आइसोलेसन बनाउँदै स्थानीय तह- समाचार - कान्तिपुर समाचार
कान्तिपुर वेबसाईट
AdvertisementAdvertisement

आइसोलेसन बनाउँदै स्थानीय तह

जनप्रतिनिधि भन्छन्– ‘तत्काल परीक्षण गरेर समुदायको अवस्था जानकारी लिनुपर्ने चुनौतीसँगै स्वास्थ्य सामग्रीको अभाव छ’
मेनुका ढुंगाना

अछाम — अछामका १० वटै स्थानीय तहले आइसोलेसन वार्ड बनाउन थालेका छन्  । जिल्ला कोभिड व्यवस्थापन समितिको बैठकले प्रत्येक पालिकाले १० बेडसहितको आइसोलेसन वार्ड अनिवार्य गराउने निर्णय गरेपछि उनीहरू जुटेका हुन्  ।

अछामको मंगलसेनस्थित कृिष ज्ञान केन्द्रको खाली भवनमा आइसोलेन वार्ड तयार पार्दै नगरपालिकाका कर्मचारी ।

सदरमुकाम रहेको मंगलसेन नगरपालिकाले ४० बेड क्षमता भएको आइसोलेसन वार्ड तयार पारेको छ । नगरपालिकाका प्रमुख प्रशासकीय अधिकृत खकेन्द्रबहादुर सोडारीका अनुसार कृषि ज्ञान केन्द्रको भवनलाई आइसोलेसन वार्ड बनाएको हो । सामान्य लक्षण भएका संक्रमितलाई होम आइसोलेसनमा बसाउने र जटिल संक्रमितलाई मंगलसेनमा रहेको आइसोलेसनमा ल्याइने उनले बताए । उनले भने, ‘प्रत्येक वडामा गएर एन्टिजेन विधिबाट कोरोना परीक्षण शनिबारबाटै सुरु गरेका छौं ।’

साँफेबगर नगरपालिकाले पनि बयालपाटा अस्पतालमा आइसोलेसन वार्ड तयार पारेको छ । बयालपाटा अस्पतालमै अक्सिजन उत्पादन गर्ने प्लान्ट भएकाले सबै बेडलाई अक्सिजनसहित व्यवस्थापन गर्न थालिएको नगरप्रमुख कुलबहादुर कुँवरले बताए । उनका अनुसार नगरपालिकाले ५ वटा अक्सिजन उत्पादन गर्ने मेसिन खरिद गर्न थालेको छ । स्वास्थ्य सामग्री जताततै अभाव हुन थालेपछि सोचेअनुसार तीव्र रूपमा व्यवस्थापन गर्न नसकिएको उनले बताए । ‘अक्सिजन उत्पादन बयालपाटा अस्पतालले गर्छ । हामी मेसिन किन्दै छौं । तत्काल ५ वटा मेसिन खरिदको प्रक्रियामा छौं,’ उनले भने, ‘एउटा मेसिनको मूल्य १ लाख ४५ हजार रहेछ । हामीले अन्य स्वास्थ्य सामग्री खरिदका लागि पनि तयारी थालेका छौं ।’

कोरोना परीक्षण गरिएकोमध्ये धेरैलाई कोरोना पोजिटिभ देखिन थालेको उनको भनाइ छ । समुदायकै व्यक्तिलाई कोरोना देखिन थालेपछि अवस्था गम्भीर हुन सक्ने आकलन उनको छ । ‘जिल्लामा १५ सय थान एन्टिजेन केन्द्र सरकारले उपलब्ध गराएको थियो । सबै स्थानीय तहलाई अलिअलि भागमा पर्‍यो,’ कुँवरले भने, ‘भारतबाट आएकालाई होम क्वारेन्टाइनमा पठाउन र संक्रमितलाई घरमै बसाउन केन्द्रको निर्देशन छ । सरकारका यस्ता निर्णयले स्थानीय तहलाई समेत अप्ठ्यारो पारेको छ ।’ एन्टिजेन विधिबाट परीक्षण गर्दा नेगेटिभ देखिएका व्यक्तिलाई पीसीआर परीक्षण गर्दा पोजिटिभ देखिन थालेपछि धेरैले पीसीआर नै परीक्षण गर्न खोजेको उनको भनाइ छ ।

कमलबजार नगरपालिकाले ३० बेडसहितको आइसोलेसन वार्ड तयारी अवस्थामा राखेको नगर प्रमुख ओमप्रकाश विष्टले बताए । कोरोना परीक्षणका लागि स्वास्थ्य सामग्री खरिद गर्न आफैं कैलालीमा गएको उनले जनाए । ‘आइसोलेसन वार्ड तयार भयो । पीसीआर परीक्षणका लागि भीटीएम किट र अन्य सामग्री खरिदका लागि यतिखेर म कैलालीमा छु,’ उनले भने, ‘स्वास्थ्य सामग्रीको चरम अभाव देखियो । एकातिर तत्काल कोरोना परीक्षण गरेर समुदायको अवस्था जानकारी लिनुपर्ने चुनौती छ । अर्कोतिर स्वास्थ्य सामग्री खरिद गर्न खोज्दा पनि पाइएको छैन ।’

ढकारी गाउँपालिकाले पनि १० बेडसहितको आइसोलेसन तयार पारेको प्रमुख प्रशासकीय अधिकृत राजेन्द्र भाटले बताए । उनका अनुसार समुदायमै गएर कोरोना परीक्षण गर्ने तयारी थालिएको छ । चौरपाटी गाउँपालिकाले भने विद्यालयलाई आइसोलेसन वार्ड बनाएको जनाएको छ ।

प्रकाशित : वैशाख १९, २०७८ ०७:१५
प्रतिक्रिया
पठाउनुहोस्

मदन भण्डारी राजमार्गको रेखांकन विवाद टुंगियो

१९ अर्ब रूपैयाँ सकिँदा भौतिक प्रगति ३८ प्रतिशत मात्र
विमल खतिवडा

काठमाडौँ — मदन भण्डारी राजमार्ग निर्माण सुरु भएको चार वर्षमा भौतिक प्रगति ३८ प्रतिशत मात्र छ । आर्थिक वर्ष २०८१/८२ मा निर्माण सक्ने लक्ष्य रहे पनि केही खण्डको विस्तृत आयोजना प्रतिवेदन (डीपीआर) नै तयार भएको छैन । झापाको बाहुनडाँगीदेखि डडेलधुराको रुपाल जोड्ने गरी राजमार्ग निर्माण थालिएको हो ।

मदन भण्डारी राजमार्गअन्तर्गत उदयपुरको बेल्टार–गाईघाट खण्डमा निर्मित सडक । तस्बिर : डिल्लीराम खतिवडा कान्तिपुर

अहिले राजमार्गको पूर्वी खण्डका केही भागमा सडक र पुल बनाइए पनि अन्यत्र भने डीपीआर, वातावरणीय प्रभाव मूल्यांकन (ईआईए) लगायतको काम बाँकी छ । २०७५ जेठ ६ मा मन्त्रिपरिषद्बाट निर्णय भएसँगै राजमार्ग निर्माण सुरु भएको हो । निर्माणमा १९ अर्ब रुपैयाँ खर्च भइसकेको छ । महेन्द्र राजमार्गको उत्तर र मध्यपहाडी राजमार्गको दक्षिणतिर पर्ने गरी यसको निर्माण थालिएको आयोजनाले जनाएको छ । नयाँ सडक निर्माण गर्नुभन्दा भएकै सडकलाई जोडेर राजमार्ग घोषणा गरिएको मदन भण्डारी राजमार्ग आयोजना निर्देशनालयका प्रमुख उमेशविन्दु श्रेष्ठले बताए ।

१ हजार २ सय ५० किलोमिटर दूरी रहेको राजमार्गको सुरु अनुमानित लागत ७६ अर्ब रुपैयाँ हो । ‘पहिला ठेक्का लागेको ठाउँको अनुमान गरेर प्रतिकिलोमिटर कति लाग्छ भन्ने हिसाबले लागत अनुमान निकालिएको हो,’ उनले भने, ‘तर कतिपय सडकको डीपीआर अझै भएको छैन ।’ उनका अनुसार सबै सडक, पुलको डीपीआर भइसकेपछि निश्चित लागत निस्कनेछ । सडक दुई लेनको निर्माण गरिनेछ । थप भएका सडकसहित कुल १ हजार ३ सय ५२ किमि दूरीमा ६ सय ६७ किमिमा मात्र निर्देशनालयले काम गरिरहेको छ । बाँकी ६ सय ८५ किमि सडक विभागअन्तर्गतकै आयोजनाले हेरिरहेका छन् । ‘राजमार्ग घोषणा हुनुअघि नै विभिन्न सेक्सन अरूले नै हेरिरहेका थिए । सडक विभागकै विभिन्न आयोजनाले हेर्नेबाहेकका सडक हामीले हेर्नेछौं,’ श्रेष्ठले भने । अहिलेसम्म २ सय ८८ किमि सडक कालोपत्र र ७४ वटा पुल निर्माण सकिएको उनको भनाइ छ । यो प्रगति अन्य आयोजनाले गरिरहेको कामभित्र पर्दैन । ‘एक लेन मात्र कालोपत्र भएको ठाउँमा अहिले छुँदैनौं,’ उनले भने, ‘कालोपत्र नै नभएका ठाउँमा दुई लेनको सडक बनाइनेछ, एक लेनको कालोपत्र भएको ठाउँमा दुई लेनपछि मात्र गरिनेछ ।’

केही ओभरल्याप हुन गएका सडकको रेखांकन विवाद टुंगिएको जानकारी पाए पनि आधिकारिक रूपमा पत्र नआएको श्रेष्ठको भनाइ छ । ‘राजमार्ग दुईवटा तर रेखांकन एउटै हुँदा समस्या थियो,’ उनले भने, ‘रेखांकनको विवाद टुंगिएपछि सबै समस्या समाधान हुन्छन्, सबै सडकमा काम हुनेछ ।’ प्रधानमन्त्रीका प्रेस सल्लाहकार सूर्य थापाले पनि केही दिनअघि सामाजिक सञ्जाल ट्विटरमा रेखांकन टुंगिएका सडकमा राष्ट्रिय राजमार्ग रिडी–बलकोट–हंसपुर–प्युठान–सुर्खेत सडक परेको उल्लेख छ ।यसअन्तर्गत रिडी–बलकोट–सन्धिखर्क–गच्छेचौर–रतनमारे–गोखुंगा–बागदुला–देवीस्थान–लोहारपानी–घोराही–तुलसीपुर–पुरन्धारा–बोटेचौर (सुर्खेत) कायम भएको छ । अर्को सडकमा रिडी–तम्घास–सिमलटारी–सौतामारे–मच्छी–बिजुवार–चकचके–खुङ्ग्री–लिवाङ–घर्तीगाउँ–सुखाओडार–पातीहाल्ने–थारमारे–बागमारे–शीतलपाटी–खलंगा–कुभिन्डेदह–बालुवा–संग्रही–बोटेचौर–भेडाबारी–धुलियाबिट–वीरेन्द्रनगर (सुर्खेत) कायम हुनेछ ।

गुल्मीको रिडीदेखि प्यूठानसम्म ओभरल्याप भएको थियो । त्यसलाई छुट्ट्याइएको निर्देशनालयका प्रमुख श्रेष्ठले जानकारी दिए । ‘पहिला विवाद थियो, रेखांकनमा केही गल्ती पनि भएका थिए,’ उनले भने, ‘पहिला कहाँकहाँबाट जाने सडक भनेर प्वाइन्ट छुटेका थिए, रेखांकन टुंगिएपछि अब विवाद हुँदैन । आगामी आर्थिक वर्षबाट यो खण्डमा काम गर्न सुरु हुन्छ ।’ रोल्पा र सल्यान खण्डको सडकमा डीपीआर नै भएको छैन । ‘रोल्पा, सल्यानतिर डीपीआर र ईआइए गर्न, गुल्मी–प्युठान खण्डमा कालोपत्र हुन बाँकी सडकको टेन्डरका लागि बाटो खुलेको छ,’ उनले भने, ‘आगामी आर्थिक वर्षबाट यसको काम सुरु हुनेछ ।’

अहिले धरान–चतरा–हेटौंडा सडक खण्डमा काम भइरहेको श्रेष्ठको भनाइ छ । सिन्धुलीको भिमानदेखि सिन्धुली बजारसम्म बीपी राजमार्गको ओभरल्याप भएको छ । ‘यसमा हामीले हेर्नुपरेन,’ उनले भने, ‘गाईघाटअन्तर्गत सडक र पुल गरेर दुई ठेक्का थिए । उदयपुरको बसाहादेखि भिमानसम्म १३४ किमि छ । यसमध्ये पुल र एप्रोच सडकसहित ११२ किमि सडकको ठेक्का भएको छ । यसको १११ किमि सडकको कालोपत्र भइसकेको छ ।

प्रकाशित : वैशाख १९, २०७८ ०७:१३
पूरा पढ्नुहोस्
प्रतिक्रिया
पठाउनुहोस्
×