लुम्बिनीमा पोखरेलकै नेतृत्वमा एकल सरकार बनाउने एमाले संसदीय दलको निर्णय- समाचार - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनीमा पोखरेलकै नेतृत्वमा एकल सरकार बनाउने एमाले संसदीय दलको निर्णय

अमृता अनमोल

बुटवल — मुख्यमन्त्री शंकर पोखरेलको राजीनामा स्वीकृत भएलगत्तै लुम्बिनी प्रदेशमा एमालेले एकल सरकार बनाउने गृहकार्य सुरु गरेको छ । 

मुख्यमन्त्री पोखरेलले पदबाट राजीनामा दिएलगत्तै बसेको एमाले संसदीय दलको बैठकले संविधानको १६८ को १ बमोजिम एकल सरकार बनाउने निर्णय गरेको हो । एमाले प्रमुख सचेतक भूमीश्वर ढकालले एकल सरकारको मुख्यमन्त्री संसदीय दलका नेता शंकर पोखरेललाई नै तोक्ने निर्णयसमेत भएको बताए । ‘आजै मुख्यमन्त्रीको शपथ हुने गरी गृहकार्य अगाडि बढाइएको छ,’ उनले भने, ‘मुख्यमन्त्री नियुक्तिपछि बिस्तारै मन्त्रिमण्डल विस्तार हुनेछ ।’

नयाँ सरकार गठनका लागि प्रदेशप्रमुख धर्मनाथ यादवले प्रदेशसभामा सहभागी दललाई आह्वान गनुपर्ने हुन्छ । प्रदेशप्रमुखको कार्यालयले आजै उक्त आह्वान गर्ने स्रोतले जनाएको छ ।

एमाले लुम्बिनीमा ४१ जना प्रदेशसभा सदस्य छन् । जसपाका ४ र माओवादीका २ सांसद निष्कासनमा परेपछि अहिले प्रदेशसभा ८१ सदस्यमा खुम्चिएको छ । सरकार बनाउन ४१ सदस्य आवश्यक पर्छन् जुन एमालेमा मात्रै छन् ।

एमाले संसदीय दलको बैठकमा ४० सदस्य उपस्थित थिए । कोभिड संक्रमणका कारण प्रदेशसभा सदस्य भोजप्रसाद श्रेष्ठ भने उपस्थित थिएनन् । नयाँ राजनीतिक घटनाक्रमहरूबारे नयाँ रणनीति बनाउँदै एमालेले अन्य मन्त्रिमण्डल विस्तार गर्नेसमेत एमाले संसदीय दलको निर्णय छ ।

आजै बिहान मुख्यमन्त्री शंकर पोखरेलले प्रदेशप्रमुख धर्मनाथ यादवलाई राजीनामा बुझाएका थिए । प्रदेशप्रमुखले मुख्यमन्त्रीको राजीनामा स्वीकृत गर्दै अर्को व्यवस्था नभएसम्म मन्त्रिपरिषद्को कार्यभार सञ्चालन गर्न जिम्मेवारी दिएको प्रदेशप्रमुख कार्यलयका प्रवक्ता चिरञ्जीवी पौडेलले जनाएका छन् ।

मुख्यमन्त्री पोखरेलविरुद्ध नेपाली कांग्रेस, माओवादी केन्द्र र जसपासहित ४१ जनाले वैशाख ६ मा अविश्वासको प्रस्ताव दर्ता गरेका थिए । अविश्वास प्रस्तावमा हस्ताक्षर गरेका ३ सहित जसपाका ४ सदस्यलाई मुख्यमन्त्री शंकर पोखरेलले आफ्नो पक्षमा ल्याउँदै मन्त्री बनाएका थिए । यद्यपि जसपाका ४ सदस्य निलम्बन भएपछि अविश्वासको प्रस्ताव सामना नगरी संविधानको धारा १६८ को २ बमोजिम नेकपाबाट मुख्यमन्त्री बनेका पोखरेलले संविधानको धारा १६८ को १ बमोजिम सरकार गठन गर्न राजीनामा दिएका थिए ।

प्रकाशित : वैशाख १९, २०७८ ११:२९
प्रतिक्रिया
पठाउनुहोस्

भर्ना नपाउँदा संक्रमितको बिचल्ली

अस्पतालमा रेखदेख र उपचार नभएको गुनासो
कम जनशक्तिले धेरैको व्यवस्थापन गर्दै स्वास्थ्यकर्मी
अमृता अनमोल

बुटवल — पश्चिम नवलपरासीको सरावल गाउँपालिकाका ३६ वर्षीय पुरुषलाई श्वास प्रश्वासमा समस्या आयो । ज्वरोसमेत आएका उनको शुक्रबार कोरोना परीक्षण भयो । रिपोर्ट पोजिटिभ देखियो । आफन्तले परासीको पृथ्वीचन्द्र अस्पतालमा लगे । बेड नभएको भन्दै अस्पतालले भर्ना लिन मानेन ।

भैरहवाको भीम अस्पतालमा उपचाररत कोरोना संक्रमित । तस्बिर : अमृता/कान्तिपुर

अवस्था जटिल बन्दै गएपछि शनिबार बिहानै रूपन्देहीको भैरहवामा रहेको भीम अस्पतालमा ल्याइयो । तर, यहाँ पनि बेड खाली थिएन । तीन घण्टा अस्पतालको पेटीमा बिताएपछि बल्ल स्वास्थ्यकर्मी आए । उनीहरूले अक्सिजन मात्रै नापे । अरू उपचार गरेनन् । अक्सिजन लेभल कम छ तर बेड खाली नहुँदासम्म राख्न र उपचार गर्न सक्ने अवस्था छैन भन्दै उनीहरू फर्किए । बिरामी दिनभर अस्पतालको पेटीमा थिए । ‘अस्पतालमै आएर पनि उपचार पाइएन,’ बिरामीका आफन्त पुण्य चौधरीले भने, ‘कहिले बेड खाली हुने हो र भर्ना पाइने हो थाहा छैन ।’ पुण्यले रूपन्देहीका सबै अस्पतालमा फोन गरेको र कतै भर्ना पाउने अवस्था नरहेको बताए । ‘अब सिकिस्त बिरामीलाई घर लैजानु कि अस्पतालबाहिर राख्नु, थाहा छैन,’ उनले भने ।

रूपन्देहीको रोहिणी–१ की एक महिलालाई तीन दिनदेखि लगातार ज्वरो आयो । ५६ वर्षीया ती महिला खोकीले लखतरान परिन् । बिस्तारै श्वास फेर्न गाह्रो मान्न थालिन् । आफन्तले गत बिहीबार पीसीआर परीक्षण गराए । उनमा कोरोना देखियो । गाउँका स्वास्थ्यकर्मीले अक्सिजनसहितको आईसीयूमा राखेर उपचार गर्न भन्दै कोरोना विशेष अस्पतालमा जान सुझाव दिए । शुक्रबार बिहान उपचारका लागि उनलाई भीम अस्पताल ल्याइयो । तर, उपचार पाउन सकिनन् । स्वास्थ्यकर्मीले बेड छैन भनेर ढोकाबाटै फर्काइदिए । तत्काल मेडिकल कलेजमा लगे । त्यहाँ पनि आईसीयू बेड नभएको भन्दै भर्ना लिइएन । बिरामीलाई फर्काएर पुनः भीम अस्पतालकै आँगनमा ल्याइयो । ‘बिरामी झन् झन् सिकिस्त हुनुभाछ,’ बिरामीका आफन्त ज्योति गुप्ताले भने, ‘हामी कतिबेला अस्पतालको बेड खाली होला भनेर कुरिरहेका छौं । अब भगवान् भरोसा छ ।’

अस्पतालमा उपचाररत बिरामीले पनि उचित चिकित्सकीय सुविधा पाएका छैनन् । नियमित नर्सिङ सेवा पनि नपाएको आफन्तहरूको गुनासो छ । अस्पतालको बेडमा संक्रमितसँगै आफन्त कुरेर बसेका भेटिन्छन् । उनीहरूलाई औषधि खुवाउनेदेखि बेड मिलाउने काम कुरुवाले नै गर्नुपर्छ । बिरामीको नियमित सम्पर्कमा रहेका कुरुवा एवं आफन्तहरू सामाजिक घुलमिल गरिरहेका छन् । यसले संक्रमण झन् भयावह हुने डर छ । एक सातादेखि एचडीयूमा संक्रमित आमाको उपचार गराइरहेका सिद्धार्थनगर नगरपालिकाको भैरहवाका राकेश ठाकुरले औषधि के खुवाउने भनेर सोध्न पनि स्वास्थ्यकर्मी नभेटिने बताए । ‘डाक्टर त देखिँदै देखिन्नन् । यहाँ हुने नर्सले पनि बिरामीको वास्ता गर्दैनन्,’ उनले भने, ‘संक्रमितका आफन्तले नै बिरामीको रेखदेख र स्याहारसुसार गर्नुपरेको छ ।’

भीम अस्पतालमा २२ बेडको एचडीयू र पाँच बेडको आईसीयू कक्ष छ । आकस्मिक कक्षमा ३० जना बेडको पर्खाइमा छन् । अस्पतालको बाहिर बस्नेको संख्या पनि त्यत्तिकै हाराहारीमा छ । तर, अस्पतालका सबै बेड बिरामीले भरिएका छन् । भर्ना भएका बिरामीलाई तत्काल सुधार नभएपछि नयाँ बिरामी भर्ना गर्न सकिएको छैन । अस्पतालका स्वास्थ्यकर्मीहरूले भने कम जनशक्तिले धेरै व्यवस्थापन गर्नुपर्दा समस्या भएको बताए । ‘हामीले सक्दो गर्ने हो । अवस्था भयावह छ,’ अस्पतालको आकस्मिक कक्षकी इन्चार्ज सविता शर्माले भनिन्, ‘चाहेर पनि सबै गर्न सकिएको छैन ।’ विशेषज्ञ चिकित्सक नआउँदा स्वास्थ्यकर्मीले नै सबै उपचार गर्नुपरेको उनले दुखेसो पोखिन् ।

लुम्बिनी प्रदेश सरकारले व्यवस्थापन गरेको भीम अस्पतालमा संक्रमितले भर्ना नपाउने र भर्ना भएकाले पनि उचित रेखदेख नपाउने समस्या बढेपछि यस अस्पताललाई पूर्ण रूपमा कोभिड अस्पताल बनाउन थालिएको छ । अस्पतालमा कोभिडको मात्रै उपचार गर्न ५० बेडको एचडीयू बनाइँदै छ । यसका लागि अन्य बिरामी भर्ना गर्न छोडिएको छ । उपचारको व्यवस्थापन लुम्बिनी प्रादेशिक अस्पताल बुटवलले गर्ने र अपुग जनशक्ति प्रदेश सरकारले व्यवस्थापन गर्ने निर्णय भएको प्रदेशका स्वास्थ्यमन्त्री लीला गिरीले बताए । ‘मंगलबारसम्म ५० बेडको एचडीयू सुरु हुनेछ,’ उनले भने, ‘लुम्बिनी प्रादेशिकले हेर्ने भएपछि उपचारको सेवामा पनि सुधार हुने अपेक्षा छ ।’

प्रकाशित : वैशाख १९, २०७८ ११:१७
पूरा पढ्नुहोस्
प्रतिक्रिया
पठाउनुहोस्
×