ललिता निवासका जग्गाधनीलाई २१ दिने सूचना- समाचार - कान्तिपुर समाचार
कान्तिपुर वेबसाईट
AdvertisementAdvertisement

ललिता निवासका जग्गाधनीलाई २१ दिने सूचना

‘जग्गा आफ्नो भएको दाबी भए आधार र प्रमाणसहित मालपोत कार्यालयमा आउनु’
कृष्ण ज्ञवाली

काठमाडौँ — मालपोत कार्यालय डिल्लीबजारले बालुवाटारस्थित ललिता निवासको अतिक्रमित जग्गा सरकारको नाममा फिर्ता ल्याउने प्रक्रिया थालेको छ । भूमिसुधार तथा मालपोत कार्यालय डिल्लीबजारले आइतबारबाट एक सार्वजनिक सूचना जारी गरी जग्गा सरकारीकरण प्रक्रिया थालेको हो । 

फाइल तस्बिर

भूमिसुधार तथा मालपोत कार्यालयले २१ दिने सूचना जारी गरी ललिता निवासको सरकारी जग्गा व्यक्तिको नाममा दर्ता गरेका र तिनीहरुबाट किनेका जग्गाधनीहरुलाई २१ दिने सूचना जारी गरी त्यो जग्गा आफ्नो हकदाबी गर्ने भए आधार र कारणसहित उपस्थित हुन भनेको हो । ‘तपसिलको जग्गा सरकारको नाममा जारी नगर्नुपर्ने कुनै कारण भए’ सूचनामा भनिएको छ, ‘आफ्नो भएको भनाइ सबुत कागज प्रमाणसहित यस कार्यालयमा लिखित प्रतिक्रियासहित उपस्थित हुन सूचना प्रकाशित गरिएको छ ।’



मालपोत कार्यालयले आफू आउन नसक्ने भएमा वारेस वा कानून व्यवसायीलाई पठाए पनि हुने सुविधा दिएको छ भने जग्गाधनीहरुले इमेलमा पनि आफ्नो प्रतिक्रिया वा प्रमाण पेश गर्न सक्ने भनिएको छ । यसरी सूचना जारी गरिनेमा ४९ कित्ता जग्गाका जग्गाधनीहरु छन् । यीमध्ये अधिकांशमा जग्गाधनीको नाम दोहोरिएको छ । कतिपय जग्गाधनीहरु यसअघि नै उपस्थित भएकाले मालपोत कार्यालयले सूचना जारी गरेको छैन ।

सूचनामा परेकाहरुमा ललिता निवास जग्गा अनियमितता प्रकरणमा मुछिएका एवं योजनाकार भनिएका शोभाकान्त ढकाल, रामकुमार सुवेदी र उनका परिवारका सदस्य छन् । भाटभटेनी डिपोर्टमेन्ट स्टोरका सञ्चालक मिनबहादुर गुरुङसहित उनका परिवारका सदस्य र कम्पनीको नामको जग्गाबारे समेत सूचना जारी गरिएको छ । केही राणा परिवारलाई पनि सूचना जारी गरिएको छ । त्यसबाहेक जग्गा अनियमितता गर्नेले बेचेको जग्गा किन्ने जग्गाधनीहरुलाई पनि सूचना जारी गरिएको छ । यो सूचनामा गैरआवासीय नेपाली संघ परेको छैन । यसअघि सरकारका नाममा जग्गा दाखिला गरेका जग्गाधनीहरु पनि सूचनामा परेका छैनन् ।

ललिता निवास जग्गा प्रकरणको मुद्दा अहिले विशेष अदालतमा विचाराधीन छ । केही आरोपितहरु विशेष अदालतमा उपस्थित भएर धरौटी वा तारिखमा छुटेका छन् भने केही थुनामा छन् । कांग्रेस नेता एवं पूर्व उपप्रधानमन्त्री विजयकुमार गच्छदारलगायतका आरोपितहरु अहिलेसम्म अदालतमा उपस्थित भएका छैनन् । सबै आरोपित अदालतमा उपस्थित नभएका कारण विशेष अदालतमा विचाराधिन मुद्दा अघि बढ्न सकेको छैन ।

प्रकाशित : जेष्ठ २३, २०७८ ११:३५
प्रतिक्रिया
पठाउनुहोस्

पीसीआर रिपोर्टमा फोटो नचाहिने

‘विरोध आएपछि दोहा र दिल्लीको उडानलाई सहजीकरण गरियो’
कान्तिपुर संवाददाता

काठमाडौँ — हवाई उडान खुला गरिएका मुलुकबाट नेपाल आउन यात्रुले अनिवार्य रूपमा ‘बारकोड तथा फोटोसहितको पीसीआर रिपोर्ट (नेगेटिभ)’ ल्याउनुपर्ने भन्दै अनौठो मापदण्ड राखिएपछि सुरु भएको चर्को विरोधका कारण सरकारले तत्काल यो निर्णय फिर्ता लिएको छ ।

विशेषत: दोहा तथा दिल्लीबाट यसै साता सुरु हुन लागेको काठमाडौंको साप्ताहिक नियमित उडानमा नेपाल आउन यात्रुले ‘फोटोसहितको पीसीआर रिपोर्ट अनिवार्य’ भनिएपछि र कतार, भारतसहितका मुलुकमा पीसीआर रिपोर्टमा फोटो नराखिने भएपछि ती देशका उडान रोकिने स्थिति आएको थियो ।

नागरिक उड्डयन प्राधिकरणको उडान अनुमति शाखाले शनिबार जारी गरेको आन्तरिक परिपत्रमा ‘यात्रुको पीसीआर रिपोर्टमा बारकोड वा फोटो जे भए पनि स्वीकार्य हुने’ सूचना दिइएको छ । शाखाका प्रबन्धक हिराजन काफ्लेले ‘फोटोसहितको पीसीआर रिपोर्ट सबै अवस्थामा र सबै मुलुकबाट उपलब्ध नहुने हुनाले यो कठिनाइ हटाउन यात्रामा सहजीकरण गरिएको’ कान्तिपुरलाई बताए । उनका अनुसार, आइतबार संस्कृति, पर्यटन तथा नागरिक उडड्यन मन्त्रालयले पीसीआर रिपोर्टको नयाा प्रबन्धबारेको औपचारिक सूचना सार्वजनिक गर्दै छ ।

सम्बन्धित समाचार

– दोहा र दिल्ली उडान अनिश्‍चित

प्रकाशित : जेष्ठ २३, २०७८ ११:३१
पूरा पढ्नुहोस्
प्रतिक्रिया
पठाउनुहोस्
×