लुम्बिनी प्रदेशको मुख्यमन्त्रीमा पोखरेल पुनः नियुक्त- समाचार - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनी प्रदेशको मुख्यमन्त्रीमा पोखरेल पुनः नियुक्त

अमृता अनमोल

बुटवल — लुम्बिनी प्रदेशको मुख्यमन्त्रीमा शंकर पोखरेल पुनः नियुक्त भएका छन् ।

प्रदेश प्रमुख धर्मनाथ यादवले पोखरेललाई संविधानको धारा १६८ को उपधारा १ बमोजिम आइतबार मुख्यमन्त्रीमा नियुक्त गरेको प्रवक्ता चिरञ्जीवी पौडेलले जानकारी दिए ।

‘आज मिति २०७८ वैशाख १९ का दिन माननीय प्रदेश प्रमुख श्री धर्मनाथ यादवज्यूले नेपाल कम्युनिष्ट पार्टी (एमाले), लुम्बिनी प्रदेश संसदीय दलका नेता माननीय श्री शंकर पोखरेलज्यूलाई नेपालको संविधानको धारा १६८ को उपधारा (१) बमोजिम प्रदेश मुख्यमन्त्री पदमा नियुक्त गर्नुभएको व्यहोरा सम्बन्धित सबैको जानकारीको लागि यो प्रेस विज्ञप्ति जारी गरिएको छ,’ प्रवक्ता पौडेलले जारी गरेको विज्ञप्तिमा छ, ‘यस अघि नेपाल कम्युनिष्ट पार्टी (एमाले), लुम्विनी प्रदेश संसदीय दलका नेता माननीय श्री शंकर पोखरेलज्यूले आफ्नो नेतृत्वमा नेपालको संविधानको धारा १६८ को उपधारा (१) बमोजिम सरकार गठन गर्न प्रदेश सभाका बहुमत सदस्यहरुको हस्ताक्षरसहित माननीय प्रदेश प्रमुखज्यू समक्ष दावी पेश गर्नुभएको थियो ।’

पोखरेलले आइतबार नै मुख्यमन्त्री पदबाट राजीनामा दिएका थिए । आइतबार नै उनको राजीनामा स्वीकृत भएको थियो ।

राजीनामा स्वीकृतलगत्तै सबैभन्दा ठूलो दल एमालेको संसदीय दलको नेताको हैसियतले बहुमत प्रदेश सभा सदस्यको हस्ताक्षरसहित मुख्यमन्त्री नियुक्तिका लागि निवेदन दर्ता गराएका थिए । उनको आजै शपथ हुने प्रदेश प्रमुखको कार्यालयले जनाएको छ ।

वैशाख ६ मा पोखरेलविरुद्ध कांग्रेस–माओवादीसहितका दलले अविश्वास प्रस्ताव ल्याएका थिए । मुख्यमन्त्री पोखरेललाई विश्वासको मत जित्न ४१ सांसद आवश्यक पर्छन् । एमालेको कुल सांसद संख्या पनि ४१ नै हो । जसमध्ये मुख्यमन्त्री पोखरेलको राजीनामापछि एमालेतर्फकी सांसद विमला वलीले माओवादी केन्द्रलाई साथ दिने बताएपछि एमालेलाई एकल बहुमत सरकार बनाउन अप्ठेरो परेको छ । यद्यपि प्रदेश प्रमुखबाट पोखरेलले मुख्यमन्त्रीमा पुनर्नियुक्ति पाएका छन् ।

सम्बन्धित समाचार

प्रकाशित : वैशाख १९, २०७८ १५:३२
प्रतिक्रिया
पठाउनुहोस्

अक्सिजन अभाव भएपछि कोभिड अस्पताल सारियो

कान्तिपुर संवाददाता

सुर्खेत — अक्सिजन अभाव भएपछि ‘कोभिड विशेष अस्पताल’ लाई उत्तरतर्फको पुरानो भवनमा सारिएको छ । प्रदेश अस्पतालको पुरानो भवनमा अक्सिजन प्लान्ट जडान भएकोले कोभिडका बिरामीको बढ्दो चापलाई उपचार गर्न सहज हुने अस्पतालको भनाइ छ ।

अस्पतालका कोरोना फोकल पर्सन डा. केएन पौडेलका अनुसार गम्भीर अवस्थाका करिब १० जनाबाहेक अक्सिजन प्रयोग गरिरहेका अन्य बिरामीलाई सार्न सुरु गरिएको छ । अहिले कोरोना विशेष अस्पतालमा ४५ जना संक्रमित छन् । ‘आज (आइतबार) बिहानैदेखि बिरामीलाई पुराना भवनमा सारिरहेका छौं, जटिल अवस्थाका बिरामीलाई सार्न समस्या हुने भएकोले नयाँ भवनकै कोरोना वार्डमा उपचारको प्रबन्धन मिलाइरहेका छौं ।’

अस्पतालले पुरानो भवनमा करिब १ सय जना संक्रमितलाई उपचार गर्न सकिने जनाएको छ । त्यहाँ रहेका १६ वटा आइसीयू बेडमा अक्सिजन प्लान्टबाट सिधै (सिलिन्डरबिनै) अक्सिजन आपूर्ति हुन्छ । अन्य बेडमा भने सिलिन्डरबाट अक्सिजन आपूर्ति गर्ने व्यवस्था मिलाइएको डा. पौडेलले बताए ।

पुरानो भवनमा रहेको अन्तरंग विभाग (इन्डोर) लाई नयाँ भवनमा सारिएको छ । इमर्जेन्सी र प्रशासन विभागलाई पनि सार्ने तयारी भइरहेको अस्पताल निर्देशक डा. डम्बर खड्काले बताए । उनका अनुसार कोभिड अस्पताल रहेको नयाँ भवनमा पनि अक्सिजन प्लान्ट जोड्ने प्रक्रिया अन्तिम चरणमा पुगेको छ । नयाँ भवनमा पनि अक्सिजन प्लान्ट जोडिएमा तत्कालको लागि अक्सिजनको समस्या नहुने निर्देशक डा. खड्काको भनाइ छ ।

सुर्खेतमा संक्रमितको संख्या बढिरहेको छ । प्रदेश स्वास्थ्य सेवा निर्देशनालयका अनुसार शनिबारसम्म कर्णाली प्रदेशभर १ हजार ६ सय ३३ जना सक्रिय संक्रिमत रहेकामा सुर्खेतमा मात्र ९ सय ३४ जना छन् । संक्रमित ५० जनाको मृत्यु भएको छ ।

कोभिड अस्पतालका फोकल पर्सन डा. पौडेलले दैनिकजसो २–३ जना कोरोनाका बिरामी अस्पताल पुग्ने गरेका बताए । तर तिनीहरुको लक्षण र अवस्था हेरेरमात्र भर्ना गर्ने गरिन्छ । ‘कतिपय संक्रमित त सामान्य अवस्थामा भए पनि आत्तिएर आउँछन्, हामीले परामर्श गरेर औषधि दिएर पठाउँछौं,’ उनले भने, ‘आएजति सबैलाई भर्ना गर्ने हो भने त एक–दुई दिनमै थेग्न हम्मे हुन्छ ।’ अक्सिजन आवश्यक पर्ने जटिल खालका बिरामीलाई मात्र भर्ना गर्ने गरिएको उनले बताए ।

प्रकाशित : वैशाख १९, २०७८ १५:१७
पूरा पढ्नुहोस्
प्रतिक्रिया
पठाउनुहोस्
×