चितवनमा निषेधाज्ञा जेठ २७ सम्म

कोरोनाको दोस्रो लहरमा संक्रमण तिब्र भएसँगै चितवनमा सुरुमा बैशाख १६ गते मध्यरातदेखि बैशाख ३१ गते मध्येरातसम्म निषेधाज्ञा जारी भएको थियो । त्यसपछि निषेधज्ञाको अवधि थप हुँदै आएको छ । यसअघि उल्लेख भएका सवै आदेशहरु यो पटक पनि कायमै छन् । भिडभाड हुने सवै खाले गतिविधिमा रोक लागेको छ । अत्यावश्यक सेवा लिने दिने व्यक्तिले सुरक्षा मापदण्ड अपनाउन अनिवार्य गरिएको सूचनामा उल्लेख छ ।

निषेधाज्ञा लागेको महिना दिन पार हुँदा चितवनमा संक्रमण केही कम हुँदै गएको देखिएको छ । चितवन स्वास्थ्य कार्यालयले बुधबार दिउँसो गराएको जानकारी अनुसार जिल्लामा सक्रिय संक्रमितको संख्या चार हजार ६०५ रहेको छ । जेठ १४ मा चार हजार ९३५ पुगेको थियो । त्यसयता थोरै भए पनि सक्रिय संक्रमित कम हुन थालेका छन् । चितवनका संक्रमितमध्ये हालसम्म २२१ जनाको निधन भएको स्वास्थ्य कार्यालयले जनाएको छ ।