लुम्बिनी प्रदेशमा अलोकतान्त्रिक र असंवैधानिक प्रवृत्ति प्रस्तुत भयो : देउवा- समाचार - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनी प्रदेशमा अलोकतान्त्रिक र असंवैधानिक प्रवृत्ति प्रस्तुत भयो : देउवा

कान्तिपुर संवाददाता

काठमाडौँ — प्रमुख प्रतिपक्ष कांग्रेसका सभापति शेरबहादुर देउवाले लुम्बिनी प्रदेशमा आइतबार भएको समग्र घटनाक्रमलाई आफ्नो पार्टीले गम्भीरतापूर्वक लिएको भन्दै विरोध जनाएका छन् । 

देउवाले आइतबार साँझ विज्ञप्ति जारी गरेर लुम्बिनी प्रदेशमा संविधानको ठाडो उल्लंघन, बलमिच्याँई र घोर अलोकतान्त्रिक प्रवृत्ति देखिएको भन्दै निन्दा र भर्त्सना गरेका छन् । 'लुम्बिनी प्रदेशमा आज भएको समग्र घटनाक्रमलाई नेपाली कांग्रेसले गम्भीरतापूर्वक लिएको छ । संविधानको ठाडो उल्लंघन, बलमिच्याँई र घोर अलोकतान्त्रिक प्रवृत्तिको म कडा निन्दा र भत्सर्ना गर्दछुँ,' देउवाको विज्ञप्तिमा लेखिएको छ, 'नेकपा (एमाले)ले प्रदेश सभामा प्रस्ट बहुमत गुमाएको तथ्य बुझेर नै अविश्वास प्रस्ताव छलेका मुख्यमन्त्रीसँग बहुमत छ भनेर मान्नु र पुनः मुख्यमन्त्री नियुक्ति गरिनु राजनैतिक, नैतिक र संवैधानिक कुनै पनि कोणबाट तर्कसंगत छैन ।'

संविधानबमोजिम संसद्‌मा अविश्वास प्रस्तावको प्रक्रिया अघि बढेको अवस्थामा त्यसलाई निष्कर्षमा नपुर्‍याई राजीनामाको नाटक गर्नु र प्रदेश सभाको अधिवेशन अन्त्य गर्नु नेपालको संविधान एवं संसदीय मूल्य–मान्यता, विधि र पद्धतिको ठाडो उल्लंघन भएको देउवाको ठहर छ । उनले नेकपाबाट निर्वाचित एक सांसदले माओवादी संलग्नता प्रस्ट गरेको, एमालेबाट निर्वाचित एक सांसदले सांसद पदबाट नै राजीनामा गरेको अनि नेपाली कांग्रेस, नेकपा माओवादी, जसपा र राजमो लगायतका दलले वैकल्पिक मुख्यमन्त्री प्रस्तावित गरिसकेको स्थितिमा संसदीय मूल्यमान्यता विपरीतको व्यवहार प्रस्तुत हुनु लज्जास्पद र आपत्तिजनक भएको विज्ञप्तिमा लेखेका छन् ।

सभापति देउवाले केन्द्रमा प्रस्तुत हुँदै आएको अधिनायकवादी चरित्रको अर्को संस्करण लुम्बिनी प्रदेशमा प्रस्तुत हुनु अत्यन्तै गम्भीर भन्दै विधि र प्रक्रियालाई अविलम्ब सुचारू गरेर संसद्‌को बहुमत अनुरुप नयाँ सरकारका लागि मार्ग प्रशस्त गर्न अपील गरेका छन् ।

प्रकाशित : वैशाख १९, २०७८ १९:४९
प्रतिक्रिया
पठाउनुहोस्

नेपाल सुपर लिग : ललितपुरलाई अर्को धक्का, पोखरासँग बराबरी

कान्तिपुर संवाददाता

काठमाडौँ — नेपाल सुपर लिगमा ललितपुर सिटी एफसीले आइतबार पोखरा थन्डर्ससँग गोलरहित बराबरी खेलेको छ । ललितपुरको यो तेस्रो बराबरी हो । यससँगै शीर्ष चारमा स्थान बनाउने सम्भावनामा अर्को धक्का पुगेको छ ।

दशरथ रंगशालामा आइतबार ललितपुर एफसीविरुद्धको खेलमा हेडर गर्दै पोखरा थन्डर्सका खेलाडी (नीलो) । तस्बिर : हेमन्त श्रेष्ठ/कान्तिपुर

चार खेलबाट उसको तीनै अंक मात्र छ र अहिलेसम्म जितहीन छ । यस्तोमा ललितपुर पुछारबाट दोस्रो स्थानमा छ । लिग चरणमा अब उसका दुई खेल मात्र बाँकी छ र त्यसमा राम्रो नतिजाका लागि चर्को दबाबमा रहनेछ ।


ललितपुरले यही खेलबाट नाइजेरियाली खेलाडी पिटर सेगुनलाई डेब्युको अवसर दियो । पोखरा भने चार खेलबाट पाँच अंकसहित तेस्रो स्थानमा उक्लियो । तर उसलाई पनि बराबरीले फाइदा गर्ने छैन ।

पूरा खेलको एक मात्र सबैभन्दा राम्रो अवसर ललितपुरको नाममा रह्यो । ५१ मिनेटमा कप्तान अन्जन विष्टले विपक्षी गोलरक्षक दीप कार्कीलाई बिट गरेर खाली पोस्टमा गरेको प्रहारलाई अजित भण्डारीले गोल लाइनको केही अगाडिबाट क्लियर गरेका थिए ।

प्रकाशित : वैशाख १९, २०७८ १९:३६
पूरा पढ्नुहोस्
प्रतिक्रिया
पठाउनुहोस्
×