मुख्यमन्त्रीको नियुक्ति बदर र शपथ रोक्न माग गर्दै लुम्बिनी प्रदेश सभामा चार दलको धर्ना - समाचार - कान्तिपुर समाचार
कान्तिपुर वेबसाईट
AdvertisementAdvertisement

मुख्यमन्त्रीको नियुक्ति बदर र शपथ रोक्न माग गर्दै लुम्बिनी प्रदेश सभामा चार दलको धर्ना 

अमृता अनमोल

बुटवल — नेकपा एमाले नेता शंकर पोखरेललाई लुम्बिनी प्रदेशको मुख्यमन्त्री नियुक्त गरेको विरोधमा नेपाली कांग्रेस, माओवादी, जसपा र राजमोसहितको गठबन्धले प्रदेश प्रमुखको कार्यालय परिसरमा धर्ना दिएको छ । 

बहुमतबिना एमाले संसदीय दलका नेता पोखरेललाई नियुक्त गरिएको भन्दै उनको शपथ रोक्ने मागसहित ती दलका सांसदहरु धर्नामा बसेका हुन् । कांग्रेस प्रमुख सचेतक फकरुदीन खानले सत्ता र शक्तिको दुरुपयोग गरी एकतर्फी मुख्यमन्त्रीको नियुक्ति गरेकाले नियुक्ति बदर र शपथ रोक्न धर्नामा बसेको बताए ।

लुम्बिनी प्रदेश सभाका चार विपक्षी दलले आइतबार दिउँसो एक बजे बहुमत प्रदेशसभा सदस्य आफूमा रहेको मौखिक जानकारी गराउँदै ४ बजेसम्म लिखित हस्ताक्षर लिएर आउने बताएका थिए । दिउँसो ४ बजे ४२ जना सांसदको हस्ताक्षर लिएर गठबन्दन पुग्दा प्रदेश प्रमुखले एमाले नेता शंकर पोखरेललाई पुनः मुख्यमन्त्री नियुक्त गरेका थिए ।

मुख्यमन्त्रीको राजीनामापछि एमाले संसदीय दलका नेता पोखरेलले संविधानको धारा १६८ को १ बमोजिम बहुमतको एकल सरकार बनाउन बहुमत सदस्यको हस्ताक्षरसहितको निवेदन पेस गरेका थिए । सोही निवेदनका आधारमा प्रदेश प्रमुख धर्मनाथ यादवले मुख्यमन्त्री नियुक्त गरेका थिए ।

कांग्रेस माओवादी गठबन्धनले भने एमालेमा ४१ सदस्य नरहेकाले संविधानको धारा १६८ को १ बमोजिम सरकार गठन हुन नसक्ने भएकाले मुख्यमन्त्रीको नियुक्ति संविधान विपरीत भएको दाबी गरेको छ ।

नेकपाबाट चुनाव लडेकी तर एमालेमा संलग्न भनिएकी विमला कुमारी खत्रीले आफूले माओवादी रोजेको बताएकी छन् । उनी दाङको निर्वाचन क्षेत्र ३ को ख की सदस्य थिइन् । यस्तै कपिलवस्तुको २ (१) का दृगनारायण पाण्डेले प्रदेश सभा सदस्यबाट राजीनामा दिएका छन् । यस्तै स्वतन्त्रबाट उम्मेदवार बनेका धर्मलालप्रसाद श्रीवास्तव र अजय शाहीले माओवादी गठबन्धनलाई सघाउने बताइसकेको गठबन्धनको दाबी छ ।

प्रकाशित : वैशाख १९, २०७८ १७:२४
प्रतिक्रिया
पठाउनुहोस्

नेपालमा हालसम्मकै सबैभन्दा धेरैमा संक्रमण, एकै दिन ७ हजार १ सय ३७ जनामा कोरोना पुष्टि

कान्तिपुर संवाददाता

काठमाडौँ — नेपालमा हालसम्मकै सबैभन्दा धेरै संक्रमित थपिएका छन् । आइतबार एकै दिन ७ हजार १ सय ३७ जनामा कोरोना पुष्टि हो । यसअघि गत कात्तिक ५ गते ५ हजार ७ सय ४३ जनामा संक्रमण पुष्टि भएको थियो ।

स्वास्थ्य तथा जनसंख्या मन्त्रालयका अनुसार देशभरका प्रयोगशालामा गरिएको १६ हजार १ सय ४७ पीसीआर परीक्षणबाट आइतबार ७ हजार १ सय ३७ जनामा कोरोना संक्रमण देखिएको हो । यो सँगै नेपालमा कोरोना संक्रमितको संख्या ३ लाख ३६ हजार ३० पुगेको छ ।

२४ घण्टामा १६ सय १२ जना डिस्चार्ज भएका छन् । यो सँगै निको हुनेको संख्या २ लाख ८३ हजार ९ सय ९४ पुगेको छ ।

२४ घण्टामा २७ जनाको मृत्यु भएको छ । यो सँगै नेपालमा कोरोनाबाट मृत्यु हुनेको संख्या ३ हजार ३ सय २५ पुगेको छ ।

हालसम्म पीसीआर परीक्षण २५ लाख ४४ हजार ७६ पुगेको छ । आइसोलेसनमा ४८ हजार ७ सय ११ र क्वारेन्टाइनमा ६७ जना रहेको स्वास्थ्य मन्त्रालयले जनाएको छ ।

प्रकाशित : वैशाख १९, २०७८ १६:४६
पूरा पढ्नुहोस्
प्रतिक्रिया
पठाउनुहोस्
×