तीन करोड डोज खोप ल्याउन बजेट- समाचार - कान्तिपुर समाचार

तीन करोड डोज खोप ल्याउन बजेट

कान्तिपुर संवाददाता

काठमाडौँ — मिर्गौला प्रत्यारोपण गरेका, सबै किसिमका क्यान्सर रोगी र मेरुदण्डका पक्षघात भएका व्यक्तिलाई सरकारले हरेक महिना ५ हजार रुपैयाँ उपलब्ध गराउने भएको छ । अर्थमन्त्री जनार्दन शर्माले अर्थसम्बन्धी अध्यादेशको प्रतिस्थापन विधेयक प्रस्तुत गर्दै स्वास्थ्य क्षेत्रमा करिब ११ अर्ब बजेट बढाएका छन् ।

केपी ओली सरकारका अर्थमन्त्री विष्णु पौडेलले स्वास्थ्य मन्त्रालयका लागि १ खर्ब २२ अर्ब ७८ करोड विनियोजन गरेकामा अर्थमन्त्री शर्माले शुक्रबार प्रस्तुत गरेको प्रतिस्थापन बजेटमा १ खर्ब ३३ अर्ब १ करोड बजेट छुट्याएका छन् । सवारीसाधन खरिद, बैठक भत्ता, गोष्ठी, तालिम खर्चलगायत कटौती गरी खोप खरिदका लागि पाँच अर्ब बजेट थप गरेको अर्थमन्त्री शर्माले जानकारी गराए । अब थप ३ करोड मात्रा खोप खरिद गरिने बजेटमा उल्लेख छ ।

हालसम्म १ करोड ३३ लाख ५९ हजार डोज कोभिडविरुद्धको खोप भित्रिइसकेको छ । शर्माले कोभिडविरुद्धको खोप व्यवस्थापनको लागि वैदेशिक स्रोतको अतिरिक्त आन्तरिक स्रोतसमेत परिचालन गरी खोप खरिद गरिने बताए । भदौ २३ गतेसम्म ५७ लाख ३० हजार जनाले पहिलो डोज र ५१ लाख २ हजार जनाले पूर्ण खोप प्राप्त गरिसकेका छन् । अर्थमन्त्रीले हालसम्म १ करोड ३३ लाख ५९ हजार डोज खोप नेपाल भित्रिएको र करिब ३ करोड प्राप्त हुने क्रममा रहेको जानकारी गराए ।

खोप, अक्सिजन, ग्यास तथा स्यानिटरी प्याड उत्पादन गर्ने उद्योगलाई सुरुका तीन वर्षसम्म लाग्ने करमा शतप्रतिशत र त्यसपछि दुई वर्षसम्म ५० प्रतिशत छुट गरिनेसमेत बजेटमा उल्लेख छ ।

प्रकाशित : भाद्र २६, २०७८ ०८:००
प्रतिक्रिया
पठाउनुहोस्

मेलम्चीको पानी चैतभित्र ल्याउने लक्ष्य

कान्तिपुर संवाददाता

काठमाडौँ — सरकारले मेलम्ची खानेपानी आयोजनाको काम चैत मसान्तभित्र सम्पन्न गरी खानेपानी नियमित आपूर्ति गर्ने घोषणा गरेको छ । अर्थमन्त्री जनार्दन शर्माले आवश्यक मर्मत तथा पुनःस्थापन गरी पानी आपूर्ति गर्ने प्रतिस्थापन बजेटमार्फत घोषणा गरेका हुन् ।

गत असारमा मेलम्चीमा आएको बाढीले अम्बाथानस्थित हेडवर्क्सलगायतमा क्षति पुर्‍याउनुका साथै करिब ८ किमि सडक संरचना बगाउँदा आयोजना अवरुद्ध छ । मेलम्ची बजारदेखि हेडवर्क्ससम्मको करिब २१ किमिमध्येको ८ किमि सडक बगाउँदा गाडी सञ्चालन हुन सकेका छैनन् । दुई पटकको बाढीले २ अर्ब ४५ करोड रुपैयाँको क्षति पुगेको आयोजनाका सूचना अधिकारी राजेन्द्रप्रसाद पन्तले जानकारी दिए ।

यसअघिको सरकारले ३ अर्ब ५० करोड रुपैयाँ बजेट विनियोजन गरेको थियो । पन्तका अनुसार मेलम्ची आयोजना (पहिलो चरण) का लागि ५७ करोड र याङ्ग्री, लार्के (दोस्रो चरण) का लागि २ अर्ब ९३ करोड रुपैयाँ विनियोजन गरिएको थियो । बाढीले पहिलो चरणको आयोजनामा क्षति पुर्‍याएपछि याङ्ग्री र लार्केको बजेट मेलम्चीमै गाभ्न सक्ने सम्भावना रहेको पन्तले बताए ।

‘सडक विभागले सडकको र नेपाली सेनाले पनि आयोजनामा काम गर्ने भन्नेछ,’ उनले भने, ‘बजेटको आकार खास बढ्ने होइन, यताको उतामात्र गरेको हो ।’ वर्षाले आयोजनाका काम गर्न निकै कठिन भएकाले याङ्ग्री र लार्केसमेत प्रभावित भएको आयोजनाले जनाएको छ । वैकल्पिक रूपमा पानी पथान्तरण गर्न बनाइएको कफर ड्याम पूर्णरूपमा क्षति भएको पन्तले बताए ।

अस्थायी तरिकाले पानी पथान्तरण गर्न तत्काल भौतिक तथा पूर्वाधार मन्त्रालय, नदी नियन्त्रणमा जलस्रोत तथा सिँचाइ मन्त्रालयले सहयोग गर्नुपर्ने उनको भनाइ छ । यसअघि आयोजनाले अस्थायी मुख्य बाँधको मुखमा अस्थायी सुरुङ बनाई पानी पठाउने गरेको थियो । ‘हेडवर्क्सलार्ई बाढीपछि बालुवा, गिट्टीले छोपेको छ ।

मुहान क्षेत्रको सडक र अम्बाथानका दुईवटा बेलिब्रिज, तिम्बु र हल्देका मोटरेबल पुल बगाएको छ,’ पन्तले भने, ‘अडिट सुरुङसम्म पुग्न पनि गाह्रो भइराखेको छ ।’ मुहाननजिकैको इन्जिनियरिङ क्याम्प र सुरक्षा पोस्ट बाढीले बगाएको थियो । क्याम्प बगाउँदा आयोजना निर्माणमा संलग्न ठेकेदार कम्पनीका एक चिनियाँ र दुई भारतीयको मृत्यु भएको थियो ।

प्रकाशित : भाद्र २६, २०७८ ०७:५५
पूरा पढ्नुहोस्
प्रतिक्रिया
पठाउनुहोस्
×