‘भोटिङ मेसिन’ प्रयोग गर्न देउवा सकारात्मक- समाचार - कान्तिपुर समाचार
कान्तिपुर वेबसाईट
AdvertisementAdvertisement

‘भोटिङ मेसिन’ प्रयोग गर्न देउवा सकारात्मक

कान्तिपुर संवाददाता

काठमाडौँ — कांग्रेस महाधिवेशनमा पनि विद्युतीय भोटिङ मेसिन प्रयोग गर्न केन्द्रीय निर्वाचन समितिले प्रस्ताव गरेको छ । महाधिवेशनको तयारीका विषयमा छलफल गर्न सोमबार सभापति एवं प्रधानमन्त्री शेरबहादुर देउवाले बैठक बोलाएका थिए । बैठकमा महाधिवेशन तयारी तथा व्यवस्थापनका लागि गठन भएका समितिका संयोजकसहित नेताहरू सहभागी थिए । 

छलफलका क्रममा केन्द्रीय निर्वाचन समितिका संयोजक गोपालकृष्ण घिमिरेले मतगणनाका लागि धेरै समय लाग्ने भन्दै विद्युतीय भोटिङ मेसिन गर्ने प्रस्ताव गरेका थिए । त्यसमा अन्य समितिका संयोजक र नेताहरूले पनि समर्थन गरेका थिए ।

जवाफमा देउवाले त्यसबारे आफु सकारात्मक रहेको भनेका थिए । ‘ठीकै छ । यसमा म सकारात्मक छु । यसबारे फेरि छलफल गरौंला,’ देउवाले भनेका थिए ।

बैठकपछि एक नेताले पदाधिकारीबाहेक सदस्यहरूका हकमा भने भोटिङ मेसिन गर्ने गरी छलफल अघि बढेको जानकारी दिए । ‘पदाधिकारीको चुनाव कागजमै गर्ने र अन्य सदस्यहरूको हकमा भोटिङ मेसिन प्रयोग गर्ने विषयमा छलफल अघि बढेको छ, यसबारे पदाधिकारी र पूर्वपदाधिकारीहरूको बैठकले निर्णय लिन्छ,’ ती नेताले भने ।

प्रवक्ता विश्वप्रकाश शर्माले विद्युतीय भोटिङका विषयमा सभापति देउवाले पदाधिकारी बैठकमा छलफल गरेर निर्णय लिने बताएका छन् ।

यसअघि कांग्रेसकै प्रचार विभागले डिजिटल भोटिङको प्रविधि सुनिश्चित गरेर पदाधिकारी बैठकमा छलफलका लागि विषय उठान गरेपनि नेताहरूले त्यसबारे शंका व्यक्त गर्दै कागजी मतदाननै गर्नुपर्ने भनेका थिए ।

तर, हालै नेकपा एमाले र राष्ट्रिय प्रजातन्त्र पार्टीले समेत विद्युतीय भोटिङ मेसिन प्रयोग गरेर महाधिवेशन गरेपछि कांग्रेसलाई त्यसले पनि दबाब परेको हो ।

‘पदाधिकारीकै मतगणना गर्न समय लाग्छ, त्यसपछि केन्द्रीय सदस्यहरूको गणना गर्दा झन् धेरै समय खर्च हुन्छ,’ निर्वाचन समितिका एक सदस्यले भने, ‘हामीले त्यहीकारण विद्युतीय भोटिङको लागि छलफल गर्न भनेका छौं । यद्यपि त्यसो गर्नका लागि हामीलाई तयारी गर्ने समय भने कम नै हुन्छ ।’

यो महाधिवेशनबाट कांग्रेसले सभापति १, उपसभापति २, महामन्त्री २, सहमहामन्त्री ८ सहित १३४ पदमा निर्वाचन गर्नुपर्नेछ ।

त्यसकालागि निर्वाचन समितिले फरक फरक र‌ंगका २९ वटा मतपत्र तयार गरेको छ । हरेक मतदाताले २९ वटा मतपत्रमा छाप लगाउनुपर्छ ।

त्यस्तै, २९ वटै प्वाइन्टबाट मतदान गर्ने गरी व्यवस्थापन भइरहेको निर्वाचन समितिले जनाएको छ ।

कागजी मतपत्रमै मतदान गर्नुपरेको अवस्थामा एकै जनालाई मतदान गर्न कम्तिमा एक घण्टा लाग्ने अनुमान छ । कांग्रेस महाधिवेशनमा देशभरबाट करिब चार हजार पाँच सय महाधिवेशन प्रतिनिधिहरू सहभागी हुनेछन् ।


प्रकाशित : मंसिर २०, २०७८ १९:३७
प्रतिक्रिया
पठाउनुहोस्

हुन्डाईले नेपाली बजारमा ल्यायो ‘कोना इलेक्ट्रिक’ कार 

कान्तिपुर संवाददाता

काठमाडौँ — हुन्डाई अटोमोबाइलको आधिकारिक वितरक लक्ष्मी इन्टरकन्टिनेन्टलले विद्युतीय कार ‘कोना’ नेपाली बजारमा सार्वजनिक गरेको छ । विगत २ वर्षदेखि बिक्री हुँदै आएको हुन्डाई कोना एक सफल क्रसओभर कार हो । कम्पनीका अनुसार नयाँ कोनाको ड्राइभिङ रेन्ज बढेको छ भने सुरक्षा र एड्भान्स कनेक्टिभिटी फिचर थप भएर आएको छ ।

नयाँ कोनामा स्मार्ट सेन्स सेफ्टी सुइट, रिजेनेरेटिभ ब्रेकिङ, प्याडल सिफ्ट, ड्राइभ वाइ वायर सिस्टम तथा क्लाइमेट प्रि–सेटिङ, जस्ता आधुनिक विशेषता रहेको कम्पनीले जनाएको छ । कोनामा नयाँ डिजाइनको ग्रिल, नयाँ डेटाइम रनिङ लाइट तथा ठूलो साइजको टेललाइट पाउन सकिन्छ । कोना इलेक्ट्रिकलाई एक पटकको सिंगल चार्जमा ३०५ किलोमिटरसम्म गुडाउन सकिने कम्पनीको दावी छ ।

नयाँ कोनामा मल्टी स्टेज हाइभोल्टेज सेफ्टी सिस्टमयूक्त ३९.२ किलोवाट आवरको लिथियम आयोन पोलिमर ब्याट्री छ, जसका कारण यसमा हाइ इनर्जी डेन्सिटी रहन गई रेन्ज समेत बढ्ने छ । ब्याट्रीको ले–आउट तथा प्याकेजिङ सिस्टमले सेन्टर अफ ग्राभिटीलाई कम गरी कोनाको ह्याण्डलिङ उत्कृष्ट बनाएको छ । जसले चालक र यात्रुलाई आरामदायी यात्रा प्रदान गर्नेछ ।

कोनामा रहेको ८ इन्चको टचस्कृनयूक्त भिजुअल न्याभिगेसन सिस्टमले ड्राइभिङ अनुभवलाई आनन्दित बनाउँछ । नेपाली बजारमा कोना इलेक्ट्रिक एट्लास ह्वाइट, साइबर ग्रे, ग्यालाटिक ग्रे, पल्स रेड, सर्फी ब्लु तथा डार्क नाइट जस्ता कलर अप्सनमा उपलब्ध हुनेछ । विद्युतीय गाडी (इभी)का लागि अनिवार्य चार्जिङ स्टेसनलाई पनि लक्ष्मी इन्टरकन्टिनेन्टलले देशभर विस्तार गर्दै आएको छ । हाल नेपालको विभिन्न ३६ स्थानमा चार्जिङ स्टेशन स्थापना भइसकेको छ । कम्पनीले यसै वर्षभित्र ५० चार्जिङ स्टेशन स्थापना गर्ने लक्ष्य लिएको छ ।

लक्ष्मी इन्टरकन्टिनेन्टलले देशभर रहेका १३ डिलर र १७ वटा सर्भिस सेन्टर मार्फत ग्राहकलाई सेवा प्रदान गर्दै आएको छ । हुन्डाई विश्वको ठूला ५ कार निर्मातामा पर्ने अटोमोवाइल उत्पादक कम्पनी हो ।



प्रकाशित : मंसिर २०, २०७८ १९:३४
पूरा पढ्नुहोस्
प्रतिक्रिया
पठाउनुहोस्
×