कोरोना भाइरसको उत्पत्तिबारे अनुसन्धान गर्न डब्लूएचओद्वारा कार्यदल गठन- समाचार - कान्तिपुर समाचार

कोरोना भाइरसको उत्पत्तिबारे अनुसन्धान गर्न डब्लूएचओद्वारा कार्यदल गठन

कान्तिपुर संवाददाता

काठमाडौँ — विश्व स्वास्थ्य संगठन(डब्लूएचओ)ले कोभिड-१९ को उत्पत्ति पत्ता लगाउन कार्यदल गठन गरेको छ । साइन्टिफिक एड्भाइजरी ग्रुप अफ द ओरिजिन्स अफ नोभल पाथोजेन्स (सागो)सँग संयुक्त रुपमा गठन गरिएको नयाँ कार्यदलमा २६ जना विज्ञहरु मनोनीत गरिएको छ ।

डब्लूएचओले नयाँ कार्यदल कोभिड-१९ को उत्पत्ति पत्ता लगाउने अन्तिम अवसर हुनसक्ने जनाएको छ। साढे एक वर्षअघि पहिलो पटक चीनको वुहान सहरमा भाइरस भेटिएको थियो तर भाइरस सुरुमा कसरी उत्पत्ति भयो भन्ने विषयमा भने अझै अस्पष्ट छ ।

नवगठित कार्यदलले वुहानको बजारबाट जनावरबाट मानिसमा भाइरस सरेको हो वा प्रयोगशाला दुर्घटनापछि फैलिएको हो भनेर विचार गर्ने छ । प्रयोगशालासम्बन्धी दोस्रो धारणाप्रति चीनले कडा रुपमा प्रतिवाद गर्दै आएको छ ।

कोभिडको उत्पत्तिको विषयमा अनुसन्धान गर्न गत फेब्रुअरीमा चीन पुगेको डब्लूएचओको एक टिमले भाइरस चमेराबाट मानिसमा सरेको सम्भावनासहितको निष्कर्ष दिएको थियो तर यस विषयमा थप काम गर्नुपर्ने जनाएको थियो । तर पछि डब्लूएचओका महानिर्देशक डाक्टर टेड्रोस एडहानामले चिनियाँ पक्षको आपरदर्शीता र डेटाको अभावले अनुसन्धानमा बाधा उत्पन्न भएको बताएका थिए । डब्लूएचओका अधिकारीहरुले साइन्स जर्नलमा प्रकाशित गरेको एक लेखेमा 'प्रयोगशाला दुर्घटना'को विषयलाई अस्वीकार गर्न नसकिने उल्लेख छ।

सागोले प्रस्ताव सदस्यहरुमा यसअघि चीन पुगेका विज्ञ टिमका सदस्य रहेका छन् । नयाँ कार्यदलको घोषणा चीनले महामारी सुरुवाि महिनामा लिएको ब्लड बैंकले लिएको हजारौँ नमुनाको परीक्षण गर्न तयारी गरिरहेको भन्ने समाचार आएको समयमा भएको हो । चीनले भने उत्पत्तिको विषयमा वैज्ञानिक अनुसन्धान विषय भएको तर कोभिड १९ को उत्पत्तिलाई राजनीतिकरण गर्न खोजेको आरोप लगाउँदै आएको छ ।

प्रकाशित : आश्विन २८, २०७८ ०८:३०
प्रतिक्रिया
पठाउनुहोस्

भारत भन्छ : नेपाल बलियो प्रतिद्वन्द्वी

हिमेश

माले, माल्दिभ्स — साफ च्याम्पियनसिप २०२१ को फाइनलमा नेपालले शनिबार कीर्तिमान सात पल्टको विजेता भारतको सामना गर्नेछ । त्यस अगाडि भारतीय सहायक प्रशिक्षक सन्मुघम वेंकटेशले उपाधि भीडन्तमा भारतका लागि नेपाल बलियो प्रतिद्वन्द्वी रहेको स्विकारेका छन् । उनले भनेका छन्, ‘नेपालविरुद्ध खेल्न सजिलो हुने छैन ।’



त्यस अगाडि भारतले राउन्ड रोबिनको आधारमा चलेको प्रतियोगिताको अन्तिम लिग खेलमा माल्दिभ्सलाई ३–१ ले हराएको थियो । फाइनल पुग्नका लागि त्यस खेलमा भारतलाई निश्चित जित आवश्यक थियो र यसक्रममा भारतले नेसनल स्टेडियममा भएको खेलमा उत्कृष्ट प्रदर्शन गरेको थियो ।

भारतका लागि कप्तान सुनील क्षेत्रीले दुई गोल गरे । यससँगै सुनिलले भारतका लागि १ सय २४ खेलमा गरेको गोल संख्या ७९ पुगेको छ । भारतले मनवीर सिंहको गोलले अग्रता लिएपछि माल्दिभ्सका तर्फबाट कप्तान अली अस्फाकले पेनाल्टीबाट गोल गरे । खेलको अन्त्यमा भारत दस खेलाडीमा सीमित भएको थियो ।

यस्तै रेफ्रीले भारतीय प्रशिक्षक इगोर स्टेमिकलाई पनि रातो कार्ड देखाए । यसै कारण उनी खेलपछि आयोजित पत्रकार सम्मेलनमा आउन योग्य भएनन् । नेपालविरुद्धको फाइनलमा पनि प्रशिक्षक स्टिमेक डगआउटमा बस्न पाउने छैनन् । लिग चरणको अन्त्यमा भारत चार खेलबाट आठ अंकसहित शीर्ष स्थानमा रह्यो भने नेपाल सात अंकमा दोस्रो स्थानमा ।

आयोजक तथा डिफेन्डिङ च्याम्पियन माल्दिभ्स भने ६ अंकमै सीमित रहेर प्रतियोगिताबाट बाहिरिएको थियो । फाइनल पुगेपछि भारत र यसका प्रशिक्षक स्टिमेकलाई धेरै राहत भने भएको छ । सुरुवाति दुई खेलमा बराबरी खेलेर निकै आलोचित बनेको भारतले अन्तिम दुई खेल भने जितेको थियो । यसैक्रममा भारतले नेपाललाई १–० ले हराएको थियो ।

प्रेस मिटमा खेलको विश्लेषण गर्दै भारतीय सहायक प्रशिक्षक वेंकटेशले भने, ‘हामी माल्दिभ्समा साफ च्याम्पियनसिप जित्न आएका हौं र त्यसै क्रममा फाइनल पुग्न सफल रहयौं । त्यसैले पूरा टिम खुसी छ । अब फाइनलमा नेपालको सामना हुनेछ । सबै खेलाडीको स्थिति बुझेपछि हामी नेपालविरुद्धको रणनीति तय गर्नेछौं ।’

प्रकाशित : आश्विन २८, २०७८ ०८:१३
पूरा पढ्नुहोस्
प्रतिक्रिया
पठाउनुहोस्
×