काठमाडौँ — सरकारले नेपालमा १८ वर्षमाथिका व्यक्तिमा कोरोना खोप ट्रायल गर्न अनुमति दिएको छ । बुधबार बसेको मन्त्रिपरिषद्को बैठकले खोप परीक्षण (क्लिनिकल ट्रायल) का लागि अनुमति प्रदान गर्ने निर्णय गरेको नेपाल स्वास्थ्य अनुसन्धान परिषदका सदस्य सचिव डा. प्रदीप ज्ञवालीले बताए ।
परिषद्की अनुसन्धान अधिकृत नमिता घिमिरेले अमेरिकी कम्पनी सानोफी पास्टरको प्रायोजनमा इन्टरनेसनल भ्याक्सिन इन्स्टिच्युट कोरियासँग मिलेर खोपको परीक्षण गर्ने जानकारी गराइन् । बाँकेको कोहलपुरस्थित नेपालगञ्ज मेडिकल कलेज र धुलिखेल अस्पतालमा परीक्षण गरिने भएको हो । ४ हजार जनामा उक्त खोपको परीक्षण गरिने परिषद्ले जनाएको छ ।
यसअघि सरकारले भदौ १० गते चीनमा उत्पादन गरिएको एमआरएनए खोपलाई नेपालमा परीक्षण गर्न अनुमति दिएको थियो ।
