२७.१२°C काठमाडौं
काठमाडौंमा वायुको गुणस्तर: १४६

लुम्बिनीमा आजै नयाँ सरकार : मन्त्रीमा क-कसको चर्चा ?

घनश्याम गौतम

बुटवल — लुम्बिनी प्रदेशमा बिहीबार माओवादी केन्द्रका संसदीय दलका नेता कुलप्रसाद केसीको नेतृत्वमा नयाँ सरकार गठनको तयारी अगाडि बढेको छ ।

लुम्बिनीमा आजै नयाँ सरकार : मन्त्रीमा क-कसको चर्चा ?

केसीलाई मुख्यमन्त्रीमा प्रस्ताव गर्दै ४२ जना सांसदहरुले हस्ताक्षारसहितको दाबी प्रदेश प्रमुख अमिक शेरचनलाई प्रस्तुत गरेका छन् । सरकार गठनका लागि प्रदेश प्रमुख शेरचनले बिहीबार दिउँसो ३ बजेसम्मका लागि समय दिएका छन् । समयसीमा सकिएपछि मुख्यमन्त्रीमा केसीलाई बिहीबार नै नियुक्त गर्ने तयारी गरिएको छ ।

शपथपछि केसीले सानो आकारको मन्त्रिपरिषद् बनाउने तयारी गरेका छन् । गठबन्धनका तीन दलबाट एक/एक जना मन्त्री पठाउने तयारीमा दलहरुले छलफल गरिरहेको माओवादी केन्द्रका प्रमुख सचेतक तुलाराम घर्तीले बताए । गठबन्धनमा रहेको जनमोर्चाले भने सरकारमा सहभागी नहुने बताएको छ । लुम्बिनी प्रदेशसभामा जनमोर्चाका १ जना सांसद रहेका छन् ।

दलहरुको छलफल अनुसार कांग्रेसबाट दाङका डिल्ली चौधरी मन्त्री हुने सम्भावना छ । कांग्रेसबाट प्रमुख सचेतक फकरुद्दिन खान र पाल्पाका वीरबहादुर रानाको पनि चर्चा छ । माओवादीबाट यसअघि सरकारमा सहभागी भएका सुदर्शन बराल, दाङकी दामाकुमारी शर्मा र प्रमुख सचेतक घर्तीको चर्चा छ । माओवादीमा अनुभवी वा नयाँलाई पठाउने भन्ने मै विवाद छ । जसपाबाट संसदीय दलका नेता सहश्रराम यादव मन्त्री बन्दैछन् ।

कसलाई कुन मन्त्रालय दिने भन्ने विषयमा काठमाडौंमा पनि प्रमुख नेताहरुबीच छलफल चलिरहेको एक नेताले बताए । स्रोतका अनुसार लुम्बिनी प्रदेशमा मन्त्री छान्न काठमाण्डौंमा माओवादीका वर्षमान पुन, कांग्रेसका बालकृण्ण खाँण र जसपाका मोहम्मद इस्तिहाक राईबीच छलफल जारी छ ।

८७ सदस्य रहेको लुम्बिनी प्रदेशमा कारबाही र राजीनामा प्रकरणपछि ८० सदस्य मात्र छन्। बहुमतका लागि ४१ सदस्य आवश्यक पर्छ । गठबन्धनमा कांग्रेसका १९, माओवादीका सभामुखसहित १९, जनता समाजवादीका ३ र जनमोर्चाका १ गरी ४२ सदस्य छन् । अल्पमतमा परेको एमालेमा ३७ जना छन् । नवलपरासी पश्चिमबाट सूर्य चिन्ह लिएर स्वतन्त्रबाट निर्वाचित सांसद अजय शाही बुधबारदेखि ४ दलको गठबन्धनमा खुलेपछि गठबन्धनमा सांसद संख्या ४३ पुगेको छ ।

प्रकाशित : श्रावण २८, २०७८ ११:५९
प्रतिक्रिया
पठाउनुहोस्
जनताको राय

सहकारी ठग्नेलाई कारबाहीको दबाब दिन प्रमुख विपक्षी दल कांग्रेसले गरेको सडक आन्दोलन घोषणालाई कसरी लिनुभएको छ ?