूपमा माग गरेका छौं । 

नेताहरूले के भनेका छन् त ? 

 पदाधिकारी समावेशी बनाउने भनेर विधानमा भनिएको छ । त्यहीअनुसार समावेश हुन्छ भन्ने छ । पदाधिकारीमा एक जना त पक्कै पर्नुहुन्छ । त्यसबाहेक अरू कति हुन्छ भन्न सक्ने अवस्था छैन । स्थायी र पोलिटब्युरोमा धेरै सम्भावना छ । 

तपाईंहरूले यो–यो पदमा हाम्रो दाबी छ भन्न किन नसक्नुभएको ?

 यहाँ भोटिङ भइदिए पो दाबी गर्नु ? भोटिङ हुँदैन । त्यहाँ कोटरीबाट जे नाम आउँछ, त्यसैमा सबैले ताली पिटे भने चुप लागेर बस्नुबाहेक अरू के गर्न सकिन्छ र ?

तपाईंहरूको माग चुनाव हुनुपर्छ भन्ने हो ?

हामीले नीतिगत रूपले आफ्ना कुरा राख्यौं । महाधिवेशनमा पेस भएको विधान मस्यौदामा केन्द्रीय समितिमा ३५ प्रतिशतको प्रस्ताव आएको छ । पदाधिकारीलगायत अन्य समितिमा के हुन्छ हेरौं न π तैपनि अध्यक्षलाई भेटेर फेरि कुरा राख्छौं । पदाधिकारीसहित सबै समितिमा ३५ प्रतिशत ल्याउनुभयो भने राम्रै हुन्छ ।