एमाले अध्यक्षमा ओलीको उम्मेदवारी, रावलसँग प्रतिस्पर्धा हुने- समाचार - कान्तिपुर समाचार
कान्तिपुर वेबसाईट
AdvertisementAdvertisement
एमाले महाधिवेशन

एमाले अध्यक्षमा ओलीको उम्मेदवारी, रावलसँग प्रतिस्पर्धा हुने

कान्तिपुर संवाददाता

काठमाडौँ — केपी शर्मा ओलीले नेकपा एमालेको अध्यक्ष पदका लागि उम्मेदवारी दर्ता गराएका छन् । सोमबार बिहान उनले दसौं महाधिवेशनको बन्दसत्रस्थलमा रहेको केन्द्रीय निर्वाचन कार्यालयमा पुगेर अध्यक्ष पदमा उम्मेदवारी दर्ता गराएका हुन् । ओलीको प्रस्तावकमा विष्णु पौडेल र समर्थकमा शंकर पोखरेल रहेका छन् ।

यसअघि ओलीले आइतबार राति बन्दसत्रमा ३०१ जना केन्द्रीय सदस्य र पदाधिकारीको सूची पेस गरेका थिए । ओलीले विष्णु पौडेललाई उपाध्यक्ष र शंकर पोखरेललाई महासचिवमा प्रस्ताव गरेका छन् ।

अध्यक्ष ओलीले आइतबार मध्यरातसम्म सहमतिको कोसिस गरे पनि लोकतान्त्रिक प्रक्रियाभन्दा बाहिर गएर भएको निर्णयमा आफ्नो असहमति रहने भन्दै रावलले विधि र प्रक्रियाको कुरा उठाएपछि ओलीको सर्वसम्मत बन्ने प्रयासमा धक्का लागेको हो ।

एमालेको १० औं महाधिवेशनको बन्दसत्रमा सर्वसम्मतिका लागि भन्दै वरिष्ठ उपाध्यक्षमा ईश्वर पोखरेल र महासचिवमा शंकर पोखरेललाई प्रस्ताव गरिएको छ । पार्टीभित्र भीम रावल, घनश्याम भुसाल लगायतका नेताहरूको विरोधकाबीच अध्यक्ष ओलीले दिनभरको गृहकार्यपछि प्रस्ताव ल्याएका हुन् । ईश्वर पोखरेल एमालेको दुई कार्यकाल महासचिव भएका थिए । शंकर पोखरेल यसअघिको महाधिवेशनमा उपमहासचिवमा हारेका थिए । एमाले सचिव भइसकेका छन् । उनी लुम्बनी प्रदेशका पूर्व मुख्यमन्त्री पनि हुन् ।

प्रस्ताव अनुसार ६ जना उपाध्यक्षमा युवराज ज्ञवाली अष्टलक्ष्मी शाक्य सुरेन्द्र पाण्डे रामबहादुर थापा विष्णु पौडेल र सुवास नेम्वाङ छन् । त्यस्तै ३ जना उपमहासचिवमा प्रदीप ज्ञवाली,पृथ्वीसुब्बा गुरुङ र विष्णु रिमाल लाई प्रस्ताव गरिएको छ । सात जना सचिवमा टोपबहादुर रायमाझी, छविलाल विश्वकर्मा,लेखराज भट्ट, रघुवीर महासेठ, योगेश भट्टराई, गोकर्ण विष्ट र पद्मा अर्याल छन् ।

सहमतिका लागि ल्याएको प्रस्तावमा पूर्व माओवादी पक्षका रामबाहादुर थापा उपाध्यक्ष सहित टोपबहादुर र लेखराज गरी ३ जना परेका छन् । वरिष्ठ उपाध्यक्षमा सुवासचन्द्र नेम्बाङ र ईश्वर पोखरेल र महासचिवमा विष्णु पौडेल र शंकर पोखरेलमध्ये कसलाई बनाउने भन्नेबारे गलफत्ती परेको थियो । दुवैजना ओलीका विश्वासपात्र भएकाले उनीहरूमध्ये पौडेल उपाध्यक्षमा र पोखरेल महासचिवमा बस्न तयार भएका हुन् ।

प्रकाशित : मंसिर १३, २०७८ ०९:५३
प्रतिक्रिया
पठाउनुहोस्

काठ तस्करीमा ‘मोडिफाइ’ साइकल

शिव पुरी

रौतहट — एक साताअघि प्रहरीको गस्ती टोलीले कटहरिया नगरपालिका–१ तल्लोखोरस्थित जंगलबाट ३ वटा साइकलमा ४ थान अवैध सालको गोलिया नियन्त्रणमा लियो । साइकलको हुलिया हेर्दा भने प्रहरी नै आश्चर्यमा परे ।

साइकललाई नै ‘मोडिफाइ’ गरेर उनीहरुले काठ तस्करी गर्दै आएका थिए । प्रहरीलाई देखेपछि काठ तस्कर भागे । बरामद काठ प्रहरीले डिभिजन वन कार्यालय चन्द्रनिगाहपुरलाई बुझाएको छ । वनले काठ तस्कर पत्ता लगाउन सकेको छैन ।

दुई दिनअघि वनको गस्ती टोलीले जंगलसहिया साझेदारी वन क्षेत्रबाट ५ वटा साइकलसहित सालको गोलिया बरामद गरेको छ । वन टोलीले स्वरुप बदलेको साइकलमा काँचो सालको गोलिया लोड गरेर ल्याउँदै गर्दा घेरा हाली नियन्त्रणमा लिएको थियो । टोलीलाई देख्नासाथ तस्कर साइकल छाडेर फरार भए । तस्करले छाडेको ५ वटा साइकल र ३ थान गोलिया नियन्त्रणमा लिएको डिभिजन वनका निमित्त प्रमुख अमरदेव यादवले बताए ।

‘साइकलको हुलिया बदलेर काठ चोर्नमा प्रयोग हुँदै आएको छ,’ उनले भने, ‘जतिसुकै कडाइ गरे पनि साइकल तस्कर हावी हुन छाडेको छैन । उनीहरूको सञ्जाल तोड्न वन लागिपरेको छ ।’ डिभिजन वनले पछिल्लो दुई वर्षमा सालको गोलिया लोड गरेर ल्याउँदै गरेको झण्डै ५ सय वटा साइकल बरामद गरेको छ । मानिसले सवारीसाधनको रुपमा प्रयोग गर्ने साइकलको स्वरुप बदलेर ठुल्ठुला काठ लोड गरेको देख्दा अचम्म लागेको निमित्त वन प्रमुख यादवले सुनाए । सुरुमा काठ तस्करले टायर गाडा प्रयोग गर्थेर् । गोरु, पाडाले तान्ने हुनाले वनले धमाधम पक्रन थालेपछि बलेरो जिप, ट्रयाक्टर, इ–रिक्सा, अटो र ट्रक प्रयोग गर्न थाले । त्यो पनि पक्राउ पर्न थालेपछि पछिल्लो समय भारतीय चोरीको जिप प्रयोग गरि काठ तस्कर गर्न थालेको पाइएको थियो ।

सुराकीको माध्यमबाट वनले त्यस्ता सबारी पनि पक्रन थालेपछि अहिले साइकलको स्वरूप बदलेर काँचो सालका गोलिया ओसारपसार गर्न थालेका हुन् । वन वा सुरक्षाकर्मीले साइकल बरामद गरिहाले तस्करलाई खासै क्षति नहुने हुँदा यस्तो नीति अपनाउन थालेको वन अधिकारीको बुझाई छ । ठुला सबारी पक्राउ पर्दा लाखौको क्षति हुने तर साइकल छाड्दा ४/५ हजार मात्र डुब्ने हुँदा तस्करले यस्को प्रयोग गर्न थालेको वनका कर्मचारी बताउँछन् । नयाँ साइकललाई धेरै समय लगाएर स्वरुप बदली तस्करीमा प्रयोग गर्न थालेको ५ बर्ष बढी भइसकेको छ । तर नियन्त्रणमा गर्न सकेको छैन् । यो झनै बढेको बनकै कर्मचारीहरू बताउँछन् ।

बजारबाट नयाँ साइकल किनेर स्वरुप बदल्ने र रातभर जंगलमा लगेर गोलिया ओसारपसारमा प्रयोग गर्न थालेको वनले फेला पारेको हो । स्वरुप बदलेपछि साइकलमा मानिस चढेर हिड्न मिल्दैन् । एउटा साइकलको बजार मुल्य ४/५ हजार रुपैयाँसम्म पर्छ । त्यसलाई स्वरुप बदल्न १ हजार रुपैयाँ जति थप लाग्छ । वनले ४ दिनअघि चन्द्रपुर–९ स्थित स्थानीय चिरान मिलबाट साइकल तस्करले बेचेको गोलिया पनि बरामद गरेको थियो । मिलबिरुद्ध वनले अनुसन्धान सुरु गरेको निमित्त वनप्रमुख यादबले जानकारी दिए ।

साइकलको पायडल माथिको बीच भागलाई गोलो कडा फलाम राखेर वेल्डिङ गरी घुमाइन्छ । त्यहीभित्र गोलिया लोड गरिन्छ । यसो गर्दा दुईजनाले ठूलठूला काठ साइकलमा लोड गरेर लैजान सजिलो हुन्छ । वनका अनुसार बरामद गरिएको ठूलो परिमाणका साइकल अहिले वन कार्यालयको कम्पाउण्डमा राखिएको छ । ‘अहिले सबैभन्दा ठुलो चुनौती भनेकै साइकल तस्कर हो,’ उनले भने, ‘यिनलाई तह लगाउन सके चोरी नियन्त्रण हुन्छ ।’ वनले साइकल तस्करलाई नियन्त्रणमा लिने प्रयास गरेको जनाउँदै आए पनि सफल हुन भने सकेको छैन । चन्द्रनिगाहपुर, बृन्दावनको बलेरी, गुजराको चोचालगायत वनक्षेत्रमा गस्ती टोलीले यस्ता साइकल बरामद गरेको छ ।

वनले साइकलको स्वरूप बदल्ने स्थानको पहिचान गर्ने अभियान थाले पनि अहिलेसम्म फेला पार्न सकेको छैन । नयाँ साइकल ग्रील कारखाना र आइरनमा लगेर काठ चोर्न मिल्ने बनाउने गरेको वनले सुराकी पाएको दाबी गरेको छ ।

प्रकाशित : मंसिर १३, २०७८ ०९:५२
पूरा पढ्नुहोस्
प्रतिक्रिया
पठाउनुहोस्
x
×