‘नेताहरूमा नैतिक जवाफदेहिता हराएको छ’- समाचार - कान्तिपुर समाचार
कान्तिपुर वेबसाईट
AdvertisementAdvertisement

‘नेताहरूमा नैतिक जवाफदेहिता हराएको छ’

हरि शर्मा

काठमाडौँ — ०७७ साललाई मैले हराएको वर्षको रूपमा लिएको छु । एकातिर कोरोनाको कहरले स्थापित मान्यता भत्किएका छन् । आधारभूत सामाजिक सम्बन्धमा बदलाव आएको छ । परापूर्वकालदेखिको सभ्यता बदलिएको छ ।

स्वास्थ्यको निर्देशनले हाम्रा सामाजिक र मानवीय सम्बन्ध विस्थापन भएका छन् । आउने दिनमा सामाजिक र शारीरिक सम्बन्ध कसरी अघि बढ्छन् भन्ने नै अनौठो मान्नुपर्ने भएको छ । अहिलेको आधुनिक समाज भनेको श्रमको समाज हो । कामको समाज हो । काम गर्नका लागि हामीले कार्यालयको कल्पना गरेका थियौं तर यसबीचमा यो संस्कृतिको मान्यतामा पनि परिवर्तन आएको छ । रिमोट र भर्चुअल वर्कमा हामी पुगेका छौं ।

सामाजिक, नागरिक समाजका संस्था, एसोसिएसन लोकतन्त्रका लागि महत्त्वपूर्ण कुरा हुन् । विचारका लागि संगठित हुने र राज्यसँग सम्झौता गर्ने काममा यस्ता संस्थाको महत्त्वपूर्ण भूमिका हुने गर्छ । यिनले राज्य र नागरिकबीच समन्वय गर्छन् । अहिले यिनै संस्थाहरू प्रभावहीन भएका छन् । भेला गर्न पाइन्न । प्रदर्शन गर्न पाइन्न । स्वास्थ्य सुरक्षाको कारण लोकतन्त्रमा समेत समस्या सृजना भएको छ । संघ–संगठन परिचालन गर्ने, चेतना र विचारको प्रवाह गर्ने माध्यम नै राजनीति हो । यही काम गर्न अहिले कठिनाइ भइरहेको छ ।

नेपालमा पनि लोकतान्त्रिक संस्कार संकुचन भएको छ । नागरिक समाजमा क्षय आएको छ । अब नयाँ किसिमले सोच्नुपर्ने बाध्यता छ । विभिन्न प्रवृत्ति र तकनिकीले हाम्रो समाजलाई नियन्त्रण गर्न सक्ने देखिँदै छ । राज्यलाई सहयोग गर्न सामाजिक संघसंस्थाहरू असान्दर्भिक देखिँदै गएका छन् । राज्यको भूमिका बलियो हुँदै गएको छ तर यसले समाजको संरचनालाई कमजोर बनाउँदै लगेको छ । लोककल्याणकारी हुने नाममा हाम्रा अधिकारहरू तकनिकी वर्गमा जाने खतरा छ ।

अहिले संकीर्ण राष्ट्रवादको कुरा विश्वव्यापी बन्दै छ । विश्वमा कोरानाविरुद्ध लगाइने भ्याक्सिनलाई लिएर संकीर्ण राष्ट्रवादको नारा लागेको छ । विश्व मानव कल्याणका लागि होइन । राज्यलाई बलियो बनाउन आफ्ना नागरिकका लागि मात्रै हो भन्ने भावना जागृत छ । हामी पनि संकीर्ण राष्ट्रवादको चेपेटामा छौं । यसले हुने खाने र हुँदा खानेको बीचमा दूरी बढाएको छ । म मात्रै बाँचे पुग्छ भन्ने उदार लोकतन्त्रको मान्यता विकिसित हुँदै छ । यसले संकीर्णवाद, लोकरिझाइँ, सामाजिक रुढीवादलाई बल पुर्‍याएको छ ।

जनतालाई सेवा दिन्छु । तेरो सुरक्षा मेरो हातमा छ भन्ने अहंकारले हाम्रा संरचनाहरू भत्काउन थालिएको छ । बोल्न नपाउँदा, संघसंस्थाहरू परिचालित हुन नपाउँदा हाम्रो लोकतन्त्र मजबुत हुन सकेको छैन । भ्रष्टाचार गर्ने र जनतासँग खेलबाड गर्ने मानसिकताले काम गरेको छ । सामाजिक सहिष्णुता हराउँदै गएको छ । सामाजिक एकता भत्किएको छ । राजनीतिक रूपमा संघसंस्था सही रूपमा परिचालित हुन सकेका छैनन् । राजनीतिलाई पुनर्जीवित गर्ने, सुन्ने, सुनाउने जवाफदेहिता हराएको छ । राजनीतिक नेताहरूमा नैतिक जवाफदेहिता देखिएको छैन ।

प्रतिपक्षले धर्म निर्वाह गरिरहेको छैन । राजनीतिक रोटी सेक्नका लागि सबै लागेका छन् । जनताले के पाए भन्नेतिर कसैको ध्यान गएको देखिन्न । संस्थाहरूको मर्यादा खस्किँदै गएको छ । समग्रमा यसले हाम्रो राजनीतिक क्षयीकरण गराएको छ । जनताका कारणले संसद् विघटन भएको होइन । हाम्रा कारणले सरकारले काम गर्न नपाएको होइन । जनताका कारणले प्रतिपक्षको वाणी रोकिएको होइन । जनताको कारणले मुलुक अँध्यारो बाटामा अघि बढेको होइन । त्यसैले राजनीतिक क्षेत्रको दृष्टिले पनि ०७७ साल हराएको वर्षको रूपमा रह्यो ।

(कुराकानीमा आधारित)

प्रकाशित : चैत्र ३१, २०७७ ०८:५०
प्रतिक्रिया
पठाउनुहोस्

राष्ट्रिय क्रिकेट टोलीको जर्सी र प्रायोजक नयाँ 

कान्तिपुर संवाददाता

काठमाडौँ — नेपाली राष्ट्रिय क्रिकेट टोलीको जर्सी प्रायोजकमा शिक्षामूलक एप ‘माई सेकेन्ड टिचर’ भित्रिएको छ । आईएनजी ग्रुपअन्तर्गत इनोभेट टेकले क्रिकेट टोलीको जर्सीमा माई सेकेन्ड टिचर लोगो राख्नेछ । माई सेकेन्ड टिचर जर्सीको अघिल्लो भागमा र इस्लिङ्टन कलेज पछिल्लो भागमा रहने जनाइएको छ ।

आईएनजी ग्रुपका सुलभ ढकाल र राष्ट्रिय टोलीका कप्तान ज्ञानेन्द्र मल्ल जर्सी अनावरण गर्दै तस्बिर : केशव थापा/कान्तिपुर

नेपाल क्रिकेट संघ (क्यान) ले तीन महिनाअघि राष्ट्रिय टोलीको जर्सी प्रायोजन अधिकारको जिम्मा एएनएस ग्रुप अफ कम्पनीको एडप्याड प्रालिलाई दिएको थियो । क्यानको कमर्सियल अधिकार कम्पनी बनेपछि एडप्याडले जर्सी प्रायोजकका रूपमा आईएनजी ग्रुपलाई ल्याएको हो ।

डिसेम्बर अन्त्यमा क्यान र एडप्याडबीचको सम्झौता १५ महिनाका लागि थियो । सम्झौताको पाटो नखुलाए पनि क्यानले कर, ब्रान्डिङ, सामाजिक कार्य कटाएर एडप्याडबाट ५६ लाख रुपैयाँ पाउने रहेको स्रोतले जनाएको छ । एडप्याड र आईएनजीबीचको सम्झौता रकम खुलाइएको छैन ।

राष्ट्रिय टोलीका कप्तान ज्ञानेन्द्र मल्ल र आईएनजी ग्रुपका सुलभ बुढाथोकीले सोमबार आयोजित कार्यक्रममा माई सेकेन्ड टिचर र इस्लिङ्टन कलेजको लोगो अंकित राष्ट्रिय टोलीको जर्सी अनावरण गरेका थिए । आफू खेल्दाका स्टार खेलाडीबाट प्रभावित भएको जनाउँदै बुढाथोकीले शिक्षामार्फत खेलकुदको विकास गर्न खोजिएको जनाए । उनले सम्झौता अहिले एकवर्षे रहेको र यसलाई तीन वर्षसम्म लम्ब्याउन सकिने जनाए ।

‘देशलाई एकजुट बनाउने पहिलो काम खेलकुद गर्छ । त्यसमा पनि क्रिकेटको रहेको र धेरैले क्रिकेट रुचाउने हुनाले हामी क्रिकेटसँग सहकार्य गर्दैछौं, क्रिकेटमार्फत देशभर माई टिचर एपबाट शिक्षा पुर्‍याउने आस राखेका छौं,’ बुढाथोकीले भने ।

कप्तान ज्ञानेन्द्रले क्रिकेटमा यस्तै अझै ठूलो लगानी भित्रिन जरुरी रहेको आवश्यकता औंल्याए । आउँदै गरेको नेदरल्यान्ड्स र मलेसियासम्मिलित त्रिकोणात्मक ट्वान्टी–२० शृंखलाले खेलाडीलाई ठूलो एक्सपोजर प्रदान गर्ने उनले जनाए । नेपाली टोलीले त्रिकोणात्मक ट्वान्टी–२० शृंखलामा नयाँ प्रायोजकको जर्सी लगाएर खेल्नेछ । जर्सीमा किट्स प्रायोजक अझै राख्न मिल्नेछ । क्यानले त्रिकोणात्मक ट्वान्टी–२० शृंखलाअघि त्यसको पनि निर्क्योल हुने आशा लिएको छ ।

नेपाल क्रिकेट संघका कोषाध्यक्ष रोशन सिंहले संकटको समयमा पनि जर्सीमा प्रायोजक पाउनु उत्साहजनक रहेको जनाए । एडप्याडका प्रमुख सुदीप थापाले खेलकुदमा लगानी गर्न एडप्याडले युनिक अवसर हेर्दै आएको र अहिले क्रिकेटसँग जोडिन पुगेको जनाए । राष्ट्रिय क्रिकेट टोलीका प्रशिक्षक डेव ह्वाटमोरले क्रिकेटमा प्रायोजकसँग साझेदारी सधैं महत्त्वपूर्ण रहेको जनाउँदै नयाँ प्रायोजकले पनि त्यसको प्रतिनिधित्व गर्ने जनाए ।

प्रकाशित : चैत्र ३१, २०७७ ०८:४९
पूरा पढ्नुहोस्
प्रतिक्रिया
पठाउनुहोस्
×