निरंकुश प्रवृत्तिको पराजय र नेपाली जनताको जित : नेपाल- समाचार - कान्तिपुर समाचार

निरंकुश प्रवृत्तिको पराजय र नेपाली जनताको जित : नेपाल

कान्तिपुर संवाददाता

काठमाडौँ — नेकपा एमालेका वरिष्ठ नेता तथा पूर्व प्रधानमन्त्री माधव कुमार नेपालले निरंकुश प्रवृत्तिको पराजय र नेपाली जनताको जित भएको बताएका छन् । 

प्रधानमन्त्री शेरबहादुर देउवालाई विश्वासको मत दिएका नेता नेपालले संसद् बैठकपछि नेपाली जनताको जित भएको बताएका हुन् । नेता नेपालसहित २२ जना एमाले सांसदहरुले प्रधानमन्त्री देउवालाई विश्वासको मत दिएका थिए । यससँगै देउवाले १६५ मत पाएका छन् भने विपक्षमा ८३ र मत दिन हुँदैन भन्नेमा १ मत परेको छ ।

‘संसद्को यो निर्णयले पटक–पटक भएको प्रतिनिधिसभा विघटन गलत भएको पुष्टि भएको छ,’ नेता नेपालले भने, ‘यो प्रतिनिधिसभाले स्थायित्व दिन सक्दैन भन्ने स्थापित गर्न खोजिएको थियो तर त्यो असफल भई निरंकुश प्रवृत्तिमा अंकुश लागेको छ ।’ साथै उनले जनता, लोकतन्त्र र संविधानको जित भएको बताएका छन् ।

त्यस्तै जनता समाजवादी पार्टीका संघीय परिषद् अध्यक्ष डा. बाबुराम भट्टराईले निवर्तमान प्रधानमन्त्री केपी शर्मा ओलीको अत्यन्त विध्वंशकारी हर्कत पतन भएको बताएका छन् । संसद् बैठकपछि सञ्चारकर्मीसँग बोल्दै डा. भट्टराईले ओलीको हर्कतले उनको पतन हुनु स्वभाविक भएको बताए । ‘ओली सरकारको पतनपछि हामीले शेरबहादुर देउवाजीको नेतृत्वमा सरकारमा गएका हौँ,’ डा. भट्टराईले भने, ‘यो एक प्रकारको ०६५,६६ पछि कांग्रेस, माओवादी र मधेसी दलको टुटेको सहकार्य फेरि जोडिएको छ ।’

यो सरकार निर्माण हुनु अहिलेको आवश्यक्ता रहेको समेत उनको भनाइ थियो ।

प्रकाशित : श्रावण ४, २०७८ ०६:०६
प्रतिक्रिया
पठाउनुहोस्

प्रधानमन्त्री देउवालाई भारतीय समकक्षी मोदीले दिए बधाई

कान्तिपुर संवाददाता

काठमाडौँ — प्रधानमन्त्री शेरबहादुर देउवालाई भारतीय प्रधानमन्त्री नरेन्द्र मोदीले बधाई दिएका छन् । आइतबार संसद्मा विश्वासको मत पाएसँगै मोदीले देउवालाई बधाई दिएका हुन् । यसअघि प्रधानमन्त्रीमा नियुक्त भएसँगै भारतीय प्रधानमन्त्रीले बधाई दिने गरे पनि यसपालि भने ढिला गरी बधाई आएको हो ।

मोदीले नरेन्द्र मोदी नामको ट्विटर ह्यान्डलबाट बधाई दिएका हुन् । उनले लेखेका छन्, ‘प्रधानमन्त्री शेरबहादुर देउवालाई बधाई तथा सफल कार्यकालको शुभकामना । म हाम्रो सबै क्षेत्रमा रहेको अनौठो साझेदारीलाई बढाउन र नागरिकको बीचमा रहेको गहिरो सम्बन्धलाई मजबुत बनाउन तपाईंसँग सहकार्य गर्न तयार छु ।’

प्रधानमन्त्री शेरबहादुर देउवालाई आइतबार १६५ जना सांसदले विश्वासको मत दिएका छन् । प्रधानमन्त्री देउवाको विपक्षमा ८३ मत खस्यो भने ‘मत दिन्नँ’ भन्ने पक्षमा १ मत खसेको थियो । देउवालाई एमालेका २२ जना सांसदले समेत विश्वासको मत दिएका थिए ।

देउवाले साउन २९ गते प्रधानमन्त्रीको जिम्मेवारी सम्हालेका थिए । सर्वोच्च अदालतको साउन २८ गतेको फैसलाअनुसार राष्ट्रपति विद्यादेवी भण्डारीले भोलिपल्ट देउवालाई प्रधानमन्त्री पदको शपथ खुवाएकी थिइन् ।

प्रकाशित : श्रावण ३, २०७८ २२:५३
पूरा पढ्नुहोस्
प्रतिक्रिया
पठाउनुहोस्
×