बिहान राजीनामा, साँझ शपथ- समाचार - कान्तिपुर समाचार
कान्तिपुर वेबसाईट
AdvertisementAdvertisement

बिहान राजीनामा, साँझ शपथ

संसद्‍मा अविश्वास प्रस्ताव सामना गर्दा आफ्नै पार्टीका सांसदले फ्लोर क्रस गर्ने जोखिम देखिएपछि मुख्यमन्त्री पोखरेलले रोजे राजीनामा दिएर एमालेको एकल सरकार गठनको बाटो
अमृता अनमोल, घनश्याम गौतम

बुटवल — अविश्वास प्रस्ताव छल्न आइतबार बिहानै पदबाट राजीनामा दिएका शंकर पोखरेल विपक्षी गठबन्धनको तीव्र विरोधका बीच साँझ पुन: लुम्बिनी प्रदेशको मुख्यमन्त्री नियुक्त भएका छन् । ‘राजनीतिक रूप’ मा एकल बहुमत गुमिसकेको अवस्थाका पोखरेललाई साँझ पुन: नियुक्त गरी मुख्यमन्त्री कार्यालयमै पुगेर शपथग्रहण गराएपछि प्रदेश प्रमुख धर्मनाथ यादवमाथि पनि प्रश्न उठेको छ ।

आइतबार शपथग्रहणपछि लुम्बिनी प्रदेश सरकारका मुख्यमन्त्री शंकर पोखरेल र मन्त्रीहरू । तस्बिर : अमृता अनमोल/कान्तिपुर

संसद्मा अविश्वास प्रस्ताव सामना गर्दा आफ्नै पार्टीका सांसदले फ्लोर क्रस गर्ने जोखिम देखिएपछि पोखरेलले एमालेकै एकल बहुमतको सरकार बनाउने उद्देश्यले राजीनामा दिएका थिए । त्यही उद्देश्यअनुसार प्रदेश प्रमुख यादवले एकल बहुमतको दलका नेताको हैसियतमा पोखरेललाई पुन: मुख्यमन्त्रीमा नियुक्त गरे ।

साँझ पोखरेलले शपथ लिनुअघि एमालेकै पक्षमा रहेका सांसदको विपक्षी गठबन्धनमा प्रवेश र राजीनामाले राजनीतिक रूपमा पोखरेलको बहुमत गुमिसकेको थियो । ४२ जना सांसदको हस्ताक्षरसहित कांग्रेस र माओवादीले प्रदेश प्रमुख यादवको कार्यालयमै पुगेर आफ्नो पक्षको सरकार बन्नुपर्ने निवेदन दिएका थिए ।

प्रदेश प्रमुख कार्यालयमा विपक्षी गठबन्धनका सांसदहरू धर्नासमेत बसिरहेको अवस्थामा पोखरेलले साँझ शपथ लिए । यी सबै घटनाक्रमबारे जानकार रहेका प्रदेश प्रमुख यादव आफ्नो कार्यालयमा विपक्षी पार्टीहरूले गरिरहेको धर्नाकै बीचबाट मुख्यमन्त्री कार्यालय पुगेर शपथ गराएका थिए । लुम्बिनी प्रदेशमा आइतबार देखिएको सत्ता राजनीतिका अनौठा दृश्यले यसमा संलग्न पात्रहरूको राजनीतिक र नैतिक धरातलमाथि त प्रश्न उठेकै छ, आगामी दिनमा झन् बढी सत्ता किचलोको बीउ रोपिएको छ ।

वैशाख पहिलो साता नेपाली कांग्रेस, माओवादी केन्द्रलगायत दलले मुख्यमन्त्री पोखरेलविरुद्ध अविश्वास प्रस्ताव दर्ता गराएका थिए । लगत्तै ती दलले प्रदेश प्रमुख धर्मनाथ यादवसमक्ष प्रदेशसभा आह्वान गर्न समावेदन गरेका थिए । समावेदनअनुसार आइतबार मध्याह्न प्रदेशसभामा अविश्वास प्रस्तावमाथि छलफल र सोमबार विश्वासको मत विभाजन गर्ने कार्यसूची थियो । आइतबार बिहानै मुख्यमन्त्री पोखरेलले पदबाट राजीनामा दिएपछि लुम्बिनी प्रदेश एकाएक राजनीतिक हटस्पटमा रूपान्तरण भयो । दिनभर राजनीतिक घटनाक्रम बिजुलीको गतिमा परिवर्तन भए ।

बिहान एमाले संसदीय दलको बैठकले आफ्नै एकल बहुमतको आधारमा सरकार निर्माण गर्ने र मुख्यमन्त्रीमा पोखरेललाई निरन्तरता दिने निर्णय गर्‍यो । त्यसपछि मध्याह्न पोखरेलले प्रदेश प्रमुखसमक्ष आफ्नो पक्षमा बहुमत पुगेकाले संविधानको धारा १६८ को (१) बमोजिम मुख्यमन्त्रीमा पुन: नियुक्तिका लागि दाबी पेस गरे । त्यससँगै प्रदेशसभा अन्त्य गर्न सिफारिस गरे । अर्कोतर्फ विपक्षीको मोर्चाबन्दी चलिरहेको थियो । त्यसैले दिउँसो १ बजे एमालेको पक्षमा बहुमत नरहेको मौखिक जानकारी दिन कांग्रेस, माओवादी, जनता समाजवादी पार्टी र राष्ट्रिय जनमोर्चासहितका प्रदेश सदस्य प्रदेश प्रमुखलाई भेट्न गए ।

कांग्रेस प्रमुख सचेतक फकरुद्धिन खानले दिउँसो एक बजे प्रदेश प्रमुखलाई भेटेर ४० जना सांसदको हस्ताक्षरको प्रतिलिपि देखाउँदै पोखरेलले संविधानको धारा १६८ (१) बमोजिम गरेको एकल बहुमतको सरकारको दाबी अवैध हो भनेर जानकारी गराएको दाबी गरे । त्यही बीचमा तत्कालीन नेकपाबाट उपनिर्वाचन लडेकी दाङकी विमलाकुमारी खत्री (वली) ले माओवादी पार्टी रोजेको घोषणा गरिन् । उनले दाङ निर्वाचन क्षेत्र ३ (१) बाट उपनिर्वाचन जितेकी थिइन् । उक्त निर्वाचन क्षेत्रबाट उनका पति उत्तरकुमार वली एमालेबाट निर्वाचित थिए । उनको सडक दुर्घटनामा परेर मृत्यु भएपछि त्यही स्थानमा खत्री उम्मेदवार बनेकी थिइन् ।

विपक्षी मोर्चाका अनुसार खत्री शनिबारै माओवादी संसदीय दलको बैठकमा सहभागी भएकी थिइन् । एकातिर पोखरेलले एकल बहुमत हासिल गरेको खबरले सामाजिक सञ्जालमा स्थान पाइरहेको थियो । त्यहीबेला सांसद खत्री माओवादी प्रवेश गरेको खबर फैलिएको थियो । एमाले नेताहरूले खत्रीलाई अपहरण गरिएको आरोप लगाएका थिए । उक्त आरोप चिर्न उनले दिउँसो बुटवलमा पत्रकार सम्मेलन गरिन् र आफ्नै खुसीले माओवादी केन्द्र रोजेको बताइन् । ‘निर्वाचनका बेला मैले माओवादीबाट सपोर्ट पाएकी थिएँ, कसैले मलाई आउनुपर्छ भनेकाले होइन, मैले आफ्नै खुसीले यो दल रोजेकी हुँ,’ उनले भनिन् । आफू निर्वाचित भएर आउँदा एमाले र माओवादी एकजुट रहेको, त्यतिबेला को माओवादी र को एमाले भन्ने आफूलाई थाहा नभएको उनको भनाइ थियो ।

खत्रीले पार्टी फेरेको खबर सेलाउन नपाउँदै कपिलवस्तुबाट प्रतिनिधित्व गर्ने एमालेका दृगनारायण पाण्डेले प्रदेशसभा सदस्यबाट राजीनामा दिए । उनी एमालेको तर्फबाट कपिलवस्तुको निर्वाचन क्षेत्र २ (ख) बाट निर्वाचित थिए । बिहान एमाले संसदीय दलको बैठकमा सहभागी भएपछि उनले पार्टीमा तानाशाहीकरण भएको उल्लेख गर्दै राजीनामा गरेका थिए । उनले सभामुखसमक्ष राजीनामा दिएको बताए । त्यसपछि कपिलवस्तु र नवलपरासी पश्चिमबाट सूर्यचिह्न लिएर स्वतन्त्र लडेका धर्मबहादुरलाल श्रीवास्तव र अजय शाहीले पनि आफ्नो समर्थन विपक्षी दलको गठबन्धनलाई रहेको घोषणा गरे । अपराह्न विपक्षी दलले प्रदेश प्रमुखसमक्ष कुलप्रसाद केसीलाई मुख्यमन्त्री नियुक्त गर्न माग गर्दै पेस गरेको पत्रमा श्रीवास्तव र शाहीको हस्ताक्षर छ । उनीहरूसमेत ४२ जनाले केसीलाई मुख्यमन्त्री नियुक्त गर्न माग गरेका छन् ।

श्रीवास्तव कपिलवस्तुको निर्वाचन क्षेत्र २ (ख) बाट निर्वाचित सांसद हुन् । शाही पश्चिम नवलपरासीको निर्वाचन क्षेत्र १ को (ख) बाट निर्वाचिन सांसद हुन् । उनीहरूले समर्थन नजनाएपछि एमाले ४१ बाट घटेर ३७ सदस्यमा खुम्चिएको छ । यस्तो खिचातानीका बीचमा विपक्षी गठबन्धनले लिखित निवेदन बुझाउन नपाउँदै दिउँसो साढे ३ बजे प्रदेश प्रमुखले मुख्यमन्त्रीमा शंकर पोखरेललाई नियुक्त गरेको विज्ञप्ति प्रकाशित गरे । प्रदेश प्रमुखको कार्यालयद्वारा जारी प्रेस विज्ञप्तिमा माननीय शंकर पोखरेलले आफ्नो नेतृत्वमा संविधानको धारा १६८ को उपधारा (१) बमोजिम सरकार गठन गर्न प्रदेशसभाका बहुमत सदस्यहरूको हस्ताक्षरसहित दाबी पेस गरेकाले मुख्यमन्त्रीमा नियुक्त गरिएको उल्लेख छ ।

त्यसपछि आक्रोशित विपक्षी गठबन्धन अपराह्न ४ बजे एमालेको पक्षमा बहुमत नरहेको र आफ्नो पक्षमा ४२ सांसद रहेको दाबी गर्दै हस्ताक्षरसहितको पत्र लिएर प्रदेश प्रमुखको कार्यालयमा पुगेको थियो । उनीहरूले पोखरेलको नियुक्ति बदर गर्न र शपथ रोक्न दबाब दिएका थिए । कांग्रेस संसदीय दलका नेता वीरेन्द्रकुमार कनौडियाले प्रदेश प्रमुखले सत्ता र शक्ति दुरुपयोग गरेर संविधानविपरीत पोखरेललाई मुख्यमन्त्रीमा नियुक्त गरेको बताए । ‘हामी ४ दल र स्वतन्त्रका २ गरी ४२ सदस्यको हस्ताक्षर लिएर आएका छौं,’ उनले भने, ‘पोखरेलको नियुक्ति बदर गरेर हाम्रो प्रक्रिया अघि बढाउनुपर्छ ।’

कार्यालयमा केहीबेर चर्काचर्की भएपछि प्रदेश प्रमुख यादवले गठबन्धनको निवेदन बुझेका थिए । उक्त निवेदन कार्यालयमा दर्ता गरिएको छ । निवेदनमा संविधानको धारा १६८ को उपधारा (२) बमोजिम दुई वा दुईभन्दा धेरै दलको सरकार बनाउने प्रस्ताव थियो । मुख्यमन्त्रीमा माओवादी संसदीय दलका नेता कुलप्रसाद केसीलाई प्रस्ताव गरिएको थियो । निवेदन बुझाएपछि पनि चार दलीय गठबन्धन विश्वस्त बनेन ।

४२ प्रदेशसभा सदस्य साँझसम्म प्रदेश प्रमुखको कार्यालयबाहिर शपथ रोक्न र नियुक्ति बदर गर्न माग गर्दै धर्नामा बसेका थिए । साँझ माओवादी संसदीय दलका नेता बल प्रयोग गरेर प्रदेश प्रमुखको कार्यालयभित्र प्रवेश गरे । बहुमत सदस्यबाट आफू मुख्यमन्त्री प्रस्तावित भएकाले प्रदेश प्रमुखले रोक्न नसक्ने र रोके जस्तोसुकै कदम उठाउने उनले चेतावनी दिए । ‘प्रदेश प्रमुखले संविधानको उल्लंघन र जनमतको अनादर गर्न पाइन्न, मलाई मुख्यमन्त्री बन्न कसैले रोक्न सक्दैन,’ उनले कान्तिपुरसित भने । विपक्षीको धर्ना र विरोधका बीच आइतबार साँझै पोखरेलले पद तथा गोपनीयताको शपथ लिएका छन् ।

८७ सदस्य रहेको प्रदेशसभामा माओवादीबाट एमाले प्रवेश गरेका २, जसपाबाट सरकारमा सामेल भएका ४ सदस्य निष्कासनमा परेका छन् । एमालेका एक सदस्यले राजीनामा दिएपछि प्रदेशसभा ८० सदस्यमा खुम्चिएको छ । संघीयता र कानुनका जानकार अधिवक्ता महेन्द्रप्रसाद पाण्डेले शक्तिको आडमा नियम मिचेर कुनै पनि काम हुनु गलत भएको बताए ।

यस्तो थियो ‘रस्साकसी’

लुम्बिनी प्रदेशका चार प्रदेशसभा सदस्य पदबाट निष्कासनमा परेपछि मुख्यमन्त्री शंकर पोखरेल गत बिहीबारदेखि सरकार जोगाउन छलफलमा जुटेका थिए । एमालेले आइतबार संसदीय दलको बैठक बोलाएको थियो । पार्टीले कारबाही गरेका जसपाका चार सांसद कानुनी उपचार खोज्न काठमाडौं पुगेका थिए । जसपाले चार सांसदलाई कारबाही गरेपछि एमालेको एकल बहुमत पुग्ने भए पनि सम्भावित फ्लोर क्रस जोगाउन मुख्यमन्त्री पोखरेल छलफलमा थिए । शनिबारसम्म आफ्नै मतबाट सरकार जोगाउने रणनीतिमा पोखरेल थिए ।

एमालेमा दुई प्रदेशसभा सदस्य माधवकुमार नेपाल पक्षमा खुलेका छन् । उनीहरूको मत जोगाउने चुनौती थियो । नेपाल समूहमा खुलेका कपिलवस्तुका विष्णु पन्थी सरकार बनेदेखि आर्थिक मामिला तथा योजनामन्त्रीका आकांक्षी हुन् । मुख्यमन्त्री पोखरेलले तीन वर्षसम्म अर्थ मन्त्रालय आफैंले राखे । त्यसैले पन्थी सुरुदेखि असन्तुष्ट थिए । यसअघि कांग्रेस–एमाओवादी गठबन्धनले सरकारविरुद्ध अविश्वास प्रस्ताव पेस गरेपछि पोखरेलले गत वैशाख ६ मा जसपाका चार जनालाई मन्त्री बनाए । उनले एमाले नेता वैजनाथ चौधरीलाई आर्थिक मामिला तथा योजनामन्त्रीमा नियुक्त गरे ।

अविश्वास प्रस्ताव दर्तासँगै हतारमा जसपाबाट मन्त्री नियुक्त गरेपछि एमालेभित्रै असन्तुष्टि बढेको थियो । मन्त्रीका आकांक्षी कपिलवस्तुका दृगनारायण पाण्डे, प्यूठानका हरि रिजाल, अर्घाखाँचीका चेतनारायण आचार्य, रूपन्देहीका भोजप्रसाद श्रेष्ठ, गुल्मीका कमल श्रेष्ठ बढी असन्तुष्ट थिए । असन्तुष्ट एक प्रदेशसभा सदस्यले अविश्वास प्रस्ताव दर्ता भएकै दिन मन्त्री बनाएर मुख्यमन्त्रीले गम्भीर भूल गरेको प्रतिक्रिया दिएका थिए । ‘केही दिन कुर्नुपर्थ्यो, जसपा कसरी अघि बढ्छ भन्ने हेरेर मात्र मन्त्री दिएको भए हुन्थ्यो,’ उनले भने, ‘चारै जनालाई मन्त्री नदिएको भए पनि सरकार जोगिन सक्ने सम्भावना थियो, बेलैमा त्यो नसोच्दा अहिले संकट परेको छ ।’

राजीनामा दिएका एमाले सांसद पाण्डेले पार्टी नेतृत्वमा विकास भएको तानाशाहीकरण सहन नसकेर आफूले एमाले पार्टी र प्रदेशसभा सदस्यबाट राजीनामा दिएको आइतबार प्रतिक्रिया दिएका छन् । ‘आइतबार बिहान एमाले संसदीय दलको बैठकमा सहभागी भएँ,’ उनले भने, ‘त्यहाँ नेतृत्वबाट एकतर्फी कुरा आयो । हाम्रा कुरा र भनाइलाई पूरै बेवास्ता गरियो, मेरो चित्त दुख्यो ।

कागज खोजेर राजीनामा दिएँ ।’ आफूहरूलाई समर्थक र प्रस्तावकका रूपमा मात्र प्रयोग गरिएको उनले बताए । ‘जनताका कामलाई बेवास्ता गरियो,’ उनले भने, ‘झूटो आश्वासनले कति दिन राजनीति गर्ने ? मन मर्‍यो ।’ जनताको काम गर्नुभन्दा सधैं सत्तामै रहिरहने प्रवृत्ति चित्त नबुझेको उनले बताए । ‘जनताले तिरेको करको तलबभत्ता लिनु राम्रो लागेन,’ उनले भने, ‘पापले पोल्छ जस्तो लाग्यो ।’

पश्चिम नवलपरासी निर्वाचन क्षेत्र १ (ख) बाट सूर्यचिह्न लिएर जितेका शाहीले सरकारले सोचेजस्तो काम गर्न नसकेकाले विपक्षी गठबन्धनमा लागेको बताएका छन् । ‘हाम्रो स्वतन्त्र राजनीतिक समूहलाई सधैं पाखा लगाउने काम भयो, हामीले आत्मसम्मानसमेत नपाएकाले सरकारको समर्थमा रहिरहन सकेनौं,’ उनले भने ।

प्रकाशित : वैशाख २०, २०७८ ०६:४८
प्रतिक्रिया
पठाउनुहोस्

पीपीईले छोपेको पीडा

एक नर्सले ३०/४० जना बिरामीलाई औषधि खुवाउनुपर्छ । दबाइ खुवाएर मात्रै कहाँ सुख पाउनु ! बिरामीको छटपटीले मन पोल्छ । पीपीईभित्रको गर्मी त छँदै छ । वार्डबाट बाहिर निस्किएपछि ठूलो युद्ध जितेजस्तो महसुस गर्छन् तर त्यो क्षणिक हुन्छ ।
मधु शाही

नेपालगन्ज — कोरोना उपचार केन्द्र बनेको भेरी अस्पताल, नेपालगन्जकी स्टाफ नर्स प्रीति खड्कालाई शुक्रबार पीपीई लगाएर काम गर्ने जाँगरै थिएन । महिनावारी भएकाले सेनेटरी प्याड लगाउनुपर्ने बाध्यता थियो । त्यसमाथि पीपीई थपिँदा शरीर बाफिएर उकुसमुकुस हुन्छ । तर पीपीई नलगाए महामारीको सिकार हुने डर छ ।

संक्रमितको उपचारमा खटिएर थकित भएका भेरी अस्पतालका नर्स सुस्ताउँदै। तस्बिर सौजन्य : डा. चन्द्रप्रकाश साहु

पीपीई लाउनै पर्‍यो । यहाँ दिनहुँ संक्रमित थपिँदै छन् । सबैले सहज उपचार नपाउने समस्या छ । त्यसैले उनी नयाँ वर्षदेखि बिदा नबसी खटिएकी छन् ।

प्रीति शनिबार रात्रि ड्युटीमा खटिइन् । उनीसँगै स्टाफ नर्स कमला नेपाली, सुनीता साहकारी, निशा पुन, यमकुमारी थापा कोरोना संक्रमितको पलपलको अवस्था बुझ्दै हेरचाहमा खटिएका थिए । उनीहरूका अनुसार एक जनाले ३०/४० जना बिरामीलाई औषधि खुवाउनुपर्छ । दबाइ खुवाएर मात्रै कहाँ सुख पाउनु ! बिरामीको छटपटीले मन पोल्छ । पीपीईभित्रको गर्मी त छँदै छ । वार्डबाट बाहिर निस्किएपछि उनीहरूले ठूलो युद्ध जितेजस्तो महसुस गर्छन् । त्यो अनुभूति क्षणिक हुन्छ ।

उनीहरूलाई शनिबार अन्य दिनभन्दा धपेडी भयो । नयाँ सिफ्टका साथीहरू आउन ढिला गरेपछि पीपीई खोलेर बस्न सक्ने अवस्था रहेन । औषधि खुवाएर वार्ड बाहिर अस्पतालको छेउमा राखिएको सोफामा तीन जना नर्स लस्करै थकान मेट्दै थिए । त्यही बेला खिचेको तस्बिर शनिबार र आइतबार सामाजिक सञ्जालमा भाइरल बन्यो । तस्बिर कसले खिच्यो ? नर्स यमकुमारीलाई अलिअलि याद छ । थकाइले आँखा खुल्न सकेका थिएनन् । अस्पतालमा चेकअप राउन्डमा आएका चिकित्सक चन्द्रप्रकाश साहुले ‘तिमीहरूको फोटो खिच्दिऊँ’ भन्दै जिस्काएका थिए । ‘फेरि हामी भाइरल हौंला है’ भन्दै कोही हाँसेको थियो । बर्दियाकी प्रीति घरबाटै आउजाउ गर्छिन् । अस्पतालमा बस्ने ठाउँ छैन । परिवारसित ‘पराई’ भएर बस्नुपरेको छ । अरूलाई कोभिड सर्न सक्ने भएकाले उनी घर गए पनि छुट्टै बस्छिन् ।

प्रीतिलाई मज्जाले परिवारसँग गफ गरेर बस्ने दिन हराएजस्तो लाग्छ । साथीभाइ, आफन्त बिराना भएका छन् । अस्पताल र घर आउजाउबाहेक अरू उनको जीवनका उत्सवमय क्षण गौण छन् । उनले भनिन्, ‘निको भएका बिरामी हेरें भने मात्रै मुस्कान आउँछ ।’ शरीर सन्चो हुँदा काममा खटिन उनलाई खासै दु:ख लाग्दैन । जब महिनावारी हुन्छ, उनी दोहोरो चपेटामा हुन्छिन् । भाइरल भएको तस्बिरमा प्रीतिको थकानको कथा बेग्लै छ ।पेट दुखेर औषधि खाएकी थिइन् । पीपीईले आङका सबै लुगा निथ्रुक्कै भिजेका थिए । ‘औषधि खाएर यसो ढलेर आराम गर्दै थिएँ,’ प्रीतिले भनिन्, ‘साथीहरूले मायाले सुमसुमाउँदै थिए ।’

२३ वर्षीया यमकुमारी माइतीमै बसेर अस्पतालमा खटिएकी छन् । बिहे गरेको दुई वर्ष भयो । लकडाउनका कारण श्रीमान् उनीसँगै बस्न काठमाडौंबाट आएका छन् । यमकुमारीलाई भने पारिवारिक सम्बन्धतिर सोच्ने फुर्सद छैन । अस्पतालदेखि घर आउँदा पनि उनको बिरामीप्रतिको चिन्तन उस्तै हुन्छ । स्टाफ नर्सको एउटा ग्रुप च्याट छ, त्यसैमा कसलाई के समस्या छ भनेर रातभरि कुरा हुने उनले सुनाइन् । ‘घर छु भन्ने मात्रै हो, ध्यान सबै अस्पतालमै हुन्छ,’ उनले भनिन्, ‘निद्रामा पनि अस्पताल सम्झिँदै बर्बराउँदी रहिछु ।’

कालीकोट–२ की सुनीताका श्रीमान् ब्लड क्यान्सरका कारण दुई महिनाअघि बिते । ६ वर्षको छोरा लिएर भेरी अस्पतालमा खटिएकी उनी आफै कोरोना संक्रमित हुन् । सुनीताका आँखाअगाडि जब कोभिड संक्रमणले कसैका श्रीमान् मर्छन्, उनी आफ्नै नियतिसँग तुलना गर्छिन् । र, साहसका साथ आफ्नै कथा सुनाएर मृतकका आफन्तलाई सम्झाउन थाल्छिन् । ‘कहिलेकाहीं अरूको घाउमा मल्हम लगाउन आफ्नै घाउ कोट्याउनुपर्ने रहेछ,’ उनले भनिन् ।

दैलेखकी कमला नेपालीलाई नर्सिङ पेसा जागिरभन्दा पनि धर्म हो भन्ने लाग्छ । त्यसैले परिवारले जागिर छाडेर घर फर्किन धेरै पटक बोलाउँदासमेत उनी जान सकेकी छैनन् । उनी काम गर्दागर्दै संक्रमित भइन् । तर बिरामीको सेवा नै उनको औषधि बनेको छ । हरेक दिन घरबाट फोन आउँछ । ‘आमा रुँदै बोलाउनुहुन्छ,’ उनले भनिन्, ‘उहाँलाई सम्झाउँछु, एकबारको जीवन हो पुण्य कर्म गरेरै मर्छु ।’

नेपालगन्ज मेडिकल अस्पतालका मेडिकल अफिसर डा. पुरुषोत्तम बर्मा चार दिनदेखि आफैं संक्रमित छन् । लक्षण देखिएकाले स्लाइन चढाउँदै उनी काम गरिरहेका छन् । टाउको दुख्ने, बान्ता आउलाजस्तो हुने, शरीर पिटेजस्तै दुख्ने, खोकी लाग्नेजस्ता लक्षण देखिँदासमेत उनले पीसीआर गर्ने फुर्सद पाएका थिएनन् । शनिबार बिरामीको चाप बढ्यो । दुई जना मेडिकल अफिसर संक्रमित भएर होम आइसोलेसनमा छन् । पुरुषोत्तमले जनशक्ति अभाव देखेर आफू सन्चो नहुँदा नहुँदै पनि जिम्मेवारी पूरा गरिरहेको बताए ।

आफू संक्रमित हुँदासमेत कोरोना संक्रमितको उपचारमा खटिएका नेपालगन्ज मेडिकल शिक्षण अस्पतालमा कार्यरत मेडिकल अफिसर डा. पुरुषोत्तम बर्मा बिरामीको फाइल सम्हाल्दै । तस्बिर सौजन्य : नेपालगन्ज मेडिकल कलेज

आफ्नो हातमा स्लाइनको इन्जेक्सन लगाउँदै बिरामीको फाइल पल्टाउँदै गरेको उनको तस्बिर शनिबारदेखि सामाजिक सञ्जालमा भाइरल भएको छ । लगातार पखाला लागेपछि, कमजोर भएका उनी औषधि गर्दै थिए । अस्पतालकै नर्सले उक्त फोटो खिचिदिएकी थिइन् । ‘उसै त पीपीई लगाएर बिरामी हेर्नुपर्छ, त्यसैमा पखाला लागेर उभिन नसक्ने भएको थिएँ,’ उनले भने, ‘हामी स्वास्थ्यकर्मीले बिरामी छु भनेर उम्किन मिल्दैन ।’

नेपालगन्ज उपमहानगरपालिका फुलटेक्रा घर भएका डा. पुरुषोत्तमले साथीभाइ राम्रोसँग नभेटेको ६ महिना भयो । संक्रमणका बेला आफ्नो कारणले अरूलाई जोखिममा पार्नु हुँदैन भन्ने उनलाई राम्रोसँग थाहा छ । भावनामा बहेर कतिपय साथीले भेट्न बोलाउँछन् । पुरुषोत्तम भने मुटु कठोर बनाउँछन् । फोन, म्यासेन्जरमा सम्पर्क गर्नेलाई समेत समय दिने फुर्सद उनलाई छैन । उनका अनुसार अस्पतालमा सबै स्वास्थ्यकर्मी यति व्यस्त छन् कि काम गर्दागर्दै ठोक्किने साथीभाइको हालखबरसमेत बुझ्ने फुर्सद छैन ।

बिरामीको चाप बढेसँगै कोहलपुर मेडिकल कलेजमा नयाँ बिरामी भर्ना गर्ने स्थिति छैन । अस्पतालको कुनाकाप्चा जहाँ खाली ठाउँ पाइन्छ, त्यहीं बिरामी राखेर उपचार गर्नुपर्ने स्थिति रहेको चिकित्सक देवेन्द्र आचार्यले बताए । एउटै डाक्टरले १२ घण्टा निरन्तर पीपीई लगाएर उपचार गर्नुपर्दा गर्मीले ढल्ने अवस्था सिर्जना भएको उनले सुनाए । गत वर्ष आफैं कोभिड पोजिटिभ भएका देवेन्द्र परिवारको मायाले घरमै बस्न सकेका छैनन् । ‘घरमा जाऊँ कोभिड अरूलाई सर्ला भन्ने डर छ,’ उनले भने, ‘जे हुन्छ, एक्लैलाई हुन्छ भनेर अस्पतालमै छु ।’ उनलाई अस्पतालको कामपछि १० मिनेट फुर्सद मिल्यो भने घरमा भिडियो कल गर्छन् । सबैभन्दा पहिला एक वर्षको छोरोको भिडियो हेर्छन् । आँखाभरि आँसु भरेर छोरो सम्झँदै फेरि बिरामीको हेरचार गर्न थाल्छन् ।

भेरी अस्पतालकी नर्सिङ इन्चार्ज शिला शर्माको तन अस्पतालमा छ मन भने साढे दुई वर्षको दूध खाने छोरोतिर हुन्छ । दिनरात बिरामीको हेरचाह गर्न भ्याएकी शिलाले घरमा नौ दिनदेखि कोरोना संक्रमण भएको सानो छोरोको उपचार गर्न पाएकी छैनन् । आमालाई जिम्मा लगाएर उनी दिनरात अस्पतालमा हुन्छिन् । काम गर्दागर्दै राति घर पुग्दा छोरो निदाइसकेको हुन्छ । उनले भनिन्, ‘सुतेकै बेला दूध खुवाउँछु ।’ उनका अनुसार छोरोको अवस्थामा सुधार आएको छ । तर अस्पतालमा दिनहुँ जटिल खाले बिरामी हेर्दाहेर्दा शिलाका आँखा थकित छन् ।

कोहलपुरस्थित नेपालगन्ज मेडिकल कलेज शिक्षण अस्पतालमा लगातार १२ घन्टाको ड्युटीपछि थाकेर पीपीई लगाएरै सुतेका चिकित्सक डा. राजाप्रसाद शाह । तस्बिर सौजन्य : डा. देवेन्द्र आचार्य

आइतबार २२ जना स्वास्थ्यकर्मी थपिएपछि उनको मनमा केही राहत महसुस भएको छ । ‘जनशक्ति थपिएपछि केही हल्का होला,’ उनले भनिन् । बिरामीको संख्या बढेसँगै भेरी अस्पतालमा स्वास्थ्यकर्मी संक्रमित हुने संख्या पनि उत्तिकै छ । एक साताअघि ७० जना स्वास्थ्यकर्मी संक्रमित भएका थिए । अहिले संक्रमित हुने स्वास्थ्यकर्मीको संख्या ९० भन्दा बढी भइसकेको भेरी अस्पतालकी नासु विमला आचार्यले बताइन् ।

प्रकाशित : वैशाख २०, २०७८ ०६:२८
पूरा पढ्नुहोस्
प्रतिक्रिया
पठाउनुहोस्
×