षड्यन्त्रकारीहरूको उक्साहट र चाहनामा फेरि संसद्को चीरहरण भयो : नेपाल- समाचार - कान्तिपुर समाचार
कान्तिपुर वेबसाईट
AdvertisementAdvertisement

षड्यन्त्रकारीहरूको उक्साहट र चाहनामा फेरि संसद्को चीरहरण भयो : नेपाल

'यो प्रतिगमन भाग २ हो । केपी ओलीको यो कदमको भर्त्सना गर्दछु । यसको प्रतिवाद डटेर गर्न आह्वान गर्दछु !'
कान्तिपुर संवाददाता

काठमाडौँ — नेकपा एमालेका वरिष्ठ नेता माधवकुमार नेपालले पुन: प्रतिगमन दोहोरिएको बताएका छन् । शनिबार बिहान ट्वीट गर्दै नेता नेपालले 'षड्यन्त्रकारीहरूको उक्साहट र चाहनामा फेरि पनि संसद्को चीरहरण भएको' बताएका हुन् ।

उनले संविधानको मर्ममाथि प्रहार गर्दै सर्वसत्तावाद लाद्ने उद्देश्यले कथित चुनावको उदघोष गर्दै जालझेल गरिएको बताएका छन् । उनले लेखेका छन्, 'यो व्यवस्था नै कू गर्ने अग्रसरता हो । शीतल निवासले संविधानको मर्मलाई कुठाराघात गरेको छ । यो प्रतिगमन भाग २ हो । केपी ओलीको यो कदमको भर्त्सना गर्दछु । यसको प्रतिवाद डटेर गर्न आह्वान गर्दछु !'

सरकार निर्माणका सबै संवैधानिक ढोकाहरू बन्द भएपछि प्रधानमन्त्री केपी शर्मा ओलीले प्रतिनिधिसभा विघटन र चुनावको मिति राष्ट्रपतिसमक्ष सिफारिस गरेका थिए । राष्ट्रपति भण्डारीले मध्यराति प्रधानमन्त्री पदका लागि ओली र शेरबहादुर देउवाले गरेको दाबी नपुग्ने निर्णय गरेलगत्तै सरकार निर्माणका लागि संविधानअन्तर्गतका सबै ढोकाहरू बन्द भएका थिए ।

त्यसपछि राति १२ बजे प्रधानमन्त्री ओलीले मन्त्रिपरिषद् बैठक बोलाएर १२ बजेर ४५ मिनेटमा संविधानको धारा ७६ (७) बमोजिम प्रतिनिधिसभा विघटनको सिफारिस गर्दै दुई चरणमा चुनावको मिति तय गरेका हुन् ।

प्रधानमन्त्री केपी शर्मा ओलीले बिहीबार ‘मौजुदा सरकारलाई विश्वासको मत प्राप्त हुने दह्रो राजनीतिक आधार नदेखिएको’ जनाउँदै सरकार निर्माणका लागि राष्ट्रपतिलाई धारा ७६ (५) अन्तर्गतको प्रक्रिया अघि बढाउन अनुरोध गरेका थिए ।

त्यसै अनुरोधबमोजिम राष्ट्रपति विद्यादेवी भण्डारीले दलहरुलाई सरकार गठनका लागि आह्वान पनि गरेकी थिइन् । कांग्रेस सभापति शेरबहादुर देउवाले कांग्रेसका ६१, माओवादी केन्द्रका ४९, नेकपा एमाले माधव नेपाल समूहका २६, जसपा उपेन्द्र यादव र बाबुराम भट्टराई समूहका १२ र जनमोर्चाका १ गरी १४९ जना सांसदको समर्थन आफूलाई भएको दाबी गरेका थिए । त्यस्तै ओलीले पनि एमालेका सबै १२१ र जसपाका ३२ सांसद गरी आफूलाई १५३ सांसदको समर्थन रहेको दाबी राष्ट्रपतिसमक्ष पेस गरेका थिए ।

प्रकाशित : जेष्ठ ८, २०७८ ०९:१८
प्रतिक्रिया
पठाउनुहोस्

जथाभावी औषधि खाँदा मृत्यु

कान्तिपुर संवाददाता

परासी — पश्चिम नवलपरासीको रामग्राम नगरपालिका–१० का ४५ वर्षीय पुरुषको श्वासप्रश्वासमा समस्या र निमोनियाले गालेपछि गत सोमबार निधन भयो । १५ दिन ज्वरो आउने र टाउको दुख्ने समस्या देखिएका उनले सुरुमा सिटामोल र ज्वरो नरोकिएपछि नजिकैको फार्मेसी पसलबाट टाइफाइडको औषधि किनेर खाएका थिए । फार्मेसी पसलेले सामान्य जाँच गरेर टाइफाइड भएको र औषधि खाएपछि निको हुने भन्दै एन्टिबायोटिक चलाएको तीन दिनमै उनको मृत्यु भएको हो ।

फार्मेसीबाट औषधि किनेर खान थाले पनि ज्वरो नरोकिएको र खोकी लाग्ने र श्वासप्रश्वासमा समस्या बढेर गएको आफन्तले बताए । श्वासप्रश्वासमा अप्ठ्यारो भएपछि बल्ल उनलाई आफन्तले पृथ्वीचन्द्र जिल्ला अस्पतालमा उपचारका लागि पुर्‍याएका थिए । अस्पतालमा एक्सरे गर्दा कडा खालको निमोनिया देखिएको र चिकित्सकले किन ढिलो गरेर अस्पताल ल्याएको भनेर सोधखोज गर्दा फार्मेसीबाट जथाभावी औषधि किनेर खाएको पत्ता लागेको थियो । उनले सुरुवाती चरणमै टाइफाइडको कडा प्रकृतिको औषधि सेवन गरेकाले अवस्था नाजुक बनेको चिकित्सकले बताए ।

चिकित्सकले ढिलो गरेर अस्पताल आउँदा ज्यान बचाउन नसकेको बताए । ‘ज्वरो आएपछि परासीको फार्मेसीमा औषधि र तीन दिनसम्म सुई लगाएको हो । तर पनि ज्वरो निको भएन,’ रामग्राम–१० का निलु गुप्ताले भने, ‘सामान्य ज्वरो होला भनियो । तर, यसपटक कोरोनाले भेटेको रहेछ । आफ्नै लापरबाहीले गर्दा ज्यान गयो ।’

पृथ्वीचन्द्र जिल्ला अस्पतालका कोरोना फोकल पर्सन डा. राजकुमार गुप्ताले कोरोना संक्रमितले आफ्नै स्वास्थ्यमा लापरबाही गर्दा मृत्यु हुने गरेको बताए । ‘समयमै चिकित्सकको परामर्शअनुसार औषधि सेवन गर्ने संक्रमित घरमा नै बसे पनि निको भएका छन्,’ उनले भने, ‘परासी क्षेत्रमा कोरोना संक्रमितले फार्मेसीमा गएर जथाभावी औषधि सेवन गर्ने र कडा खालको टाइफाइडको औषधि सेवन गर्ने गरेको भेटिएको छ ।’

प्रकाशित : जेष्ठ ८, २०७८ ०८:४८
पूरा पढ्नुहोस्
प्रतिक्रिया
पठाउनुहोस्
×