प्रधानमन्त्रीका लागि मरिहत्ते गरेको छैन, पाए भाग्ने कुरा छैन : देउवा- समाचार - कान्तिपुर समाचार
कान्तिपुर वेबसाईट
AdvertisementAdvertisement

प्रधानमन्त्रीका लागि मरिहत्ते गरेको छैन, पाए भाग्ने कुरा छैन : देउवा

विपक्षी दलको भूमिका सही रूपमा निभाऔं : पौडेल 
रमेशकुमार पौडेल

चितवन — कांग्रेस सभापति शेरबहादुर देउवाले प्रधानमन्त्री पदका लागि आफू मरिहत्ते नगर्ने तर पाएदेखि नभाग्ने बताएका छन् । चितवनको रत्‍ननगरमा पार्टीका नेता स्वर्गीय एकनाथ रानाभाटको १३औं दिनको श्रद्धाञ्जली कार्यक्रममा बोल्दै सभापति देउवाले यस्तो बताएका हुन् ।

कार्यक्रममा सभापति देउवा र वरिष्ठ नेता रामचन्द्र पौडेलबीच भावी राजनीतिक कदमका विषयमा घोचपेच समेत चलेको थियो ।

वरिष्ठ नेता पौडेलले संसद् विघटनबाट जोगिए पनि विकृतिबाट जोगाउन आवश्यक रहेको बताएका थिए । आफ्नो हैसियत र औकातभन्दा बढी आकंक्षा र महत्वकांक्षा राख्नु विकृति भएको पौडेलले बताए । कांग्रेसले सही रूपमा विपक्षको भूमिका निभाउनु पर्ने पनि उनले बताए । 'हामी संसद्मा सानो संख्यामा छौं तर भूमिका र महत्व ठूलो छ । यो भूमिका पूरा नगरे लोकतन्त्रको रक्षा कसरी हुन्छ ?' पौडेलले भने ।

पौडेलपछि बोलेका सभापति देउवाले भने आफू पार्टी सरकारमा जाँदा र आफू प्रधानमन्त्री हुँदा पार्टीलाई फाइदा हुने बताएका थिए । 'रामचन्द्रजी तपाईं सानो चित्त नगराउनुस, तपाइँको कुरा सुन्दा शेरबहादुर प्रधानमन्त्री नहोस्, अरू होस् भन्नेजस्तो बुझिन्छ । त्यसो नगर्नस् । म प्रधानमन्त्री भए पार्टीलाई फाइदै हुन्छ,' उनले भने ।

महामन्त्री शशांक कोइराला भने वर्तमान राजनीतिक विषयमा मौन रहे । बुधबार बिहान चितवनमा आयोजित पत्रकार सम्मेलनमा भने कोइरालाले कांग्रेस दाहाल-नेपाल समूहसँग मिलेर सरकारमा जानुपर्ने बताएका थिए ।

प्रकाशित : फाल्गुन १९, २०७७ १६:३५
प्रतिक्रिया
पठाउनुहोस्

सल्यानमा डढेलोका कारण तीन घर जलेर नष्ट 

विप्लव महर्जन

काठमाडौँ — वनमा लागेको डढेलोका कारण छत्रेस्वरी गाउँपालिका ४ झिम्पेको दुदिल्य बस्तीका तीन घर जलेर नष्ट भएका छन् । 

रैजेखोला, चौखेढुंगा वनबाट सुरु भएको डढेलो बस्तीमा पुगेपछि स्थानीय दधिराम खत्रीका दुई र मोहलाल शर्माका एक गरी तीन घर जलेर नष्ट भएका हुन् ।

डढेलोका कारण बस्ती दुदिल्य बस्ती समेत जोखिममा परेको छ । आगोका कारण खत्री र शर्माका घरमा भएका अन्नपात, लत्ताकपडालगायत सबै सामग्री जलेर नष्ट भएका छन् भने स्थानीय ज्ञानबहादुर ओलीका घर बाहिर बाँधेका दुई बाख्रासमेत जलेर मरेका छन् । आगलागीबाट घर जलेर नष्ट हुँदा ५ लाख बढीको क्षति भएको प्रहरीले जनाएको छ ।

जिल्ला प्रहरी कार्यालय सल्यानका प्रनाउ गोविन्द थापाका अनुसार वनमा लागेको डढेलो बस्तीमा क्षति पुर्‍याएपछि नेपाली सेना, सशस्त्र, नेपाल प्रहरीको टोली र स्थानीयको सहयोगमा घरमा लागेको आगो र जंगलमा लागेको डढेलो नियन्त्रण गरिएको छ । बस्ती अझै जोखिममा परेकाले पुन: आगलागी भएमा तत्काल खबर गर्न उनले स्थानीयलाई आग्रह गरे ।

आगलागीका कारण घर जलेपछि बिचल्लीमा परेका खत्री र शर्माका परिवार अहिले छिमेकीको घरमा बस्दै आएका वडाध्यक्ष नेबबहादुर खड्काले बताए । । नेपाली सेना, प्रहरी र सशस्त्रले डढेलो निभाउने प्रयास गरे पनि पूर्ण रुपमा नियन्त्रणमा नआई जंगलमा फैलिएकाले बस्ती अझै जोखिममा रहेको उनले बताए । उनका अनुसार दुई दिनदेखि लागेको डढेलोका कारण ५ सय हेक्टरभन्दा बढी वनमा क्षति पुर्‍याएको छ । उनले स्थानीयलाई सजग रहनसमेत आग्रह गरेका छन् ।

प्रकाशित : फाल्गुन १९, २०७७ १६:२१
पूरा पढ्नुहोस्
प्रतिक्रिया
पठाउनुहोस्
×