नारायणीमा सेल्फी सेन्टर, सौराहामा समृद्धिका चित्र- समाचार - कान्तिपुर समाचार
कान्तिपुर वेबसाईट
AdvertisementAdvertisement
एमाले महाधिवेशन

नारायणीमा सेल्फी सेन्टर, सौराहामा समृद्धिका चित्र

चितवन झकिझकाउ पारिँदै, सहभागीले नारायणी किनारको आकर्षक मञ्चबाट हुने सभालाई सुन्दै सेल्फी सेन्टरमा फोटो खिच्न पाउने
रमेशकुमार पौडेल

चितवन — नेकपा एमालेको १० औं राष्ट्रिय महाधिवेशनको उद्घाटनस्थल नारायणी नदी किनारमा यो बेला बेग्लै चहलपहल छ । नारायणी पुलदेखि पूर्वतर्फ किनारको सबैभन्दा सिरानमा भव्य मञ्च बन्दै छ । शुक्रबार मध्याह्न अतिथिहरू बस्ने उक्त मञ्च बिहीबार साँझसम्म बनाएर सक्नैपर्ने भएकाले कामदारहरू व्यस्त छन् । बन्दै गरेको मञ्च हेर्न आउनेहरू पनि उत्तिकै छन् । 

भरतपुर बेलटाँडीका ९५ वर्षका विष्णुबहादुर कार्की, ८५ वषीय एचबी पुन र ७८ वर्षका भीमबहादुर विकको घर नारायणी किनारबाट करिब एक किलोमिटर दक्षिणमा छ । सधैं किनार डुलेका भेटिने यी वृद्ध बुधबार दिउँसो बन्दै गरेको मञ्च देखेर दंग परिरहेका देखिन्थे । मञ्चका अगाडि निकै बेर उभिए । मञ्च व्यवस्थापनमा खटिएका विनोद श्रेष्ठका अनुसार करिब ७५ प्रतिशत काम सकिएको छ । श्रेष्ठ पार्टीको २०४७ सालमा सम्पन्न पाँचौं महाधिवेशनदेखि मञ्च निर्माणमा खटिँदै आएका हुन् ।

‘सातौं महाधिवेशनसम्म मञ्च बनाउन फलाम प्रयोग हुँदैनथ्यो । घर ढलान गर्दाझैं बाँस राखेर खटहरू बनाउने गरिन्थ्यो । आठौं महाधिवेशनदेखि मञ्चमा फलामको प्रयोग हुन थाल्यो,’ उनले सुनाए, ‘नवौंमा डोमको सुरुवात भयो । १० औंमा आएर यी यसरी फोल्ड गर्न मिल्ने सामग्रीहरू काठमाडौंबाट ल्याएर मञ्च बनायौं ।’ मञ्च १ सय २० फिट लामो र ६० फिट चौडाइको छ । ‘अब निर्माणको काम लगभग पूरा हुने क्रममा छ । सजावटको काम बाँकी छ,’ स्वयंसेवक परिचालन समितिको संयोजक तथा मञ्च निर्माणको फिल्ड संयोजन गरेका एमालेका नेता श्रेष्ठले भने ।

एमालेले युवाबीच आकर्षण बनेको सेल्फी सेन्टर पनि उद्घाटन स्थलमा तयार गर्दै छ । ‘हामी १५/२० ठाउँमा सेल्फी सेन्टरहरू बनाउने छौं । दुईवटा ठाउँमा स्थायी सेल्फी सेन्टर नै हुने छन्,’ श्रेष्ठले भने । मञ्च आडैमा १० औं महाधिवेशनको लोगो बनेको कम्युनिष्ट पार्टीको झन्डा उचालेको गैंडाको मूर्ति रहने छ । त्यसैगरी मजदुरहरूले विश्व उचालेको मूर्तिसहितको सेल्फी सेन्टर अर्को ठाउँ बनाइने छ । यी दुई सेल्फी सेन्टर स्थायी हुनेछन् । गैंडाको मूर्तिमा महाधिवेशन अवधिभर कम्युनिस्टको र पछि नेपालको झन्डा हुनेछ ।

महाधिवेशनको उद्घाटन र बन्दसत्र हुने स्थानको दूरी करिब २० किलोमिटर छ । नारायणी किनारमा उद्घाटन कार्यक्रमपछि महाधिवेशनको बन्दपत्र आगामी शनिबारदेखि सौराहामा हुनेछ । बन्दसत्र गर्न पनि खुला ठाउँमा डोम निर्माण भइरहेको छ । बन्दसत्र स्थल र उद्घाटन स्थलको मञ्च निर्माण र अन्य काममा ५० लाख रुपैयाँ खर्च हुने श्रेष्ठले बताए । नेतृत्व चयनका लागि सौराहाको होटल सेभेन स्टारमा मतदानको कार्यक्रम छ ।

उक्त होटलको दुई सय मिटर लामो पर्खालको भित्तामा बुधबार विभिन्न चित्रहरू कोरिएको छ । ‘समृद्ध नेपाल, सुखी नेपाली’ शीर्षकमा नयाँ कलाकारहरूलाई सहभागी बनाएर भित्ताभर चित्र बनाएको नेपाल ललितकला प्रज्ञा प्रतिष्ठानको मूर्तिकला विभागका प्रमुख लालकाजी लामाले जानकारी दिए । ५७ जना विद्यार्थीले भित्ताभरि चित्र कोरेका छन् । चितवनका पुराना चित्रकारले पनि चित्रहरू कोरेका छन् ।

‘देशभरका प्रतिनिधिलाई चितवनका कलाकारको सिर्जना देखाउने जमर्को गरेका हौं,’ चित्र बनाएका वरुणबाबु घिमिरेले भने । ‘भित्ताभरि चित्र देख्दा मान्छेको मन रमाउने छ । राजनैतिक बहसमा जुटिरहेकाहरूले बन्दसत्र स्थलमै राम्रा राम्रा चित्रहरू देख्ने छन् । चित्रहरूले मनलाई आनन्द दिन्छ,’ लालकाजी लामाले भने । बन्दसत्र स्थलमै चित्रकला प्रदर्शनी हुने अर्का चित्रकार डी बरालले बताए । राजनैतिक बहसको थलोमा सिर्जना मिसाउने प्रयास कलाकारहरूले गरेको बरालले बताए ।

प्रकाशित : मंसिर ९, २०७८ ०७:५६
प्रतिक्रिया
पठाउनुहोस्

आश्वासन पाए, चामल पाएनन्

सरकारले बुधबार चामल ढुवानी गर्ने बताए पनि हेलिकोप्टरर लोड गर्ने कामदार नभएको भन्दै शुक्रबारलाई भाका सारेको छ
राजु चौधरी

काठमाडौँ — हुम्लाको नाम्खा गाउँपालिकामा आगामी शुक्रबारदेखि मात्रै खाद्यान्न ढुवानी हुने भएको छ । ४ दिनको कष्टपूर्ण हिउँको यात्रा तय गरी सरदमुकाम सिमकोट र त्यसपछि काठमाडौं आएका हुम्लीलाई मंगलबार गृहसचिव टेकनारायण पाण्डेले बुधबारदेखि ढुवानी गरिदिने आश्वासन दिएका थिए । तर हेलिकोप्टर र हिल्सामा खाद्यान्न लोड गर्ने कामदार नभएको भन्दै बुधबार ढुवानी भएन ।

‘हिल्सामा खाद्यान्न लोड गरिदिने मान्छे नै भएनन् । त्यसको व्यवस्थापन गर्न अझै २/३ दिन लाग्ने भयो,’ नाम्खा–६ का अध्यक्ष पाल्जोर तामाङले भने, ‘अब शनिबारसम्म ढुवानी हुने आसमा छौं ।’

ढुवानीमा कमिसनको खेल हुँदा हुम्लाका अधिकांश क्षेत्रमा चामल अभाव भएको छ । खाद्य संकट परेपछि नाम्खाका प्रतिनिधि चामल माग्न सिंहदरबारसम्म आइपुगेका छन् । ३० जनाको टोली ४ दिनसम्म कठ्यांग्रिँदो हिउँ छिचोल्दै सिमकोटसम्म आइपुगेको थियो । सिमकोटबाट भने वडाध्यक्ष तामाङ र सांसद छक्कबहादुर लामा काठमाडौं आएका हुन् । मंगलबार दिउँसो १ बजे सिंहदरबार पुगेका उनीहरूले अर्थमन्त्री र गृहमन्त्रीलाई भेट्न खोजेका थिए । मन्त्रीहरूसँग भेट नभएपछि गृह सचिव पाण्डेलाई भेटे ।

चामल ढुवानीमा कमिसनको खेलले भोकमरी

त्यस क्रममा पाण्डेले प्रमुख जिल्ला अधिकारीसँग समन्वय गरी बुधबारदेखि ढुवानीको व्यवस्था मिलाउने आश्वासन दिएका थिए । तर हुम्लीले चामलका लागि अझै पर्खिनुपर्ने अवस्था बनेको छ । प्रजिअ गणेश आचार्यले नेपाली सेनाले मंसिर १० मा उडानमार्फत ढुवानी गरिदिने जनाएको बताए । ‘हिल्साबाट नाम्खामा चामल ढुवानी गर्न मुख्यमन्त्री, प्रदेश सचिव र गृह प्रवक्तासँग छलफल भएको छ । खाद्यान्न लोड गर्नका लागि बुधबार साँझ १२ जना कामदार हिल्सा पुगेका छन्,’ उनले भने, ‘हेलिकोप्टरका लागि सेनासँग कुरा गर्दा १० गते मात्रै उडान गरिदिने बताएको छ । हेलिकोप्टरको कुरा हो, प्राविधिक समस्या भए १/२ दिन पर पनि सर्न सक्छ ।’

नाम्खाको लिमीमा करिब ११ सय जनसख्या छ । वडा–६ मा साढे ४ सयको बसोबास छ । यहाँ उवा र आलु मात्रै उत्पादन हुन्छ । खाद्यान्नका लागि उत्तरी सीमावर्ती बजारमा आश्रित यहाँका स्थानीय कोरोनाका कारण करिब २ वर्षदेखि सीमा बन्द हुँदा खाद्य संकट भोग्दै आएका छन् । यसबीचमा चीनको पुराङ काउन्टीको ताक्लाकोटस्थित स्थानीय प्रशासनले लिमीवासीलाई मैदा र चामल सहयोग गरेको थियो ।

‘तर ५ क्विन्टल चामल र ४६१.५ क्विन्टल पिठो सीमामै छ । असोज ३१ पछि हिउँ परेकाले ढुवानी हुन नसक्दा समस्या भएको हो,’ प्रजिअ आचार्यले भने । उनका अनुसार पिठो भण्डारण गरिएको स्थानमा हाल सशस्त्र प्रहरीको सीमा सुरक्षा बलको टोलीबाहेक ६ जना मात्रै छन् । ‘लोड–अनलोड गर्ने मान्छे नै नभएपछि मौज्दात खाद्यान्न ल्याउन समस्या भएको हो,’ उनले भने, ‘हिउँले बाटो पनि बन्द भयो । १५ दिनयता डोजरको प्रयोग गरी सडक व्यवस्थापनको प्रयास भइरहेको छ ।’ लिमीका लागि थप २ सय क्विन्टल चामल ढुवानी गर्न गृह मन्त्रालयमा प्रस्ताव गरिएको उनले जनाए । गृहले स्वीकृति दिएपछि उक्त चामल पनि हेलिकोप्टरबाटै ढुवानी हुनेछ ।

नाम्खाका लागि यो वर्ष १ हजार क्विन्टल चामल ढुवानी गर्न स्वीकृति मिलेको थियो । तर हालसम्म ढुवानी भएको छैन । खाद्य कम्पनीले कमिसनको प्रलोभनमा महँगो ढुवानी दर कबोल गर्नेलाई स्वीकृति दिन खोज्दा ठेक्का नै विवादमा परेको छ । खाद्य कम्पनीले हवाई मार्गबाट हुम्लामा १० हजार क्विन्टल चामल पठाउन बोलपत्र आह्वान गरेपछि ४ कम्पनीेले आवेदन दिए । तर किलोमै ४२ रुपैयाँ महँगो कबोल गर्नेलाई अनुमति दिन खोज्दा विवाद भएको हो ।

हुम्लामा ६० हजार जनाको बसोबास छ । जिल्लामा २७ हजार ९ सय क्विन्टल चामल ढुवानी गर्न स्वीकृति मिलेको छ तर ४ महिनामा कत्ति पनि चामल पुगेको छैन । खाद्य संकटपछि चामल माग्दै आचार्यले २ पटक गृहमा पत्राचार गरेका थिए तर सुनुवाइ भएन । उनी कात्तिक २३ मा आफैं काठमाडौं आएका थिए । अहिले भने वडाध्यक्ष र सांसद चामल माग्न आएका हुन् ।

प्रकाशित : मंसिर ९, २०७८ ०७:५५
पूरा पढ्नुहोस्
प्रतिक्रिया
पठाउनुहोस्
×